I Phung Hađăch 21 - Nau Brah Ndu Ngơi 2023

Y-Ahap pit rvan đang krăk ƀâu Y-Nabôt

¹ Jêh lĕ nau nây, geh nau aơ tât ma Y-Nabôt, bunuyh Jesrêel. Păng geh du đang krăk ƀâu ta Jesrêel, êp kêng ngih hađăch Ahap, hađăch ƀon Samari.

² Y-Ahap lah ma Y-Nabôt: “Ăn ma gâp đang krăk ƀâu may, gay ma gâp dơi geh ntŭk njêng n'gar trao, yorlah păng jêng êp kêng ngih hađăch gâp. Gâp mra tâm rgâl ăn ma may du đang krăk ƀâu ueh lơn; mâu lah tơlah may ŭch, gâp mra mplơ̆ prăk ma may di tĭng nâm rnoh păng.”

³ Ƀiălah Y-Nabôt lah ma Y-Ahap: “Brah Yêhôva buay ma gâp lơ ăn ma may drăp ndơn bơh chô yau gâp!”

⁴ Y-Ahap plơ̆ sĭt tâm ngih păng, rngot ngăn jêh ri ji nuih, yor nau Y-Nabôt, bunuyh Jesrêel hŏ lah ma păng pô aơ: “Gâp mâu ăn ôh ma may drăp ndơn bơh chô yau gâp.” Y-Ahap lâng bê̆ch ta sưng bê̆ch păng, nkêng muh măt păng, mâu ŭch sông sa nhêt.

⁵ Hađăch bu ur H'Jêsêbel hăn văch dăch ma păng jêh ri ôp: “Mâm ƀư hađăch rngot ngăn jêh ri mâu ŭch sông sa nhêt kơt nây?”

⁶ Hađăch plơ̆ lah: “Yorlah gâp hŏ ngơi lah jêh ma Y-Nabôt bunuyh Jesrêel, jêh ri lah: ‘Ăn ma gâp đang krăk ƀâu may tâm rgâl ma rnoh prăk, mâu lah tơlah may ŭch, gâp mra rgâl ma may du đang krăk ƀâu êng.’ Ƀiălah păng plơ̆ lah pô aơ: ‘Gâp mâu mra ăn ôh ma may đang krăk ƀâu gâp.’”

⁷ Hađăch bu ur H'Jêsêbel, lah: “Mâu di hĕ may chiă uănh phung Israel aƀaơ ri? Dâk hom, sông sa nhêt jêh ri geh nuih n'hâm maak. Gâp mra nkơ ma may đang krăk ƀâu Y-Nabôt, bunuyh Jesrêel.”

⁸ H'Jêsêbel sŏk amoh Y-Ahap gay nchih samƀŭt jêh ri tâp pŏng hađăch, njuăl samƀŭt nây ma phung kôranh bu ranh jêh ri ma phung bu yơk dôl gŭ ndrel tâm ƀon Y-Nabôt.

⁹ Păng nchih tâm samƀŭt nây: “Ntrŭnh hom du nau rƀŭn ver ât sông sa, jêh nây dơm Y-Nabôt ta mbor bôk phung ƀon lan.

¹⁰ Dơm hom tanăp măt păng bar hê phung mhĭk gay khân păng phong păng pô aơ: ‘May hŏ rak rtăp Brah Ndu jêh ri hađăch,’ jêh nây djôt leo păng luh padih jêh ri klŭp lŭ nkhĭt păng.”

¹¹ Phung bunuyh tâm ƀon păng, jêng phung bu ranh jêh ri phung bu yơk gŭ ta nây, ƀư tĭng nâm nau H'Jêsêbel ntăm jêh tâm samƀŭt hŏ njuăl ma khân păng.

¹² Khân păng mbơh du nau rƀŭn ver ât sông sa jêh ri dơm Y-Nabôt ta mbor bôk phung ƀon lan.

¹³ Nôk nây, bar hê phung mhĭk văch gŭ panăp Y-Nabôt. Bar hê phung mhĭk nây phong mƀruh ma Y-Nabôt panăp phung ƀon lan pô aơ: “Y-Nabôt rak rtăp jêh ma Brah Ndu jêh ri ma hađăch.” Jêh nây khân păng njŭn leo păng luh padih ƀon jêh ri klŭp păng ma lŭ kŏ tât khĭt.

¹⁴ Khân păng prơh bu hăn lah ma H'Jêsêbel pô aơ: “Bu klŭp jêh Y-Nabôt jêh ri păng khĭt jêh.”

