I Phung Hađăch 4 - Nau Brah Ndu Ngơi 2023

Phung kôranh tahan toyh Y-Salômôn

¹ Hađăch Salômôn chiă uănh ma lĕ n'gor Israel.

² Aơ jêng phung kôranh toyh păng geh: Y-Asaria, kon bu klâu Y-Sadôk, jêng kôranh ƀư brah;

³ Y-Êlihôrep jêh ri Y-Ahija, phung kon bu klâu Y-Sisa, jêng phung nchih samƀŭt; Y-Jêhôsaphat, kon bu klâu Y-Ahilut, jêng nơm kâp nchih prăp nau tât;

⁴ Y-Bênaya, kon bu klâu Y-Jêhôida, kôranh chiă uănh toyh tâm lĕ lĭng tahan; Y-Sadôk jêh ri Y-Abiathar jêng phung kôranh ƀư brah.

⁵ Y-Asaria, kon bu klâu Y-Nathan, jêng kôranh phung kôranh tahan; Y-Sabut, kon bu klâu Y-Nathan, jêng kôranh ƀư brah jêh ri nơm nchră hađăch;

⁶ Y-Ahisar, jêng kôranh chiă uănh ngih hađăch; jêh ri Y-Adôniram, kon bu klâu Y-Apda, jêng kôranh chiă uănh ma nau pah kan jâk.

⁷ Y-Salômôn geh jât ma bar phung kôranh chiă uănh ma lĕ n'gor Israel, gay ăn ndơ sông sa ma hađăch jêh ri ma lĕ bunuyh tâm ngih hađăch; ăp nơm nkra prăp ndơ sông sa du khay tâm du năm.

⁸ Aơ jêng amoh khân păng: Y-Ben-Hur chiă uănh n'gor klơ dor yôk Êphraim;

⁹ Y-Ben-Dêker chiă uănh n'gor Makas, Saalbim, Bet-Sêmes, jêh ri Êlon-Bet-Hanan;

¹⁰ Y-Ben-Heset chiă uănh tâm n'gor Arubôt, Sôkô jêh ri lĕ neh n'gor Hêpher jêng ndơ păng;

¹¹ Y-Ben-Abinadap chiă uănh tâm lam n'gor neh lâng klơ dor Dôrơ (ur păng jêng H'Taphat, kon bu ur Y-Salômôn);

¹² Y-Bana, kon bu klâu Y-Ahilut, chiă uănh tâm n'gor Tanak, Mêgidô, jêh ri lĕ n'gor Bet-Sêan, n'gor dăch Sarêthan, mpeh tâm dâng Jesrêel, ntơm bơh Bet-Sêan tât ma Abel-Mêhôla jêh ri tât ma mpeh kơh tê̆ ƀon Jôkmêam;

¹³ Y-Ben-Gêber chiă uănh n'gor Ramôt Gilêat, kơp lĕ ƀon jê̆ Y-Jar (Y-Jar jêng kon Y-Manasê) tâm nkual Gilêat, păng chiă uănh đŏng n'gor Argôp tâm Basan, geh prao jât rplay ƀon toyh geh mpêr ƀon jêh ri mâng nđăng mpông ma kông;

¹⁴ Y-Ahinadap, kon bu klâu Y-Idô, chiă uănh n'gor Mahanaim.

¹⁵ Y-Ahimas, chiă uănh n'gor neh Naptali (păng sŏk đŏng kon bu ur Y-Salômôn jêng H'Basmat, ƀư ur păng);

¹⁶ Y-Bana, kon bu klâu Y-Husai, chiă uănh n'gor Aser jêh ri Bêalôt;

¹⁷ Y-Jêhôsaphat, kon bu klâu Y-Parua, chiă uănh n'gor Isakar;

¹⁸ Y-Simei, kon bu klâu Y-Êla, chiă uănh n'gor Benjamin;

¹⁹ Y-Gêber, kon bu klâu Y-Uri, chiă uănh tâm n'gor neh Gilêat, jêng n'gor neh kăl e jêng n'gor Y-Sihôn, hađăch phung Amôrit, jêh ri Y-Ôk, hađăch n'gor Basan. Knŏng êng du huê Y-Gêber jêng kôranh chiă uănh tâm lĕ n'gor aơ.

