I Phung Hađăch 18 - Nau Brah Ndu Ngơi 2023

Y-Êli jêh ri puăn rhiăng prăm jât nơm mbơh lor Baal

¹ Lôch jêh năng nar jŏ jong, geh nau Brah Yêhôva ngơi ma Y-Êli tâm năm prăng phang rơh pe pô aơ: “Hăn hom mâp đah Y-Ahap, Gâp mra ƀư ăn trôk mih tŭp ta neh ntu.”

² Y-Êli hăn tâm mâp đah Y-Ahap. Rnôk nây, ta Samari geh nau ji ngot toyh hâu ngăn.

³ Y-Ahap kuăl Y-Apdia, kôranh chiă uănh ngih păng. (Y-Apdia klach yơk ngăn ma Brah Yêhôva.

⁴ Tơlah H'Jêsêbel nkhĭt phung nơm mbơh lor Brah Yêhôva, Y-Apdia sŏk djôt du rhiăng nuyh nơm mbơh lor pôn tâm bar trôm lŭ, ăp trôm prăm jât bunuyh, sŏk piăng let jêh ri dak nhêt siăm ma khân păng).

⁵ Y-Ahap lah ma Y-Apdia pô aơ: “Hăn hom lam tâm n'gor, uănh lĕ rngôch tu dak jêh ri n'hor dak, klăp lah he mra dơi joi gơ̆ nse gay ăn ma seh jêh ri seh bri; tơlah mâu, mpô mpa rong gâp mra khĭt lĕ?”

⁶ Bar hê khân păng tâm pă hăn lam n'gor. Y-Ahap hăn êng păng mpeh aơ, bi Y-Apdia hăn êng păng mpeh ri.

⁷ Y-Apdia hăn rŏ trong, tâm mâp đah Y-Êli văch chuă păng. Y-Apdia gĭt năl Y-Êli, chon mon tanăp măt păng jêh ri ôp: “Di lĕ may jêng Y-Êli, kôranh gâp?”

⁸ Păng plơ̆ lah: “Di ngăn, gâp yơh aơ. Hăn mbơh hom ma kôranh may pô aơ: ‘Y-Êli dôl gŭ ta aơ.’”

⁹ Y-Apdia lah: “Moh nau tih gâp geh dĭng may jao oh mon may tâm ti Y-Ahap gay păng nkhĭt lơi gâp?

¹⁰ Gâp ton tâm amoh Yêhôva Brah Ndu may gŭ rêh mro mrăng, kôranh gâp đă lĕ rngôch ƀon lan, lĕ bri dak hăn gay joi may. Jêh ri tơlah bu plơ̆ lah pô aơ: ‘Y-Êli mâu geh ta nây ôh,’ pôri hađăch ăn ƀon bri hađăch nây jêh ri ƀon lan nây ton săk khân păng mâu prot geh tâm mâp ôh đah may.

¹¹ Ƀiălah aƀaơ may đă tay oh mon may hăn lah ma hađăch pô aơ: ‘Y-Êli dôl gŭ ta aơ.’

¹² Tơlah gâp du jêh tă bơh may, Huêng Brah Yêhôva mra djôt leo may hăn moh ntŭk gâp mâu gĭt ôh. Pôri, tơlah gâp nkoch tay ma Y-Ahap, jêh ri hađăch mâu saơ ôh may, nanê̆ păng mra nkhĭt lơi gâp. Oh mon may klach yơk ma Brah Yêhôva ntơm bơh hôm kon se jê̆.

¹³ Tơlah H'Jêsêbel nkhĭt phung nơm mbơh lor Brah Yêhôva, gâp hŏ leo pôn jêh du rhiăng nuyh nơm mbơh lor Brah Yêhôva tâm bar trôm lŭ, ăp trôm prăm jât nuyh, djôt leo piăng let jêh ri dak nhêt gay siăm ma khân păng. Mâu hĕ bu nkoch nau nây ma kôranh gâp gĭt lĕ?

¹⁴ Pônây aƀaơ aơ may lah gâp hăn gay nkoch ma hađăch pô aơ: ‘Y-Êli dôl gŭ ta aơ,’ nanê̆ păng mra nkhĭt gâp.”

¹⁵ Y-Êli plơ̆ lah: “Gâp sŏk amoh Brah Yêhôva ma phung tahan gŭ rêh mro mrăng, jêng Nơm gâp pah kan, gay sơm ton pô aơ: Nar aơ gâp mra hăn tâm mâp đah Y-Ahap.”

¹⁶ Pônây, Y-Apdia hăn chuă vơt Y-Ahap jêh ri mbơh ma păng gĭt. Y-Ahap hăn ro chuă vơt Y-Êli.

¹⁷ Tơlah Y-Ahap saơ Y-Êli, Y-Ahap ngơi đah păng: “Di lĕ may jêng nơm ƀư rkhŭk phung Israel?”

