I Phung Hađăch 20 - Nau Brah Ndu Ngơi 2023

Bu nchueng jŭm ƀon Samari jêh ri ƀon nây geh nau tâm rklaih

¹ Hađăch n'gor Aram jêng Y-Ben-Hadat rgum ndrel lĕ rngôch phung tahan păng. Hađăch ndrel ma pe jât ma bar hađăch êng, geh âk seh jêh ri ndeh seh, hăn hao nchueng jŭm jêh ri rduh lơh Samari.

² Hađăch prơh phung mbơh hăn mâp đah hađăch Ahap phung Israel gŭ tâm ƀon, jêh ri lah pô aơ: “Y-Ben-Hadat lah kơt aơ:

³ ‘Prăk jêh ri mah may jêng ndơ gâp. Phung ur dŭt ueh jêh ri phung kon may jêng ndơ gâp.’”

⁴ Hađăch Israel plơ̆ lah: “Hơi hađăch jêng kôranh gâp, tĭng nâm nau may lah, gâp jêh ri lĕ rngôch ndơ gâp geh jêng ndơ may.”

⁵ Ƀiălah phung mbơh plơ̆ tay đŏng ma hađăch phung Israel jêh ri lah: “Y-Ben-Hadat lah kơt aơ: ‘Gâp hŏ prơh phung mbơh hăn gay lah ma may pô aơ: “Jao hom prăk, mah may, phung ur jêh ri phung kon may ma gâp.”

⁶ Rlau ma nây, nar ôi taơ tâm mông aơ, gâp mra prơh phung oh mon gâp hăn tât ma may, khân păng mra joi tâm ngih hađăch jêh ri ngih phung oh mon may. Moh ntil ndơ may uănh jêng khlay ngăn, khân păng mra sŏk jêh ri djôt leo lĕ ndơ nây.’”

⁷ Hađăch Israel jă lĕ rngôch phung bu ranh tâm bri dak hăn tât, jêh ri lah ma khân păng: “Khân may gĭt hom jêh ri saơ rah vah pô aơ bunuyh aơ dôl joi nau ƀư mhĭk ma he. Yorlah păng hŏ prơh phung mbơh hăn lah ma gâp gay ăn gâp jao phung ur gâp, phung kon gâp, prăk gâp jêh ri mah gâp ma păng, jêh ri gâp mâu dun ôh đah păng.”

⁸ Lĕ kôranh bu ranh jêh ri lĕ rngôch phung ƀon lan lah da dê ma hađăch: “Dăn hađăch lơi dĭng iăt, mâu lah tông nau păng ôh.”

⁹ Pônây, Y-Ahap plơ̆ lah ma phung mbơh Y-Ben-Hadat pô aơ: “Mbơh hom ma hađăch jêng kôranh gâp: ‘Lĕ nau may ntĭnh tơ̆ lor, gâp jêng oh mon may mra ƀư, ƀiălah tơ̆ aơ gâp mâu dơi ƀư ôh.’” Phung mbơh hăn plơ̆ sĭt nkoch tay nau nây ma Y-Ben-Hadat.

¹⁰ Y-Ben-Hadat prơh tay bunuyh êng đŏng hăn lah pô aơ: “Tơlah ndruyh neh ta Samari geh tŏng ma lĕ tahan gâp ăp nơm dơi geh du mbăt, dăn phung brah ƀư nau mhĭk ma gâp jâk ngăn!”

¹¹ Ƀiălah hađăch Israel plơ̆ lah: “Mbơh hom ma hađăch pô aơ: ‘Nơm nsoh ao loih lơi tâm rnê ma păng nơm ôh nâm bu nơm doh lơi ao nây.’”

¹² Y-Ben-Hadat dôl gŭ nhêt ndrănh ndrel ma phung hađăch tâm ngih bok, mhe tăng lĕ nau nĕ, ntăm ro ma phung tahan păng nơm: “Nkrĭp dăp tahan!” Khân may nkrĭp dăp tahan ro gay rduh lơh ƀon nây.

Y-Ahap dơi lơh Y-Ben-Hadat

¹³ Nôk nây, geh du huê nơm mbơh lor hăn mâp Y-Ahap, hađăch Israel, jêh ri lah: “Brah Yêhôva lah: ‘May saơ đŏng lĕ rngôch phung tahan âk ngăn aơ? Uănh hom, nar aơ Gâp mra jao khân păng tâm ti may, jêh ri may mra gĭt ma Gâp jêng Brah Yêhôva.’”

¹⁴ Y-Ahap ôp: “Ma mbu nơm mra hăn tâm lơh?” Păng lah: “Brah Yêhôva: ‘Phung kôranh tâm dâng phung kôranh bôk nkual.’” Hađăch Ahap ôp tay: “Mbu nơm ntơm tâm lơh?” Nơm mbơh lor plơ̆ lah: “Hađăch ro yơh!”

