I Phung Hađăch 17 - Nau Brah Ndu Ngơi 2023

Y-Êli gŭ êp n'hor dak Kêrit

¹ Y-Êli, bunuyh Tisbê, jêng du huê tâm phung gŭ njưh tâm n'gor Gilêat, lah ma Y-Ahap pô aơ: “Gâp dâk panăp Brah Yêhôva jêng Brah Ndu gŭ rêh mro mrăng ma phung Israel gay sơm ton pô aơ: Tâm âk năm jêh aơ, tơlah mâu geh nau gâp ngơi, mâu mra geh dak ngom, mâu đŏng geh tŭp mih.”

² Jêh nây geh nau Brah Yêhôva ngơi ma Y-Êli:

³ “Du hom tă bơh ntŭk nây, hăn tât ta mpeh luh nar jêh ri gŭ krap ta n'hor dak Kêrit, mpeh luh nar dak krong Yurdan.

⁴ May mra nhêt dak n'hor nây, jêh ri Gâp hŏ ntĭnh jêh ma nđak siăm may ta nây.”

⁵ Y-Êli luh hăn jêh ri ƀư tĭng nâm nau Brah Yêhôva ngơi. Păng hăn gŭ ta n'hor dak Kêrit, mpeh luh nar dak krong Yurdan.

⁶ Ăp kêng ôi jêh ri kêng mhaơ, nđak gleng piăng let jêh ri puăch tât ma păng, jêh ri păng nhêt dak n'hor.

⁷ Ƀiălah jêh ma nây n'hor dak lĕ suăt jêh, yorlah mâu geh ôh dak mih tâm n'gor nây.

Y-Êli gŭ ta ngih bu ur ndrô tâm n'gor Sarepta

⁸ Nôk nây, geh nau Brah Yêhôva ngơi ma Y-Êli:

⁹ “Hăn hom gơnh tât ma Sarepta jêng tâm ƀon Sidôn, jêh ri gŭ ta nây. Ri Gâp hŏ ntĭnh jêh ma du huê bu ur ndrô gŭ tâm ƀon nây ăn ndơ sa ma may.”

¹⁰ Pônây, păng hăn trong tât ta Sarepta. Tơlah păng tât jêh êp mpông ƀon, păng saơ du huê bu ur ndrô dôl dônh long, păng kuăl păng jêh ri lah: “Djôt leo ăn gâp djê̆ dak tâm yăng gay ma gâp nhêt.”

¹¹ Bu ur nây dôl hăn sŏk dak. Ƀiălah păng kuăl tay păng jêh ri lah: “Djôt leo ma gâp du glo piăng let đŏng.”

¹² Bu ur ndrô plơ̆ lah: “Gâp sŏk amoh Yêhôva Brah Ndu may gŭ rêh mro mrăng gay sơm ton, gâp mâu geh piăng let ôh, knŏng hôm e du mbăt rnih môi tâm yăng jêh ri hôm djê̆ lê̆ dak ngi ôlive tâm nông. Aơ, gâp dônh bar n'gĭng long, jêh nây nkra ndơ nây ma gâp jêh ri ma kon bu klâu gâp; lah sa lôch jêh, hên mra khĭt.”

¹³ Ƀiălah Y-Êli lah: “Lơi klach ôh, plơ̆ sĭt hom ƀư di tĭng nâm nau ay lah jêh. Ƀiălah lor lơn, sŏk hom rnih môi nây ƀư du glo piăng let jê̆ jêh nây djôt leo păng tât ma gâp. Jêh nau nây, ƀư hom piăng let ma ay nơm jêh ri kon bu klâu ay.

¹⁴ Yorlah Yêhôva Brah Ndu phung Israel lah: ‘Rnih muy mâu mra lĕ ôh tâm yăng jêh ri dak ngi ôlive mâu mra pưt tâm nông, kŏ tât ta nar Brah Yêhôva ăn dak mih ta neh ntu.’”

¹⁵ Păng hăn jêh ri ƀư tĭng nâm nau Y-Êli hŏ lah. Păng nđâp Y-Êli jêh ri kon păng geh tŏng ndơ sa tâm âk nar.

¹⁶ Rnih muy mâu lĕ ôh tâm yăng, dak ngi ôlive mâu pưt ôh tâm nông, di nâm nau Brah Yêhôva ngơi jêh ma Y-Êli.

Y-Êli ƀư ăn kon bu klâu bu ur ndrô dâk rêh tay

¹⁷ Jŏ djê̆ pakơi, kon bu klâu bu ur ndrô, jêng nơm tơm ngih nây, ji. Nau ji jêng jâk glăm ngăn kŏ tât mâu hôm blau nsôr n'hâm ôh.

¹⁸ Bu ur nây lah ma Y-Êli: “Hơi bunuyh Brah Ndu, moh nau gâp ƀư rsuak ma may? Di lĕ may hŏ văch tât ma ngih gâp gay ŭch nkah tay lĕ nau tih gâp jêh ri ƀư ăn kon bu klâu gâp khĭt?”

¹⁹ Y-Êli lah ma păng: “Jao hom kon bu klâu ay ma gâp.” Păng chông kon se tă bơh ti me păng, leo hao jrô prêh klơ ntŭk păng gŭ, jêh ri dơm păng lâng ta sưng bê̆ch păng.

²⁰ Jêh nây păng kuăl mbơh sơm ma Brah Yêhôva pô aơ: “Hơi Yêhôva Brah Ndu gâp! Mâm dĭng May ăn nau rêh ni ma bu ur ndrô aơ jêng nơm ngih, ntŭk ma gâp gŭ njơh, gay kon bu klâu păng khĭt?”

²¹ Păng dop săk păng ta klơ kon se nây pe tơ̆ jêh ri kuăl mbơh sơm ma Brah Yêhôva: “Hơi Yêhôva Brah Ndu gâp! Dăn ma Kôranh Brah ƀư ăn n'hâm rêh kon se aơ plơ̆ sĭt tay tâm păng.”

²² Brah Yêhôva dơn nau Y-Êli, n'hâm rêh kon se plơ̆ sĭt tay đah păng jêh ri păng dâk rêh tay.

²³ Y-Êli chông kon se tă bơh jrô prêh klơ, trŭnh ta ngih tâm dâng, jao păng ma mê̆ păng jêh ri lah: “Uănh hom, kon ay hôm rêh!”

²⁴ Bu ur nây lah ma Y-Êli: “Aƀaơ aơ gâp gĭt ngăn ma may jêng bunuyh Brah Ndu, jêh ri nau Brah Yêhôva ngơi tâm trôm mbung may jêng nau nanê̆ ngăn.”