I Phung Hađăch 2 - Nau Brah Ndu Ngơi 2023

Nau Y-Đavit ntĭnh

¹ Tơlah dăch tât nar Y-Đavit khĭt, păng ntĭm nti ma Y-Salômôn, kon bu klâu păng pô aơ:

² “Gâp lĕ dăch dâk hăn trong lĕ rngôch bunuyh klơ neh ntu hăn. Pônây, Ăn may jêng ktang jêh ri mpơl may nơm jêng du huê bunuyh kôranh!

³ Djôt prăp hom moh nau Yêhôva Brah Ndu ŭch ma may djôt prăp, chuat tâm trong Păng, djôt prăp lĕ nau vay dăp, lĕ nau vay ntăm jêh ri lĕ nau vay ƀư, jêh ri nau Păng nti tĭng nâm hŏ nchih jêh tâm nau vay Y-Môis, gay ăn may geh nau dơi jêng tâm lĕ rngôch kan may ƀư jêh ri ta lĕ rngôch ntŭk may hăn.

⁴ Nâm bu pônây, Brah Yêhôva mra ƀư tât di ngăn nau Păng ngơi jêh ma gâp pô aơ: ‘Tơlah phung kon sau may njrăng ma trong khân păng nơm, lĕ nuih n'hâm, lĕ huêng hăn tâm nau răp jăp tanăp măt Gâp, may mâu mra pưt ôh du huê nuyh gŭ ta sưng hađăch phung Israel.’

⁵ May hŏ gĭt đŏng ma lĕ nau Y-Jôap, kon bu klâu H'Sêruya, hŏ ƀư jêh ma gâp, nau păng hŏ ƀư đah bar hê kôranh chiă uănh tahan Israel jêng Y-Apner kon bu klâu Y-Ner, jêh ri Y-Amasa, kon Y-Jêther. Păng hŏ nkhĭt bar hê kôranh nây, ƀư nkhŭt mham khân păng tâm rnôk đăp mpăn nâm bu tâm rnôk nau tâm lơh, jêh ri hŏ ƀư mham nây krêp ta rse vân bŭt păng jêh ri ta ntâu jot păng ta jâng.

⁶ Yor ri, ƀư tĭng hom nau blau mĭn may tâm nau kan aơ, ƀiălah lơi ta ăn bôk mbra păng hăn trŭnh ƀon phung khĭt tâm nau đăp mpăn.

⁷ Bi đah phung kon Y-Barsilai, bunuyh Gilêat, may gŭ ngao hom ma nau ueh đah khân păng. Ăn hom ma khân păng sông nsum du sưng n'hanh may, yorlah khân păng hŏ gŭ ndrel gâp nôk gâp nchuăt du bơh Y-Apsalôm, nâu may.

⁸ Rlau ma nây, hôm geh Y-Simei, kon Y-Gêra, bunuyh Benjamin ta Bahurim, jêng nơm hŏ sŏk lĕ nau ngơi janh ƀai gay rak rtăp gâp tâm nar gâp hăn rlet ma Mahanaim. Ƀiălah yorlah păng trŭnh văch tâm mâp đah gâp ta Yurdan, rĭ dĭng gâp sŏk amoh Brah Yêhôva gay sơm ton ma păng pô aơ: ‘Gâp mâu mra nkhĭt ôh may ma đao.’

⁹ Ƀiălah, may lơi ta uănh ôh păng mâu geh nau rmal, yorlah may jêng du huê gĭt mĭn jêh ri gĭt ƀư moh nau ma păng. May ƀư hom ma bôk mbra păng krêp mham hăn jŭr tâm ƀon phung khĭt.”

Hađăch Đavit khĭt

¹⁰ Y-Đavit khĭt ndrel ma phung chô yau păng nơm jêh ri bu tâp păng tâm ƀon Đavit.

¹¹ Tâm rnôk Y-Đavit chiă uănh phung Israel geh puăn jât năm: pơh năm ta Hêbron jêh ri pe jât ma pe năm ta Yêrusalem.

