I Phung Hađăch 3 - Nau Brah Ndu Ngơi 2023

Y-Salômôn mbơh sơm dăn nau gĭt mĭn

¹ Y-Salômôn ƀư nau tâm rnglăp đah Pharaôn, hađăch n'gor Êjipt, jêh ri sŏk kon bu ur Pharaôn jêng ur păng. Hađăch leo bu ur nây plơ̆ sĭt gŭ ta ƀon Đavit kŏ tât tơlah păng ƀư lôch jêh kan ndâk ngih hađăch ma păng nơm, ngih brah ma Brah Yêhôva, jêh ri mpêr ƀon văr jŭm ƀon Yêrusalem.

² Ƀiălah, phung ƀon lan ăt hôm e nhhơr mpa ƀư brah ta lĕ ntŭk prêh, yorlah nôk nây bu ê hŏ geh rdâk ôh ngih brah ma amoh Brah Yêhôva.

³ Y-Salômôn yơk rŏng ma Brah Yêhôva yor ri chuat hăn tĭng nâm lĕ nau vay Y-Đavit dăp, mbơ̆ păng. Ƀiălah păng ăt hôm e nhhơr mpa ƀư brah jêh ri su n'hôl ƀâu kah ta lĕ ntŭk prêh klơ.

⁴ Hađăch hăn tât ta Gibêôn gay nhhơr mpa ƀư brah ta nây, yorlah nây jêng ntŭk prêh klơ khlay rlau lơn. Ta klơ nơng ƀư brah nây, Y-Salômôn nhhơr du rbăn mpa ƀư brah ƀư ndơ ƀư brah gŭch.

⁵ Ta Gibêôn, Brah Yêhôva tâm mpơl ma Y-Salômôn tâm nau mbơi dôl măng; Brah Ndu lah: “Dăn hom dĭng lĕ ntil ndơ may ŭch, Gâp ăn ma may.”

⁶ Y-Salômôn lah: “Kôranh Brah hŏ mpơl jêh nuih n'hâm ueh toyh ma oh mon May jêng Y-Đavit, mbơ̆ gâp, tâm ban păng hŏ chuat hăn tanăp May tâm nau răp jăp, nau sŏng srăng jêh ri nuih n'hâm nau di. Kôranh Brah mpơl tay đŏng nuih n'hâm ueh toyh aơ ma păng, tơlah ăn ma păng du huê kon bu klâu gŭ ta sưng hađăch păng tâm ban hŏ geh nar aơ.

⁷ Aƀaơ aơ, hơi Brah Yêhôva jêng Brah Ndu gâp, Kôranh Brah nơm hŏ ƀư ăn ma oh mon May gŭ ta sưng hađăch chiă uănh thoi ntrok Y-Đavit, mbơ̆ gâp, nđâp lah gâp jêng knŏng du huê kon se jê̆ mâu gĭt ôh mâm nau mât uănh bri dak.

⁸ Oh mon May gŭ ta nklang phung ƀon lan May hŏ săch jêh, du phung ƀon lan âk râk mâu dơi kơp ôh.

⁹ Pôri, dăn ma Kôranh Brah ăn ma oh mon May nuih n'hâm gĭt mĭn gay phat nkra dôih phung ƀon lan May jêh ri tâm nkhah nau di jêh ri nau mâu di; yorlah mbu nơm dơi phat nkra dôih phung ƀon lan Kôranh Brah âk râk aơ?”

¹⁰ Brah Yêhôva di nuih yor Y-Salômôn hŏ dăn nau nây.

¹¹ Brah Ndu lah ma hađăch: “Yorlah may dăn jêh nau aơ jêh ri mâu dăn ôh ma may dơi rêh jŏ năm mâu lah nau ndrŏng ngăn ngên, mâu đŏng dăn nau rêh phung rlăng may, ƀiălah dăn nau gĭt mĭn gay phat nkra dôih moh nau di,

¹² rĭ dĭng Gâp ƀư tĭng nau may dăn. Gâp ăn ma may nuih n'hâm gĭt mĭn jêh ri gĭt rbăng, kŏ tât mâu hŏ geh ôh du huê bunuyh panăp may tâm ban ma may jêh ri pakơi may mâu mra geh bunuyh dơi ban may ôh.

¹³ Rlau lơn ma nĕ, Gâp tâm ban đŏng ăn ma may lĕ nau may mâu mâp dăn ôh, jêng nau ndrŏng ngăn ngên jêh ri lư n'găr, kŏ tât du njăr rêh may, mâu geh ôh tâm phung hađăch mra tâm ban ma may.

