I Phung Hađăch 22 - Nau Brah Ndu Ngơi 2023

Y-Ahap jêh ri Y-Jôsaphat tâm lơh đah phung Aram

¹ Tâm pe năm, mâu geh ôh nau tâm lơh ta nklang phung Aram jêh ri phung Israel.

² Ƀiălah tâm năm tal pe, tơlah Y-Jôsaphat, hađăch Yuđa, hăn chop khâl ma hađăch Israel,

³ hađăch Israel lah ma phung oh mon păng pô aơ: “Khân may mâu gĭt ôh pô aơ ƀon Ramôt-Gilêat jêng ndơ he lĕ? Lŏng aƀaơ ri he gŭ klêm, mâu hôm sŏk tay ôh păng tă bơh ti hađăch Aram!”

⁴ Jêh nây hađăch lah ma Y-Jôsaphat: “May ŭch hăn ndrel ma gâp gay tâm lơh ƀon Ramôt-Gilêat?” Y-Jôsaphat lah ma hađăch Israel: “Gâp nâm bu may, phung ƀon lan gâp nâm bu phung ƀon lan may, jêh ri seh tâm lơh gâp jêng nâm bu seh tâm lơh may.”

⁵ Ƀiălah, Y-Jôsaphat lah tay ma hađăch Israel: “Ƀiălah lor lơn, ăn may ôp hom ma nau Brah Yêhôva ngơi.”

⁶ Pônây, hađăch Israel tâm rƀŭn ndrel phung nơm mbơh lor, geh tâm puăn rhiăng nuyh, jêh ri ôp khân păng: “Gâp mra hăn tâm lơh đah ƀon Ramôt-Gilêat mâu lah mâu?” Khân păng lah: “Hăn hao hom, yorlah Kôranh Brah mra jao ƀon nây tâm ti hađăch.”

⁷ Ƀiălah Y-Jôsaphat ôp: “Ta aơ mâu hôm geh đŏng du huê nơm mbơh lor êng bơh Brah Yêhôva, gay ma he ôp Kôranh Brah tă bâr mbung păng?”

⁸ Hađăch Israel plơ̆ lah ma Y-Jôsaphat: “Hôm geh du huê, amoh Y-Mika, kon Y-Imla. He sâm đă păng ôp Brah Yêhôva. Ƀiălah gâp tâm rmot ngăn ma păng, yorlah păng mâu mâp mbơh lor nau ueh di ma gâp ôh, ƀiălah knŏng nau mhĭk.” Y-Jôsaphat lah: “Lơi dĭng hađăch ngơi kơt nây.”

⁹ Hađăch Israel kuăl du huê kôranh bu char văch jêh ri lah: “Jă hom gơnh Y-Mika, kon Y-Imla, văch ta aơ.”

¹⁰ Nôk nây, hađăch Israel jêh ri Y-Jôsaphat, hađăch Yuđa, ăp nơm nsoh ao jâr hađăch da dê jêh ri gŭ ta sưng hađăch tâm ntŭk mprah ba, ntŭk lăp mpông ƀon Samari. Lĕ rngôch phung nơm mbơh lor ngơi nau mbơh lor panăp bar hê hađăch.

¹¹ Y-Sêdêkia, kon Y-Kênana, hŏ ƀư du kôp nke ma loih, jêh ri lah: “Brah Yêhôva lah: ‘Ma lĕ nke aơ, may mra tâm lơh đah phung Aram kŏ tât ƀư rai khân păng.’”

¹² Lĕ rngôch nơm mbơh lor lah kơt nĕ da dê. Khân păng: “Hăn tâm lơh hom đah Ramôt-Gilêat, hađăch mra dơi, yorlah Brah Yêhôva mra jao ƀon nây tâm ti hađăch.”