¹² Y-Salômôn gŭ ta sưng hađăch mbơ̆ păng jêng Y-Đavit, jêh ri ƀon bri hađăch păng nâp ktang.

Hađăch Salômôn ƀư nâp nau dơi jêng hađăch

¹³ Nôk nây Y-Adônija, kon bu klâu H'Hagit, hăn tât tâm mâp đah H'Batsêba, mê̆ Y-Salômôn. Y-Batsêba ôp: “May văch tât ma nau đăp mpăn lĕ?” Păng plơ̆ lah: “Di ngăn, nau đăp mpăn.”

¹⁴ Jêh nây păng ngơi tay: “Gâp geh du nau ŭch lah ma ay.” Păng lah: “Ngơi hom.”

¹⁵ Păng ngơi: “Nanê̆ ay hŏ gĭt pô aơ ƀon bri hađăch aơ jêng ndơ gâp, jêh ri lĕ rngôch phung Israel gŭ kâp gâp da dê chiă uănh. Ƀiălah ƀon bri hađăch hŏ jêng ndơ oh gâp, yorlah nây jêng nau mĭn ŭch tă bơh Brah Yêhôva.

¹⁶ Pôri aƀaơ, gâp geh du nau ŭch dăn, dăn ma ay lơi ta dun.” Păng lah: “Ngơi hom.”

¹⁷ Y-Adônija ngơi: “Dăn ma ay sâm ngơi an ma Hađăch Salômôn — yorlah hađăch mâu mra dun moh nau ma ay — dăn hađăch ăn ma gâp H'Abisak, bunuyh Sunamit, jêng ur gâp.”

¹⁸ H'Batsêba lah: “Ueh jêh, gâp mra ngơi ma hađăch nau may ŭch.”

¹⁹ Pônây H'Batsêba hăn mâp hađăch Salômôn gay mbơh ma hađăch lĕ nau Y-Adônija ŭch. Hađăch dâk chuă vơt jêh ri kŭnh mbah panăp păng, jêh nây păng gŭ ta sưng hađăch păng nơm. Hađăch ntăm đă bu dơm du rnơl gŭ đŏng ma mê̆ hađăch gay păng gŭ mpeh pa ma hađăch.

²⁰ Păng lah: “Gâp geh du nau jê̆ ŭch dăn ma may, dăn ma may lơi dun ôh.” Hađăch plơ̆ lah: “Hơi mê̆, dăn ma mê̆ ngơi hom, yorlah gâp mâu mra dun ma mê̆ ôh.”

²¹ Păng lah: “Ăn hom H'Abisak, bunuyh Sunamit, ƀư ur ma Y-Adônija, jêng nâu may.”

²² Ƀiălah hađăch Salômôn plơ̆ lah ma mê̆: “Mâm ƀư mê̆ dăn ăn H'Abisak, bunuyh Sunamit, ma Y-Adônija? Mâm dĭng ay mâu dăn ƀon bri hađăch aơ ăn ma păng, yorlah păng jêng nâu gâp! Mâm dĭng ay mâu dăn ăn păng kôranh ƀư brah Y-Abiathar jêh ri Y-Jôap, phung kon bu klâu H'Sêruya ma păng!”

²³ Jêh nây, hađăch Salômôn sŏk amoh Brah Yêhôva gay sơm ton pô aơ: “Ăn Brah Yêhôva nkra ma gâp dŭt jru tơlah Y-Adônija mâu khĭt ôh yor ma nau păng dăn aơ!

²⁴ Aƀaơ ri, gâp sŏk amoh Brah Yêhôva gŭ rêh mro mrăng, Nơm hŏ njêng jêh gâp dơi nâp, hŏ ƀư ăn gâp ta sưng Y-Đavit, mbơ̆ gâp, jêh ri njêng ma gâp du nau chiă uănh, di nâm nau Păng hŏ ton, gay sơm ton pô aơ: bu mra nkhĭt Y-Adônija nar aơ ro.”