¹⁵ Y-Ahap kơp tay phung kôranh tâm phung kôranh bôk nkual, geh lĕ rngôch bar rhiăng pe jât ma bar nuyh. Jêh nau nây, hađăch kơp tay lĕ rngôch phung tahan Israel, geh pơh rbăn nuyh.

¹⁶ Nklang bôk nar, nôk nây Y-Ben-Hadat gŭ nhêt ndrănh jêh ri nhŭl tâm trôm ndưp rmlak păng nơm ndrel ma pe jât ma bar phung hađăch mpeh băl păng, phung Israel leo phung tahan hăn luh.

¹⁷ Phung kôranh ndăm tâm phung kôranh bôk nkual luh hăn lor. Y-Ben-Hadat prơh bunuyh hăn n'hut. Khân păng mbơh ma hađăch: “Geh bunuyh hăn luh tă bơh Samari.”

¹⁸ Hađăch lah: “Tơlah khân păng luh du ma nau đăp mpăn, mâu lah geh mĭn gay tâm lơh, ăt nhŭp rêh khân păng.”

¹⁹ Phung kôranh ndăm tâm phung kôranh bôk nkual hăn luh padih ƀon, jêh ri phung tahan tĭng ndô̆ khân păng.

²⁰ Khân păng tâm lơh đah phung rlăng khân păng. Phung Aram nchuăt du, jêh ri phung Israel tĭng rgot khân păng. Y-Ben-Hadat, hađăch Aram, ncho seh nchuăt rklaih ndrel ma bar pe phung tahan ncho seh.

²¹ Hađăch Israel hăn rduh lơh seh jêh ri ndeh seh, dơi lơh phung tahan Aram jêh ri lơh nkhĭt khân păng âk ngăn.

²² Nôk nây, nơm mbơh lor hăn mâp đah hađăch Israel jêh ri lah ma păng: “Hăn hom, ƀư ktang phung tahan may, jêh ri sek uănh ăn nanê̆ moh nau may mra ƀư, yorlah ta năm pakơi taơ hađăch Aram mra plơ̆ tay tâm lơh đah may.”

Y-Ahap dơi tay đah phung tahan Aram du tơ̆ đŏng

²³ Phung oh mon hađăch Aram lah ma păng pô aơ: “Phung brah khân păng jêng brah yôk, yor nây khân păng ktang lơn ma he. Ƀiălah ta lah nau tâm lơh đah khân păng tâm ntŭk neh lâng, nanê̆ he mra jêng dơi tâm lơh ma khân păng.

²⁴ Dăn hađăch ƀư kơt aơ: Tâm rgâl hom phung hađăch ma phung kôranh chiă uănh tahan,

²⁵ jêh nây săch du phung tahan tâm ban ma phung tahan lĕ roh jêh, nđâp ma seh jêh ri ndeh seh dơi ban tơ̆ lor. He mra tâm lơh đah phung Israel tâm neh lâng, nanê̆ ngăn he mra dơi tâm lơh.” Hađăch tăng nau nây jêh ri ƀư tĭng nâm nau phung oh mon.

²⁶ Bôk năm pakơi taơ, Y-Ben-Hadat kơp phung tahan Aram jêh ri hăn hao ma Aphek gay tâm lơh đah phung Israel.

²⁷ Phung ƀon lan Israel kơp đŏng phung tahan, ndrăp nkra ndơ sông sa, jêh ri hăn tâm lơh đah phung Aram. Phung Israel ƀư pôih panăp phung Aram. Khân păng nâm bu bar be phung ƀhôi dơm, ƀiălah phung Aram bêng lam n'gor bri.

²⁸ Nôk nây, geh du huê bunuyh Brah Ndu hăn văch dăch hađăch Israel jêh ri lah pô aơ: “Brah Yêhôva lah: Yorlah phung Aram hŏ lah: ‘Brah Yêhôva jêng brah yôk mâu di brah rlŭng,’ yor nây Gâp mra jao phung tahan âk râk aơ tâm ti may, jêh ri khân may mra gĭt ma Gâp jêng Brah Yêhôva.”

²⁹ Bar đah ƀư pôih tâm rđĭl pa tê̆ pa aơ tâm pơh nar. Tâm nar năng pơh, ntơm nau tâm lơh. Tâm du nar, phung ƀon lan Israel lơh nkhĭt du rsen nuyh tahan hăn jâng Aram.

³⁰ Phung tahan hôm klen nchuăt du krap tâm ƀon Aphek; ƀiălah lĕ mpêr ƀon rlâm, nklân bar rmưn pơh rbăn nuyh tahan hôm klen nây. Y-Ben-Hadat nchuăt du đŏng lăp tâm ƀon, krap ta du jrô ndâp.