Y-Mika mbơh lor ma Y-Ahap roh nau dơi

¹³ Tâm nôk nây, phung mbơh hŏ hăn kuăl Y-Mika lah ma păng pô aơ: “Aơ, lĕ phung nơm mbơh lor ngơi du ai mbơh nau ueh ma hađăch. Dăn ma may ngơi hom nâm bu nau khân păng ngơi jêh ri mbơh nau ueh.”

¹⁴ Ƀiălah Y-Mika plơ̆ lah: “Gâp sŏk amoh Brah Yêhôva gŭ rêh mro mrăng gay sơm ton, gâp mra ngơi moh nau Brah Yêhôva lah ma gâp.”

¹⁵ Tơlah Y-Mika lĕ tât jêh, hađăch ôp ma păng: “Ơ Y-Mika, he hăn tâm lơh đah Ramôt-Gilêat, mâu lah mâu lơi hăn?” Y-Mika plơ̆ lah: “Hăn hom, hađăch mra dơi. Brah Yêhôva mra jao ƀon nây tâm ti hađăch.”

¹⁶ Ƀiălah hađăch lah ma păng: “Ndah nâm hŏ tơ̆ gâp sŏk nau ton nchâp ma may knŏng sŏk amoh Brah Yêhôva gay ngơi nau n'hêl nanê̆ ma gâp.”

¹⁷ Rnôk nây, Y-Mika lah: “Gâp saơ lĕ rngôch phung ƀon lan Israel chah rai pru pra ta klơ lĕ yôk, nâm bu phung biăp mâu geh bunuyh rmăk biăp ôh; jêh ri Brah Yêhôva lah: ‘Phung aơ mâu geh ôh kôranh, ăp nơm plơ̆ sĭt hom ma ngih khân păng tâm nau đăp mpăn.’”

¹⁸ Hađăch Israel lah ma Y-Jôsaphat: “Mâu di hĕ gâp lah jêh ma may pô aơ păng mâu mra mbơh lor ôh nau ueh ma gâp, ƀiălah knŏng mbơh nau mhĭk dơm?”

¹⁹ Y-Mika lah tay: “Pônây, iăt hom nau Brah Yêhôva ngơi: Gâp saơ Brah Yêhôva gŭ ta klơ sưng hađăch, jêh ri lĕ rngôch phung tahan tâm trôk gŭ dâk mpeh pa ma jêh ri mpeh pa chiau Păng.

²⁰ Brah Yêhôva ôp: ‘Mbu mra ndơm Y-Ahap gay ma păng hăn hao tâm lơh đah Ramôt-Gilêat jêh ri cha lôt khĭt ta nây?’ Geh nơm plơ̆ lah pô aơ, geh nơm êng plơ̆ lah nau êng.

²¹ Nôk nây, geh du huê brah tât dâk panăp Brah Yêhôva jêh ri lah pô aơ: ‘Gâp mra ndơm păng.’ Brah Yêhôva ôp: ‘Mâm nau may ndơm?’

²² Brah nây lah: ‘Gâp mra hăn jêh ri ƀư du huê brah ngơi mƀruh tâm trôm mbung lĕ rngôch nơm mbơh lor păng.’ Brah Yêhôva lah: ‘Di ngăn, may mra ndơm păng. Hăn hom jêh ri ƀư kơt nĕ.’

²³ Pônây aƀaơ, ri, Brah Yêhôva hŏ dơm jêh du huê brah ngơi mƀruh tâm trôm mbung lĕ rngôch phung nơm mbơh lor may, yorlah Brah Yêhôva hŏ tâm nal ƀư nau mhĭk ma may.”

²⁴ Nôk nây, Y-Sêdêkia, kon Y-Kênana, hăn văch dăch jêh ri tap ta bom Y-Mika jêh ri ôp: “Mbah tă trong Huêng Brah Yêhôva luh du bơh gâp gay tât ngơi đah may?”

²⁵ Y-Mika lah: “May mra gĭt rah vah nau nây tâm nar may nchuăt tă bơh jrô aơ tât ma jrô ri gay du krap.”