¹⁵ Tơlah H'Jêsêbel tăng ma Y-Nabôt lĕ bu klŭp ma lŭ jêh ri păng khĭt jêh, pôri păng lah ma Y-Ahap: “Dâk hom, hăn sŏk đang krăk ƀâu Y-Nabôt, bunuyh Jesrêel, păng hŏ dun mâu ăn ma may tâm rgâl ma prăk. Yorlah Y-Nabôt mâu hôm rêh ôh, păng khĭt jêh.”

¹⁶ Mhe tăng ma Y-Nabôt lĕ khĭt jêh, Y-Ahap hăn trŭnh rlet ro đang krăk ƀâu Y-Nabôt, bunuyh Jesrêel, gay sŏk đang krăk ƀâu nây gay ƀư drăp ndơn ma păng.

Y-Êli mbơh nau phat dôih Brah Ndu

¹⁷ Nôk nây, geh nau Brah Yêhôva ngơi ma Y-Êli, bunuyh Tisbê, pô aơ:

¹⁸ “Dâk hom, hăn trŭnh mâp đah Y-Ahap, hađăch Israel gŭ tâm ƀon Samari. Aơ, păng gŭ tâm đang krăk ƀâu Y-Nabôt, ntŭk păng sŏk gay ƀư drăp ndơn ma păng.

¹⁹ Ăn may lah ma Y-Ahap pô aơ: ‘Brah Yêhôva lah: Mâu di hĕ may hŏ nkhĭt bunuyh, jêh nây pit rvan drăp ndơn păng?’ Ăn may lah tay: ‘Brah Yêhôva lah: Ta ntŭk so hŏ ler jêh mham Y-Nabôt, so mra ler mham may nơm đŏng.’”

²⁰ Y-Ahap lah ma Y-Êli: “Hơi nơm rlăng gâp, may lĕ mâp jêh gâp?” Y-Êli plơ̆ lah: “Di ngăn, gâp saơ jêh may, yorlah may hŏ tăch jêh may nơm gay ƀư nau mhĭk tanăp măt Brah Yêhôva.

²¹ Yor ri, Păng lah: ‘Gâp mra ăn tât nau mhĭk ma may. Gâp mra pih kloh noi deh may, ƀư rai lĕ rngôch phung bu klâu ngih Y-Ahap, nđâp lah nơm ƀư dĭk mâu lah kon me tâm n'gor Israel.

²² Yorlah may hŏ nsônh nau ji nuih Gâp, nsŭk ma phung Israel ƀư tih, pôri Gâp mra ƀư ma ngih may nâm bu ngih Y-Jêrôbôam, kon bu klâu Y-Nêbat, jêh ri nâm bu ngih Y-Baêsa, kon bu klâu Y-Ahija.’

²³ Brah Yêhôva ngơi đŏng tât ma H'Jêsêbel pơ aơ: ‘So mra sa puăch H'Jêsêbel dăch mpêr ƀon Jesrêel.

²⁴ Mbu tâm ngih Y-Ahap khĭt tâm ƀon, so mra sa puăch păng, bi mbu moh khĭt tâm mir, sĭm klơ trôk mra sa puăch păng.’ ”

²⁵ Nanê̆ ngăn, mâu geh ôh bunuyh tâm ban ma Y-Ahap, tăch êng păng nơm gay ƀư nau mhĭk tanăp măt Brah Yêhôva, jêng nơm H'Jêsêbel ur păng hŏ nsŭk nsôr.

²⁶ Hađăch ƀư jêh nau mưch rmot ngăn jêng mbah lĕ rup brah nâm bu phung Amôrit hŏ ƀư, jêng phung ƀon lan Brah Yêhôva mprơh jêh bơh panăp phung ƀon lan Israel.

²⁷ Tơlah Y-Ahap tăng lĕ nau nây, păng nkhêk bok ao, nsoh ao nsrôt ƀau, ver ât sông sa, bê̆ch tâm ƀau, jêh ri mbơh nau n'hôi săk păng nơm deh rhêt.

²⁸ Nôk nây, geh nau Brah Yêhôva ngơi ma Y-Êli, bu klâu ƀon Tisbê, pô aơ:

²⁹ “May saơ lĕ nau Y-Ahap ƀư n'hôi săk păng nơm tanăp Gâp? Yorlah păng n'hôi săk păng nơm tanăp Gâp, pôri Gâp mâu mra ăn tât ôh nau mhĭk tâm rnôk păng. Ƀiălah tât ta tâm rnôk rô̆ kon păng, Gâp mra ăn tât nau mhĭk ma ngih păng.”