¹⁸ Păng plơ̆ sĭt lah: “Mâu di ôh gâp ƀư rkhŭk phung Israel, ƀiălah may nơm jêh ri ngih mbơ̆ may yơh rkhŭk. Yorlah may chalơi jêh nau vay Brah Yêhôva ntăm gay hăn tĭng brah Baal.

¹⁹ Pônây aƀaơ, may prơh hom bunuyh hăn kuăl rgum lĕ rngôch phung Israel tât ma gâp ta klơ yôk Karmel, ndrel ma puăn rhiăng prăm jât nuyh nơm mbơh lor Baal, jêh ri puăn rhiăng nuyh nơm mbơh lor Asêra, jêng phung sông sa ta sưng sông H'Jêsêbel.”

Y-Êli dơi ma phung nơm mbơh lor Baal

²⁰ Hađăch Ahap prơh bunuyh hăn kuăl rgum lĕ rngôch bunuyh ƀon lan Israel jêh ri phung nơm mbơh lor tât ta yôk Karmel.

²¹ Y-Êli văch tât lor panăp phung ƀon lan jêh ri lah: “Khân may tâm nchrĭng hăn bar mbor kŏ tât ndah jŏ? Tơlah Brah Yêhôva jêng Brah Ndu, tĭng ndô̆ hom Păng; bi tơlah Baal jêng Brah Ndu, tĭng ndô̆ hom păng rĭ.” Ƀiălah phung ƀon lan mâu ngơi.

²² Nôk nây, Y-Êli ngơi ma phung ƀon lan: “Tâm phung nơm mbơh lor Brah Yêhôva, Gâp, knŏng du huê gâp, bi phung nơm mbơh lor brah Baal geh puăn rhiăng prăm jât bunuyh.

²³ Djôt leo hom văch ta aơ bar mlâm ndrôk nkuăng; ăn khân păng săch du mlâm ndrôk nkuăng ma khân păng nơm, jêh ri tah ăn âk glo, bun klơ long, ƀiălah lơi ta ăn ŭnh ôh ta nây. Bi gâp, gâp mra tah puăch ndrôk nguay ri, dơm păng klơ long, mâu đŏng ăn ŭnh ta nây.

²⁴ Jêh ma nây, kuăl mbơh sơm hom amoh brah khân may! Bi gâp, gâp mra kuăl Brah Yêhôva. Mbu brah plơ̆ sĭt lah ma ŭnh, păng nây yơh jêng Brah Ndu.” Lĕ rngôch phung ƀon lan plơ̆ lah da dê: “Nau ngơi nây di ngăn jêh.”

²⁵ Y-Êli ngơi lah ma phung nơm mbơh lor Baal: “Săch hom du mlâm ndrôk nkuăng jêh ri sreh păng lor, yorlah khân may jêng âk. Jêh nây kuăl amoh brah khân may, ƀiălah lơi ta ăn ŭnh ôh ta nây.”

²⁶ Khân păng sŏk ndrôk nkuăng bu ăn ma khân păng jêh ri sreh. Jêh nây ntơm bơh ơm ôi tât nklang bôk nar, khân păng kuăl amoh brah Baal pô aơ: “Hơi brah Baal! Dăn plơ̆ lah ma hên.” Ƀiălah mâu geh bâr ngơi ôh, mâu đŏng geh nau plơ̆ lah. Khân păng pâl ntalơ̆ văr jŭm nơng ƀư brah khân păng hŏ ndâk jêh.

²⁷ Ta nklang bôk nar, Y-Êli mưch ma khân păng pô aơ: “Nter ăn huy hom, yorlah Baal jêng du huê brah! Klăp lah brah hôm dôl gŭ mĭn, mâu lah păng hôm e ngai, mâu lah dôl hăn njŏ trong, mâu lah păng hôm e bê̆ch jêh ri pônây rlay hom păng!”

²⁸ Khân păng nter huy ngăn jêh ri sŏk đao tak rek săk jăn khân păng nơm kŏ tât luh mham tĭng nâm nau vay khân păng.

²⁹ Tơlah nar vet jêh, khân păng ăt om lah thăm rmat tâm ban pônây kŏ tât mông nhhơr ndơ ƀư brah rnih môi kêng mhaơ. Ƀiălah mâu saơ tăng ôh bâr ngơi, mâu geh đŏng nơm plơ̆ lah tay, mâu geh đŏng ôh du huê brah sâm mĭn rvê an.

³⁰ Nôk nây, Y-Êli lah ma lĕ rngôch phung ƀon lan: “Văch hom êp gâp.” Lĕ rngôch phung ƀon lan hăn êp păng. Jêh nây Y-Êli nkra tay nơng ƀư brah Brah Yêhôva lĕ rlâm.

