I Phung Hađăch 19 - Nau Brah Ndu Ngơi 2023

Y-Êli nchuăt du tâm bri rdah

¹ Y-Ahap nkoch ma H'Jêsêbel lĕ nau Y-Êli hŏ ƀư, nđâp ma nau păng sŏk đao nkhĭt lĕ rngôch nơm mbơh lor Baal.

² H'Jêsêbel prơh du huê bunuyh hăn mâp Y-Êli jêh ri lah: “Tơlah ta mông aơ tâm nar ôi taơ, gâp mâu geh ƀư ôh ma nau rêh may nâm bu nau rêh du huê tâm phung kôranh nơm may hŏ nkhĭt, dăn phung brah rmal gâp jâk ngăn.”

³ Y-Êli klach jêh ri dâk nchuăt du gay tâm rklaih nau rêh păng nơm. Tât ta Bêr-Sêba tâm n'gor Yuđa, păng ăn oh mon păng gŭ ta aơ.

⁴ Bi păng hăn trong du nar đŏng lăp tâm bri rdah. Păng gŭ tâm dâng du tơm si n'ho toyh jêh ri mbơh sơm dăn ma păng khĭt: “Hơi Kôranh Brah! Lĕ găp jêh. Dăn ma May nglôch lơi nau rêh gâp, yorlah gâp mâu jêng ueh lơn ôh đah phung chô yau gâp.”

⁵ Jêh nây păng lâng săk bê̆ch tâm dâng tơm si n'ho toyh nây. Geh du huê tông mpăr pah ta păng jêh ri lah: “Dâk hom jêh ri sa.”

⁶ Păng uănh saơ mpeh klơ bôk păng geh du glo ƀănh jê̆ lĕ gŭch sĭn jêh ta klơ ŭnh rnga, jêh ri du nông dak. Sông sa nhêt lôch jêh, păng bê̆ch tay đŏng.

⁷ Tông mpăr Brah Yêhôva văch tơ̆ bar, pah ta săk păng jêh ri lah: “Dâk hom jêh ri sa ntop đŏng, yorlah trong hăn hôm e ngai ngăn ma may.” Păng kah rngăl jêh ri sông sa nhêt,

⁸ jêh nây tă bơh ndơ sông sa nây, păng geh nau ktang gay hăn puăn jât nar jêh ri puăn jât năng tât ta Hôrep, jêng yôk Brah Ndu.

⁹ Tât ta nây, păng lăp tâm trôm lŭ jêh ri bê̆ch măng ta nây. Geh nau Brah Yêhôva lah ma păng: “Hơi Y-Êli, moh nau may dôl ƀư ta aơ?”

¹⁰ Păng plơ̆ lah: “Gâp khŏm nsrôih ngăn ma Yêhôva Brah Ndu ma phung tahan. Yorlah phung ƀon lan Israel lĕ chalơi jêh nau tâm rnglăp đah May, ƀư rai lĕ nơng ƀư brah May, sŏk đao nkhĭt lơi phung nơm mbơh lor May; knŏng êng du huê gâp hôm e klen, jêh ri khân păng dôl tĭng joi gay nglôch lơi nau rêh gâp.”

Y-Êli tâm mâp Brah Ndu ta Hôrep

¹¹ Brah Yêhôva lah ma păng: “Hăn luh hom, dâk ta klơ yôk panăp Brah Yêhôva.” Ri, Brah Yêhôva mra prot rgăn; geh sial khôm ktang ngăn, kŏ tât rlâm đang yôk jêh ri ƀư nchah lĕ lŭ tanăp măt Brah Yêhôva, ƀiălah mâu geh Brah Yêhôva gŭ tâm sial nây ôh. Jêh sial nây, geh nau n'găr neh ntu, ƀiălah mâu geh Brah Yêhôva gŭ tâm nau n'găr neh ntu nây ôh.

¹² Jêh nau n'găr neh ntu, geh ŭnh hâng, ƀiălah mâu đŏng geh Brah Yêhôva gŭ tâm ŭnh hâng nây. Lôch jêh ŭnh hâng, geh bâr nteh djê̆ djê̆.

¹³ Tơlah tăng bâr nteh nây, Y-Êli sŏk ao jâr nkŭm ndâp muh măt păng nơm, luh dâk ta bâr trôm nây. Nôk nây, geh bâr ngơi đah păng: “Hơi Y-Êli, moh nau may dôl ƀư ta aơ?”

¹⁴ Păng plơ̆ lah: “Gâp khŏm nsrôih ngăn ma Yêhôva Brah Ndu ma phung tahan. Yorlah phung ƀon lan Israel lĕ chalơi jêh nau tâm rnglăp đah May, ƀư rai lĕ nơng ƀư brah May, jêh ri sŏk đao nkhĭt lơi phung nơm mbơh lor May; knŏng êng du huê gâp hôm e klen, jêh ri khân păng dôl tĭng joi gay nglôch lơi nau rêh gâp.”

¹⁵ Ƀiălah Brah Yêhôva lah ma păng: “Hăn hom tĭng nâm trong tâm bri rdah hăn tât ta Damas. Tơlah may tât ta ntŭk nây, may mra tŏ dak ƀâu kah ma Y-Hasael jêng hađăch n'gor Aram;

¹⁶ may mra tŏ dak ƀâu kah ma Y-Jêhu đŏng, kon bu klâu Y-Nimsi, ƀư hađăch phung Israel; jêh ri may mra tŏ dak ƀâu kah ma Y-Êlisê, kon bu klâu Y-Saphat, ta Abel-Mêhôla, ƀư nơm mbơh lor ntrok ma may.

¹⁷ Mbu nơm klaih bơh đao Y-Hasael, Y-Jêhu mra nkhĭt păng, mbu nơm klaih bơh đao Y-Jêhu, Y-Êlisê mra nkhĭt păng.

¹⁸ Ƀiălah tâm n'gor Israel, Gâp hŏ prăp ma Gâp pơh rbăn nuyh mâu geh mâp chon ôh kômâk panăp brah Baal, jêh ri trôm mbung khân păng mâu mâp chŭm ôh păng.”

Nau Brah Yêhôva kuăl Y-Êlisê

¹⁹ Ntơm bơh nây, Y-Êli luh hăn jêh ri saơ Y-Êlisê, kon bu klâu Y-Saphat, dôl kai mir. Geh jât ma bar gu ndrôk dôl kai panăp Y-Êlisê, jêh ri păng nơm djôt gu ndrôk rơh jât ma bar. Y-Êli hăn rgăn jêh ri mƀăr ao jâr păng nơm ta klơ Y-Êlisê.

²⁰ Y-Êlisê chalơi ro gu ndrôk, nchuăt tĭng ndô̆ Y-Êli jêh ri lah: “Ăn gâp chŭm mê̆ mbơ̆ gâp jêh ri mơ gâp tĭng ndô̆ may.” Y-Êli plơ̆ lah: “Hăn hom, jêh nây plơ̆ tay. Moh ntil nau gâp ƀư ma may?”

²¹ Luh bơh Y-Êli, Y-Êlisê hăn sĭt ngih păng gay nhŭp du gu ndrôk sreh khân păng, jêh ri sŏk kai ƀư long gay gâm puăch ăn lĕ rngôch bunuyh sa. Jêh nây Y-Êlisê dâk hăn tĭng ndô̆ Y-Êli jêh ri pah kan ma păng.