²⁶ Hađăch Israel ntăm: “Nhŭp hom Y-Mika njŭn leo păng rlet ma kôranh chiă uănh ƀon Y-Amôn jêh ri ma kon bu klâu hađăch jêng Y-Jôas,

²⁷ jêh ri ntĭnh khân păng nây lah: ‘Hađăch lah: Krŭng hom bunuyh aơ tâm ndrung, knŏng siăm păng ma piăng let jêh ri dak gay păng rêh, kŏ tât nôk gâp plơ̆ sĭt đăp mpăn.’”

²⁸ Y-Mika lah: “Tơlah hađăch plơ̆ sĭt đăp mpăn pôri Brah Yêhôva mâu lah ma bâr mbung gâp ôh.” Păng lah đŏng: “Lĕ rngôch bunuyh iăt hom lĕ nau gâp mhe lah!”

Nau mâu dơi jêh ri Y-Ahap khĭt

²⁹ Pônây, hađăch Israel ndrel ma Y-Jôsaphat, hađăch Yuđa hăn lơh ma ƀon Ramôt-Gilêat.

³⁰ Hađăch Israel lah đah Y-Jôsaphat: “Gâp mra rgâl săk nkrơ̆ ƀư bu êng jêh ri hăn tâm lơh, bi may ăt nsoh ao hađăch.” Kơt nây, hađăch Israel rgâl săk nkrơ̆ ƀư bu êng jêh ri hăn tâm lơh.

³¹ Nôk nây, hađăch Aram hŏ ntĭnh jêh ma phung pe jât ma bar nuyh kôranh chiă uănh tahan ƀĭt ndeh seh pô aơ: “Khân may lơi tâm lơh ôh đah bu, nđâp lah phung jê̆ mâu lah phung toyh, ƀiălah knŏng hăn lơh du huê hađăch Israel dơm.”

³² Yor ri, tơlah phung kôranh tahan ƀĭt ndeh seh saơ Y-Jôsaphat jêh ri lah pô aơ: “Nanê̆ ngăn jêng hađăch Israel ro aơ.” Yor ri, khân păng plơ̆ ro hăn lơh păng, ƀiălah Y-Jôsaphat nter huy.

³³ Tơlah phung kôranh tahan ƀĭt ndeh seh saơ mâu di hađăch Israel ôh, yor nây khân păng nsrŭng, mâu hôm tĭng păng ôh.

³⁴ Nôk nây, geh du huê bunuyh nkhêp van na pănh di ta hađăch Israel, di tâm ntŭk vah vang nđa nsiap ao loih ndơ nkŭm ntang ntơh. Hađăch lah đah nơm ƀĭt ndeh seh păng pô aơ: “Plăch ndeh hom, rdeng gâp luh du bơh nau tâm lơh, yorlah gâp lĕ rmanh jru jêh.”

³⁵ Ƀiălah nau tâm lơh nar nây jêng ktang lơn, yor ri bu sâm kơl an hađăch dâk tâm ndeh seh tâm lơh đah phung Aram. Tât kêng măng hađăch khĭt, mham ta ntŭk sôt hoch lam gre ndeh seh.

³⁶ Nôk nar nhâp, geh nau mbơh lam pôih tahan pô aơ: “Ăp nơm plơ̆ sĭt hom ma ƀon jêh ri n'gor păng nơm.”

³⁷ Pônây hađăch khĭt, bu leo săk jăn păng rlet ma ƀon Samari jêh ri bu tâp păng ta nây.

³⁸ Bu rao ndeh seh hađăch ta dak nglau Samari, jêng ntŭk phung bu ur văng tĭr vay gŭ ŭm; jêh ri so ler mham hađăch Ahap, di nâm bu nau Brah Yêhôva hŏ lah lor.

³⁹ Lĕ kan êng Y-Ahap, lĕ nau kan păng hŏ ƀư, ngih hađăch bu ƀư ueh ma la, jêh ri lĕ rngôch rplay ƀon hađăch ndâk jêh, bu hŏ nchih da dê tâm ndrom samƀŭt nau rêh jêng ma phung hađăch Israel.