Nau chiă uănh Y-Salômôn geh nau dơi

²⁰ Phung Yuđa jêh ri phung Israel âk nâm bu choih ta kơh dak mƀŭt; khân păng sông sa nhêt hâk răm ngăn.

²¹ Y-Salômôn chiă uănh lĕ rngôch ƀon bri hađăch, ntơm bơh dak krong Ơphrat tât neh phung Philistin, ma tât n'har Êjipt. Lĕ ƀon bri hađăch nây djôt ndơ nhhơr jêh ri pah kan ma hađăch Salômôn lôch du njăr rêh hađăch.

²² Ndơ sông sa ăn ma ngih hađăch Salômôn ăp nar jêng: Prao rbăn prao rhiăng lit rnih môi, jêh ri du rmưn pe rbăn bar rhiăng lit rnih ê muy,

²³ jât mlâm ndrôk lay ueh, bar jât mlâm ndrôk rong tă bơh ndrêch gơ̆, jêh ri du rhiăng mlâm biăp. Rlau ma nây hôm geh jun nkuăng, njoih, jĭl, jêh ri pêp iăr rong lay.

²⁴ Yorlah Y-Salômôn chiă uănh lĕ nkual mpeh nhâp nar dak krong Ơphrat jêh ri phung hađăch lĕ nkual nây, ntơm bơh Tipsa tât ma Gaxa, pôri lam puăn mpeh geh da dê nau đăp mpăn.

²⁵ Du njăr rêh hađăch Salômôn chiă uănh, lĕ phung Yuđa jêh ri phung Israel ntơm bơh Dan tât ma Bêr-Sêba, phung ƀon lan rêh da dê tâm nau đăp mpăn, ăp nơm tâm dâng tơm krăk ƀâu jêh ri tơm rvi păng nơm.

²⁶ Y-Salômôn geh đŏng puăn rmưn ndrung seh gay uih ndeh seh jêh ri du rmưn bar rbăn phung tahan ncho seh.

²⁷ Phung kôranh chiă uănh ăp nkual, ăp nơm du khay, nkra ăn ndơ sông sa ma hađăch Salômôn jêh ri lĕ rngôch phung bu jă hăn tât gay sa ta ntŭk nơng hađăch. Khân păng mâu ăn pưt du ntil ndơ ôh.

²⁸ Ăp nơm ăt tĭng nâm nau kan păng nơm leo njŭn ba ôrgơ jêh ri rhe tât ma ntŭk hŏ tâm nal jêh ma seh ma seh uih ndeh seh jêh ri seh om ncho.

Lư n'găr ma nau gĭt mĭn Y-Salômôn

²⁹ Brah Ndu ăn ma Y-Salômôn nau gĭt mĭn jêh ri nau gĭt rbăng mâu dơi ntĭt ôh, jêh ri nau gĭt vât âk nâm bu choih ta kơh dak mƀŭt.

³⁰ Nau gĭt mĭn Y-Salômôn rlau lơn nau gĭt mĭn lĕ rngôch bunuyh gŭ ta mpeh Luh Nar, jêh ri rlau lơn lĕ rngôch nau gĭt mĭn ta Êjipt.

³¹ Y-Salômôn gĭt mĭn lơn ma lĕ rngôch bunuyh êng, gĭt mĭn lơn ma Y-Êthan bu klâu Êsrahit jêh ri Y-Hêman, Y-Kalkôl, jêh ri Y-Darda, jêng phung kon bu klâu Y-Mahôl. Nau lư n'găr păng bu tăng lư tâm lĕ rngôch phung ƀon lan gŭ văr jŭm.

³² Hađăch ngơi jêh pe rbăn trong nau hôr, jêh ri njêng du rbăn rmeh prăm nau mprơ.

³³ Hađăch ngơi di ma tơm si, tă bơh tơm si sêdar ta Liban tât ma gơ̆ nse hisôp hon ta klơ mpêr. Hađăch ngơi đŏng di ma mpô mpa, ma sĭm och, ma mpa vơr, jêh ri ma ka.

³⁴ Bu văch tât tă bơh lĕ rngôch ntil mpôl băl hăn hao gay ŭch iăt nau gĭt mĭn Y-Salômôn. Lĕ phung hađăch lam bri văr neh tơlah tăng bu nkoch ma nau gĭt mĭn Y-Salômôn bu ŭch iăt ma nau gĭt mĭn păng.