¹⁴ Tơlah may chuat hăn tâm trong Gâp, djôt prăp lĕ nau vay dăp jêh ri lĕ nau vay Gâp ntăm, tâm ban mbơ̆ may jêng Y-Đavit hŏ chuat hăn, Gâp mra ăn ma may dơi rêh jŏ năm.”

¹⁵ Y-Salômôn kah rngăl, gĭt nây jêng nau mbơi. Jêh nây hađăch plơ̆ sĭt ma Yêrusalem, dâk panăp Hip Nau Tâm Rnglăp Brah Yêhôva, nhhơr ndơ ƀư brah gŭch jêh ri ndơ ƀư brah ma nau đăp mpăn. Jêh nau nây, hađăch ƀư du nau nhêt sông ma lĕ rngôch phung oh mon păng.

Nau Y-Salômôn phat dôih ma nau gĭt mĭn

¹⁶ Nôk nây, geh bar hê bu ur văng tĭr văch tât dâk panăp hađăch.

¹⁷ Du huê bu ur lah: “Hơi hađăch, gâp jêh ri bu ur aơ rêh ndrel du ngih. Gâp deh du huê kon bu klâu dôl păng gŭ du ngih n'hanh gâp.

¹⁸ Lôch năng pe, jêh gâp deh kon, bu ur aơ tâm ban đŏng deh kon. Hên rêh ndrel du ngih, mâu geh ôh rlŭk du huê bunuyh êng gŭ ndrel ma hên tâm ngih, knŏng geh bar hê hên dơm.

¹⁹ Dôl măng ri, kon bu klâu bu ur nây khĭt, yorlah nôk bê̆ch păng hŏ tŭn mpet klơ păng.

²⁰ Klong măng, dôl oh mon bu ur may gŭ lâng bê̆ch, păng kah rngăl, pư sŏk kon bu klâu gâp dôl gŭ êp ta meng gâp nơm jêh ri dơm păng lâng ta klơ ntang ntơh păng, jêh nây păng djôt kon bu klâu păng hŏ khĭt nây ăn lâng ta ntang ntơh gâp.

²¹ Tât ôi taơ, gâp kah rngăl gay ăn kon gâp pu toh, saơ păng lĕ khĭt jêh! Ƀiălah kêng ang ôi, gâp uănh n'hêl nanê̆, saơ păng mâu di jêng kon gâp hŏ deh ôh.”

²² Bu ur ri plơ̆ lah: “Mâu ôh! Nơm rêh jêng kon gâp, bi nơm khĭt jêng kon ay.” Ƀiălah bu ur nây lah tay: “Mâu ôh! Nơm khĭt jêng kon ay, bi nơm rêh jêng kon gâp.” Khân păng tâm rlăch kơt nây tanăp măt hađăch.

²³ Nôk nây hađăch lah: “Bunuyh aơ lah: ‘Nơm rêh jêng kon gâp, bi nơm khĭt jêng kon ay.’ Bunuyh ri lah: ‘Mâu ôh! Nơm khĭt jêng kon ay, bi nơm rêh jêng kon gâp.’”

²⁴ Jêh nây hađăch ntrŭnh: “Djôt leo hom ăn gâp du n'gâr đao.” Bu djôt leo ma hađăch du n'gâr đao.

²⁵ Hađăch ntăm: “Blah hom kon se jê̆ hôm e rêh jêng bar buh, jêh nây ăn ma bunuyh aơ du n'gul jêh ri ăn ma bunuyh ri du n'gul.”

²⁶ Bu ur geh kon hôm e rêh phit nuih n'hâm hâu ngăn yor rŏng kon păng nơm, lah ma hađăch: “Hơi, kôranh gâp! Ăn hom ma păng kon se hôm rêh, lơi ta nkhĭt păng!” Ƀiălah bunuyh ri lah: “Păng mâu mra jêng kon gâp, mâu đŏng jêng kon ay, blah hom păng tâm pă bar buh!”

²⁷ Nôk nây, hađăch phat dôih: “Jao hom oh bê hôm rêh ma bu ur lah lor, jêh ri lơi ta nkhĭt păng yorlah bunuyh nây jêng mê̆ păng yơh.”

²⁸ Tơlah lĕ rngôch phung Israel hŏ tăng nau hađăch phat dôih nây, jêh ri khân păng geh nau yơk ma hađăch, yorlah khân păng saơ pô aơ Brah Ndu hŏ ăn ma hađăch nau gĭt mĭn gay ƀư nau di.