⁴⁰ Y-Ahap khĭt n'hanh phung chô yau păng. Kon hađăch jêng Y-Ahasia gŭ ta sưng hađăch chiă uănh thoi ntrok păng.

Y-Jêhôsaphat ƀư hađăch Yuđa

⁴¹ Tâm năm rơh puăn nôk rô̆ Y-Ahap, hađăch Israel, Y-Jôsaphat, kon bu klâu Y-Asa, ntơm ƀư hađăch Yuđa.

⁴² Y-Jôsaphat gŭ ta sưng hađăch tâm pe jât ma prăm năm jêh ri păng chiă uănh bar jât ma prăm năm ta Yêrusalem. Mê̆ hađăch amoh H'Asuba, kon bu ur Y-Sihi.

⁴³ Hađăch hăn tĭng trong mbơ̆ păng jêng Y-Asa, mâu teng bơh trong nây ôh. Hađăch ƀư nau ueh tanăp măt Brah Yêhôva.

⁴⁴ Ƀiălah hađăch mâu ƀư rai ôh lĕ ntŭk prêh klơ, phung ƀon lan ăt hôm nhhơr mpa ƀư brah jêh ri su n'hôl ƀâu kah ta ntŭk prêh klơ nây.

⁴⁵ Y-Jôsaphat ƀư nau đăp mpăn đah hađăch Israel.

⁴⁶ Lĕ kan êng Y-Jôsaphat, nau ktang hađăch, lĕ nau hađăch tâm lơh, bu hŏ nchih da dê tâm ndrom samƀŭt nau rêh jêng ma phung hađăch Yuđa.

⁴⁷ Hađăch pih kloh bơh n'gor phung bu klâu văng tĭr tâm lĕ ntŭk jây rhŏ hôm e bơh rnôk Y-Asa, mbơ̆ păng.

⁴⁸ Rnôk nây, tâm n'gor Êđôm mâu geh hađăch ôh, knŏng geh du kôranh chiă uănh.

⁴⁹ Y-Jôsaphat ƀư du mpôl kumpăn ntơm bơh Tarsis gay hăn rlet ma bri Ôphir rdeng mah, ƀiălah phung kumpăn nây mâu hoch hăn ôh, yorlah mpôl kumpăn nây lĕ nchah rai ta Êsiôn-Gêber.

⁵⁰ Y-Ahasia, kon Y-Ahap, lah ma Y-Jôsaphat: “Ăn phung oh mon gâp hăn tâm kumpăn ndrel ma phung oh mon may.” Ƀiălah Y-Jôsaphat mâu rom ôh.

⁵¹ Y-Jôsaphat khĭt hăn gŭ n'hanh phung chô yau jêh ri bu tâp păng ndrel ma phung chô yau păng tâm ƀon Đavit. Y-Jôram, kon bu klâu păng, gŭ ta sưng hađăch chiă uănh ntrok păng.

Nau Y-Ahasia ƀư hađăch Israel

⁵² Tâm năm rơh jât ma pơh nôk rô̆ Y-Jôsaphat, hađăch Yuđa, Y-Ahasia, kon bu klâu Y-Ahap, ƀư hađăch phung Israel jêh ri chiă uănh bar năm ta Samari.

⁵³ Hađăch ƀư nau mhĭk tanăp măt Brah Yêhôva, hăn tĭng trong mê̆ mbơ̆ păng, jêh ri tâm trong me păng, jêh ri tĭng nâm trong Y-Jêrôbôam, kon bu klâu Y-Nêbat, jêng bunuyh nsŭk phung Israel ƀư tih.

⁵⁴ Hađăch pah kan jêh ri yơk mbah ma brah Baal, nsônh nau ji nuih Yêhôva Brah Ndu Israel, nâm bu mbơ̆ păng hŏ ƀư.