³¹ Y-Êli sŏk jât ma bar mlâm lŭ, tĭng nâm rnoh jât ma bar ndŭl mpôl phung kon bu klâu Y-Yakôb, jêng nơm Brah Yêhôva hŏ ngơi pô aơ: “Y-Israel mra jêng amoh săk may.”

³² Păng dŏng jât ma bar mlâm lŭ nây ndâk njêng du mlâm nơng ƀư brah tâm amoh Brah Yêhôva. Ta văr jŭm nơng ƀư brah, păng kuyh du n'hor huy dơi dơm jât mprăm lit găr ntil.

³³ Jêh nây păng bun long, tah ndrôk jêng âk glo jêh ri dơm ta klơ long. Păng lah:

³⁴ “Bâk hom bêng puăn yăng dak, jêh ri djôt leo nkhŭt dak ta klơ ndơ ƀư brah gŭch jêh ri ta long nây.” Păng lah tay: “Ƀư hom tơ̆ tal bar,” pôri khân păng ƀư tay tơ̆ tal bar. Păng lah tay: “Ƀư hom tơ̆ tal pe đŏng,” jêh ri khân păng ƀư tay tơ̆ tal pe.

³⁵ Dak lêng văr jŭm nơng ƀư brah kŏ tât bêng lĕ n'hor nây đŏng.

³⁶ Tât jêh mông nhhơr ndơ ƀư brah rnih môi kêng mhaơ, nơm mbơh lor Y-Êli văch dăch jêh ri mbơh sơm pô aơ: “Hơi Yêhôva Brah Ndu Y-Abraham, Y-Isăk jêh ri Y-Israel. Nar aơ ăn lĕ rngôch bunuyh gĭt pô aơ tâm phung Israel May jêng Brah Ndu, gâp jêng oh mon May, jêh ri gâp tông bâr May gay ƀư lĕ rngôch nau aơ.

³⁷ Hơi Brah Yêhôva! Dăn dơn nau gâp, dăn plơ̆ lah ma gâp, gay ma phung ƀon lan aơ dơi gĭt ngăn Brah Yêhôva jêng Brah Ndu, jêh ri May ƀư ăn nuih n'hâm khân păng plơ̆ sĭt tay đŏng.”

³⁸ Ŭnh Brah Yêhôva trŭnh bơh klơ, su ndơ ƀư brah gŭch, long, lŭ, ndruyh neh, jêh ri djrêp lơi dak tâm n'hor.

³⁹ Saơ nau nây, lĕ rngôch phung ƀon lan chon mon tâm neh jêh ri nter lah: “Brah Yêhôva jêng Brah Ndu! Brah Yêhôva jêng Brah Ndu!”

⁴⁰ Y-Êli lah ma phung ƀon lan: “Nhŭp hom phung nơm mbơh lor Baal, lơi ăn du huê dơi klaih ôh.” Khân păng nhŭp ro khân păng. Y-Êli djôt leo khân păng tât ta n'hor dak Kisôn jêh ri nkhĭt lơi khân păng ta nây.

Nau prăng phang lôch jêh

⁴¹ Y-Êli lah ma Y-Ahap: “Jă hađăch hăn hao jêh ri sông sa nhêt, yorlah gâp lĕ tăng jêh nteh tŭp mih.”

⁴² Hađăch Ahap hăn hao sông sa nhêt. Ƀiălah Y-Êli hăn hao ta klơ n'gơn yôk Karmel, chon mon ta neh jêh ri nkŭp muh măt păng nơm vah vang bar đah kômâk păng.

⁴³ Jêh nây păng lah đah oh mon păng nơm: “Hăn hao hom, uănh mpeh dak mƀŭt.” Nơm oh mon nây hăn hao n'gơr uănh, jêh nây lah: “Mâu geh ndô ndơ ôh.” Y-Êli lah tay: “Hăn hom plơ̆ tay pơh tơ̆ nâm bu pônây.”

⁴⁴ Kŏ tât tơ̆ rơh pơh, nơm oh mon nây lah: “Ri, ntơm bơh mpeh dak mƀŭt geh du ndâr tŭk jê̆ luh tâm ban mpang ti.” Y-Êli lah tay: “Hăn hom lah ma Y-Ahap pô aơ: ‘Nkra ndeh seh hađăch jêh ri hăn trŭnh hom, klach lah mih ban may.’”

⁴⁵ Tâm ƀât lât, trôk geh ndâr tŭk nkŭm krăk kher, sial khôm rpuh, jêh ri geh mih toyh ngăn. Y-Ahap sĭt ndal ma ndeh seh păng tât ta Jesrêel.

⁴⁶ Ti Brah Yêhôva gŭ ta Y-Êli; păng rêt rse bŭt păng jêh ri nchuăt panăp ndeh seh Y-Ahap kŏ tât lăp ta ƀon Jesrêel.