³¹ Phung oh mon Y-Ben-Hadat lah ma hađăch: “Hên tăng bu lah jêh phung hađăch ngih Israel geh nau ueh. Yor ri, dăn ăn ma hên sŏk nsrôt ƀau ta gang bŭt jêh ri mpân rse brăt ta bôk, jêh nây hên hăn ran ma hađăch Israel; klăp lah păng ăn ma hađăch rêh!”

³² Pôri khân păng nsrôt ƀau ta gang bŭt khân păng jêh ri mpân rse brăt ta bôk, jêh nây hăn luh ran lăp ma hađăch Israel, jêh ri lah: “Oh mon may jêng Y-Ben-Hadat lah ma may pô aơ: ‘Dăn om ma gâp rêh.’ ” Y-Ahap lah: “Păng hôm e rêh lĕ? Păng jêng oh nâu gâp.”

³³ Phung bunuyh nây saơ geh nau mbên ueh, ndal dơn gơnh ro nau nây jêh ri lah: “Ơ, Y-Ben-Hadat jêng oh nâu may.” Y-Ahap lah tay đŏng: “Djôt leo hom păng hăn mâp đah gâp.” Y-Ben-Hadat hăn mpơl măt tanăp Y-Ahap, păng jă Y-Ben-Hadat hao ndeh seh păng nơm.

³⁴ Y-Ben-Hadat lah ma Y-Ahap: “Gâp mra mplơ̆ ma may lĕ ƀon mbơ̆ gâp sŏk jêh tă bơh mbơ̆ may, jêh ri may ndâk ngih tăch drăp ta Damas, nâm bu mbơ̆ gâp hŏ ƀư tâm Samari.” Y-Ahap lah: “Gâp sŏk dơn nau may hŏ tâm nkol aơ jêh ri mra ăn may hăn sĭt.” Pônây Y-Ahap ƀư nau tâm nkol đah Y-Ben-Hadat, jêh ri ăn Y-Ben-Hadat hăn sĭt.

Du huê nơm mbơh lor lah nau tih Y-Ahap

³⁵ Nôk nây, geh du huê tâm phung nơm mbơh lor, tông nau ntăm Brah Yêhôva, lah đah băl păng nơm: “Gâp dăn ma may, dong hom gâp!” Ƀiălah păng dun mâu ŭch dong.

³⁶ Păng lah tay: “Yorlah may mâu tông ôh bâr Brah Yêhôva, pôri tơlah may du tă bơh gâp, mra geh du mlâm yau mŭr kăp nkhĭt may.” Tơlah bunuyh băl nây mhe du tă bơh nơm mbơh lor, tâm mâp ro đah du mlâm yau mŭr kăp nkhĭt păng.

³⁷ Du huê nơm mbơh lor nây tâm mâp tay đah du huê bunuyh êng, jêh ri lah: “Gâp dăn may dong lơi gâp!” Bunuyh nây dong ro nơm mbơh lor jêh ri ƀư ăn păng sôt.

³⁸ Jêh nây nơm mbơh lor nây hăn jêh ri dâk êp kêng meng trong gay kâp hađăch hăn rgăn. Păng sŏk bok nkŭm muh măt gay n'hi săk.

³⁹ Dôl hađăch hăn rgăn, păng nter huy ma hađăch pô aơ: “Oh mon may dôl gŭ ta nklang nau tâm lơh, geh du huê bunuyh njŭn du huê bu nă jêh ri lah: ‘Sâm njrăng mât bunuyh aơ, tơlah ăn păng nchuăt klaih, nau rêh may mra ntrok nau rêh păng, mâu lah may mra ntrok pe jât kilô prăk.’

⁴⁰ Ƀiălah tơlah oh mon may dôl pah kan ta aơ ta ri, bunuyh bu nă nây du hêng.” Hađăch Israel lah ro ma păng: “Nĕ jêng nau phat dôih ma may, may nơm hŏ phat dôih ma may nơm.”

⁴¹ Bunuyh nây sŏk lơi ro pŏk bok nkŭm muh măt păng nơm, jêh ri hađăch Israel gĭt năl păng jêng du huê tâm phung nơm mbơh lor.

⁴² Nơm mbơh lor lah: “Brah Yêhôva lah: ‘Yorlah may mƀơk lơi bơh ti may bunuyh Gâp lĕ dăp nal jêh ma nau ƀư rai lơi, pônây nau rêh may mra ntrok nau rêh păng jêh ri nau rêh phung ƀon lan may ntrok nau rêh phung ƀon lan păng.’”

⁴³ Hađăch Israel plơ̆ sĭt ma ngih hađăch păng ta Samari, rngot ngăn jêh ri ji nuih ngăn.