²⁵ Hađăch Salômôn ntrŭnh nau lah ma Y-Bênaya, kon bu klâu Y-Jêhôida. Ăn Y-Bênaya rduh dăch lơh jêh ri nkhĭt lơi Y-Adônija.

²⁶ Jêh nau nây, hađăch ntăm ma kôranh ƀư brah Y-Abiathar: “Hăn sĭt hom ma tâm mir may ta Anathôt, yorlah may khư khĭt. Ƀiălah nar aơ gâp mâu nkhĭt ôh may, yorlah may tung Hip Nau Tâm Rnglăp Kôranh Brah jêng Brah Yêhôva, tanăp măt Y-Đavit, mbơ̆ gâp, jêh ri yor may lĕ tâm pă jêh lĕ rngôch nau rêh ni nđâp ma mbơ̆ gâp.”

²⁷ Pônây, Y-Salômôn mprơh Y-Abiathar luh, mâu ăn păng kan kôranh ƀư brah tanăp măt Brah Yêhôva đŏng ôh, ƀư ăn nau Brah Yêhôva ngơi jêh ma ngih Y-Êli ta ƀon Silô dơi tât di ngăn.

²⁸ Tơlah tăng nau nkoch aơ, Y-Jôap du krap ro ta Ngih Bok Brah Yêhôva jêh ri kuăn ta lĕ nke nơng ƀư brah, yorlah Y-Jôap hŏ hăn tĭng mpeh Y-Adônija, nđâp lah păng mâu hăn tĭng mpeh Y-Apsalôm.

²⁹ Bu mbơh ma hađăch Salômôn pô aơ: “Y-Jôap du jêh rlet ma Ngih Bok Brah Yêhôva, jêh ri aơ, ri păng dôl dâk êp ta meng nơng ƀư brah.” Y-Salômôn ro prơh Y-Bênaya, kon Y-Jêhôida, jêh ri ntăm pô aơ: “Hăn hom, nkhĭt lơi păng.”

³⁰ Y-Bênaya hăn tât Ngih Bok Brah Yêhôva jêh ri lah ma Y-Jôap: “Hađăch ntrŭnh pô aơ: ‘Luh hom!’” Ƀiălah Y-Jôap plơ̆ lah: “Mâu ôh, gâp mra khĭt ta aơ.” Y-Bênaya plơ̆ mbơh tay ma hađăch: “Y-Jôap hŏ lah jêh ri plơ̆ lah kơt nĕ.”

³¹ Hađăch lah: “Ƀư hom tĭng nâm nau păng hŏ lah. Nkhĭt hom păng jêh ri tâp. Tâm ban pônây, may mra sŏk lơi bơh gâp jêh ri bơh ngih mbơ̆ gâp mham mâu geh nau tih, yorlah Y-Jôap hŏ ƀư nau pling mham mâu geh nau.

³² Brah Yêhôva mra ƀư ăn ma mham păng nkhŭt tay ta klơ bôk păng, yorlah păng hŏ rduh dăch bar hê bunuyh sŏng srăng jêh ri ueh lơn ma păng, nkhĭt khân păng ma đao, ƀiălah Y-Đavit, mbơ̆ gâp, mâu gĭt du ntil ndơ ôh; nây jêng Y-Apner, kon Y-Ner, kôranh chiă uănh tahan Israel, jêh ri Y-Amasa, kon Y-Jêther, kôranh chiă uănh tahan Yuđa.

³³ Mham khân păng mra nkhŭt tay ta klơ bôk Y-Jôap jêh ri ta klơ bôk phung kon sau păng kŏ tât ƀaƀơ n'ho ro. Bi Y-Đavit jêh ri phung kon sau păng, ma nau chiă uănh jêh ri ma sưng hađăch păng mra dơi đăp mpăn tă bơh Brah Yêhôva mro mrăng.”

³⁴ Pônây Y-Bênaya, kon bu klâu Y-Jêhôida, hăn hao, rduh lơh Y-Jôap jêh ri nkhĭt lơi păng. Bu tâp brôi Y-Jôap tâm neh ngih păng ta bri rdah.

³⁵ Hađăch njêng Y-Bênaya, kon bu klâu Y-Jêhôida, jêng kôranh chiă uănh tahan ntrok ma Y-Jôap, jêh ri hađăch njêng Y-Sadôk jêng kôranh ƀư brah ntrok ma Y-Abiathar.

³⁶ Jêh nau nây, hađăch prơh bu hăn kuăl Y-Simei tât jêh ri lah: “Ƀư hom ma may du ngih ta Yêrusalem, jêh ri gŭ ta nây, mâu dơi luh bơh ntŭk nây gay hăn ta aơ ta ri.

³⁷ Yorlah ăn may gĭt ta nar may du luh tă bơh ntŭk nây jêh ri rgăn dak n'hor Kidrôn, nanê̆ ngăn may mra khĭt. Mham may mra nkhŭt tay ta klơ bôk may.”

³⁸ Y-Simei lah ma hađăch: “Nau may lah jêng di ueh ngăn, hađăch jêng kôranh gâp, moh nau may ntĭm nti oh mon may mra ƀư nau nĕ.” Pônây Y-Sêmei gŭ jŏ nar ta Yêrusalem.

³⁹ Ƀiălah pe năm pakơi, geh bar hê phung oh mon Y-Simei nchuăt du rlet ta ngih Y-Akis, kon Y-Maka, hađăch phung Gat. Bu mbơh ma Y-Simei pô aơ: “Ri, bar hê bunuyh oh mon may gŭ ta Gat.”

⁴⁰ Y-Simei dâk ro, dăp ưn seh bri jêh ri hăn tât ta Gat mâp Y-Akis gay joi bar hê bunuyh oh mon păng. Y-Simei hăn jêh ri djôt phung oh mon păng plơ̆ sĭt tă bơh Gat.

⁴¹ Bu nkoch ma Y-Salômôn pô aơ Y-Simei luh jêh tă bơh Yêrusalem hăn rlet ma Gat jêh nây plơ̆ sĭt.

⁴² Hađăch prơh bu hăn kuăl Y-Simei tât jêh ri lah ma păng: “Mâu di hĕ gâp hŏ đă may sŏk amoh Brah Yêhôva gay sơm ton jêh ri ntĭnh lor ma may: ‘Moh nar may luh bơh ta aơ jêh ri hăn ta aơ ta ri, nanê̆ ngăn may mra khĭt?’ Jêh ri may hŏ lah ma gâp pô aơ: ‘Nau hađăch lah di ueh ngăn.’

⁴³ Pônây, mâm dĭng may mâu djôt prăp nau may hŏ sŏk amoh Brah Yêhôva gay sơm ton, jêh ri nau gâp hŏ ntrŭnh jêh ma may?”

⁴⁴ Hađăch ngơi tay ma Y-Simei: “May hŏ gĭt jêh ri nuih n'hâm may rah vah jêh lĕ nau djơh may hŏ ƀư ma Y-Đavit, mbơ̆ gâp. Pônây Brah Yêhôva mra ƀư ăn nau djơh may nkhŭt tay ta klơ bôk may.

⁴⁵ Ƀiălah hađăch Salômôn mra geh nau ueh uĭn, jêh ri sưng hađăch Đavit mra dơi njêng nâp tanăp măt Brah Yêhôva kŏ tât ƀaƀơ n'ho ro.”

⁴⁶ Jêh nây hađăch ntrŭnh nau lah ma Y-Bênaya, kon bu klâu Y-Jêhôida, hăn lơh jêh ri nkhĭt lơi Y-Simei. Pônây, ƀon bri hađăch jêng nâp tâm ti Y-Salômôn.