I Phung Hađăch 16 - Nau Brah Ndu Ngơi 2023

Y-Jêhu mbơh lor nau rai lôch ngih Y-Baêsa

¹ Rnôk nây, geh nau ngơi Brah Yêhôva nduyh ma Y-Baêsa, đă Y-Jêhu, kon bu klâu Y-Hanani, lah pô aơ:

² “Gâp hŏ n'hao jêh may bơh ndruyh neh jêh ri njêng may ƀư kôranh chiă uănh phung Israel, phung ƀon lan Gâp. Ƀiălah may hŏ hăn tĭng nâm trong Y-Jêrôbôam, nsŭk jêh ma phung ƀon lan Israel ƀư tih, jêh ri yorlah nau tih nây, khân păng nsônh nau Gâp ji nuih.

³ Yor ri, Gâp mra pih kloh Y-Baêsa jêh ri ngih păng, ƀư ma ngih may nâm bu ngih Y-Jêrôbôam, kon bu klâu Y-Nêbat.

⁴ Mbu nơm jêng bunuyh ngih Y-Baêsa khĭt tâm ƀon, so mra sa, bi mbu moh khĭt tâm mir, sĭm klơ trôk mra sa.”

⁵ Lĕ nau kan êng Y-Baêsa, lĕ nau kan hađăch hŏ ƀư, jêh ri nau ktang hađăch bu hŏ nchih da dê tâm ndrom samƀŭt nau rêh jêng phung hađăch Israel.

⁶ Y-Baêsa khĭt hăn gŭ n'hanh phung chô yau păng jêh ri bu tâp păng tâm Tirsa. Kon bu klâu hađăch jêng Y-Êla gŭ ta sưng hađăch chiă uănh thoi ntrok păng.

⁷ Tâm ban pônây, Brah Yêhôva ngơi ma nơm mbơh lor Y-Jêhu, kon bu klâu Y-Hanani, nduyh đah Y-Baêsa jêh ri ngih păng, yorlah lĕ nau tih hađăch hŏ ƀư tanăp măt Brah Yêhôva, sŏk nau kan ti păng hŏ ƀư gay nsônh nau ji nuih ma Păng, tâm ban ma ngih Y-Jêrôbôam, nđâp lah hađăch ƀư rai jêh ngih nây.

Y-Êla ƀư hađăch Israel

⁸ Năm rơh bar jât ma prao nôk rô̆ Y-Asa hađăch Yuđa chiă uănh, Y-Êla, kon bu klâu Y-Baêsa, ƀư hađăch Israel ta Tirsa, jêh ri chiă uănh bar năm.

⁹ Ƀiălah Y-Simri, oh mon Y-Êla, jêng kôranh chiă uănh toyh du n'gul lĕ rngôch ndeh seh, tâm chră tâm rdâng đah hađăch. Tâm dôl Y-Êla nhêt ndrănh jêh ri nhŭl tâm ngih Y-Arsa, nơm jêng kôranh chiă uănh ngih hađăch ta ƀon Tirsa,

¹⁰ Y-Simri hăn lăp nkhĭt lơi Y-Êla jêh ri pit sŏk sưng hađăch; nĕ jêng năm bar jât ma pơh nôk rô̆ Y-Asa, hađăch Yuđa chiă uănh.

¹¹ Mhe gŭ ta sưng hađăch, Y-Simri nkhĭt lĕ rngôch ngih Y-Baêsa, mâu hôm om ôh du huê bu klâu, nđâp lah phung mpôl băl mâu lah mĭt jiăng păng.

¹² Y-Simri hŏ ƀư rai lơi lĕ ngih Y-Baêsa, di nâm nau Brah Yêhôva hŏ ngơi jêh ma bâr mbung nơm mbơh lor Y-Jêhu nduyh đah Y-Baêsa,

¹³ yor ma lĕ nau tih Y-Baêsa jêh ri Y-Êla kon hađăch hŏ ƀư tih jêh, jêng nau leo ma phung Israel ƀư tih, nsônh Yêhôva Brah Ndu phung Israel ji nuih ma rup brah khân păng.

¹⁴ Lĕ kan êng Y-Êla jêh ri lĕ rngôch nau kan hađăch hŏ ƀư, bu hŏ nchih da dê tâm ndrom samƀŭt nau rêh jêng phung hađăch Israel.

Y-Simri ƀư hađăch Israel

¹⁵ Tâm năm rơh bar jât ma pơh nôk rô̆ Y-Asa, hađăch Yuđa chiă uănh, Y-Simri gŭ ta sưng hađăch, ƀư hađăch pơh nar ta Tirsa. Nôk nây, phung tahan Israel dôl nchueng jŭm Gibêthôn, du ƀon phung Philistin.

¹⁶ Dôl phung tahan nchueng ƀon geh tăng nau bu lah: “Y-Simri lĕ tâm rdâng jêh ri nkhĭt hađăch.” Yor nây lĕ rngôch phung Israel ndrel păng tâm pôih nây njêng Y-Ômri, jêng kôranh ma phung tahan jêh ri jêng hađăch phung Israel.

¹⁷ Y-Ômri jêh ri lĕ rngôch phung Israel hăn hao tă bơh Gibêthôn gay nchueng Tirsa.

¹⁸ Tơlah Y-Simri lĕ saơ jêh bu nchueng jŭm ƀon, păng lăp tâm trôm pôih nâp ngih hađăch, su lơi ngih hađăch ma ŭnh jêh ri păng khĭt ŭnh sa tâm nây.

¹⁹ Nây jêng yor lĕ nau tih Y-Simri hŏ ƀư tih, ƀư nau mhĭk tanăp măt Brah Yêhôva, hăn tĭng ndô̆ trong Y-Jêrôbôam, jêh ri hŏ ƀư tih jêh tâm ban ma Y-Jêrôbôam hŏ ƀư tih, jêng nau leo ma phung Israel ƀư tih.

²⁰ Lĕ kan êng Y-Simri jêh ri nau tâm rdâng păng, bu hŏ nchih da dê tâm ndrom samƀŭt nau rêh jêng phung hađăch Israel.

Y-Ômri ƀư hađăch Israel

²¹ Nôk nây, phung ƀon lan Israel tâm pă bar phung: du n'gul tĭng ndô̆ Y-Tipni, kon bu klâu Y-Ginat, jêh ri ŭch njêng păng jêng hađăch; du n'gul ri tĭng ndô̆ Y-Ômri.

²² Ƀiălah phung ƀon lan tĭng ndô̆ Y-Ômri dơi lơn đah phung ƀon lan tĭng ndô̆ Y-Tipni, kon bu klâu Y-Ginat. Pônây Y-Tipni khĭt jêh ri Y-Ômri chiă uănh.

²³ Tâm năm rơh pe jât ma nguay nôk rô̆ Y-Asa, hađăch Yuđa, Y-Ômri ƀư hađăch Israel jêh ri chiă uănh jât ma bar năm; hađăch chiă uănh prao năm ta Tirsa.

Ƀon mhe Samari

²⁴ Păng rvăt gôl yôk Samari bơh Y-Sêmer rnoh prao jât kilô prăk. Ta klơ gôl yôk nây, hađăch ndâk ƀon, ntơ amoh jêng Samari, tĭng nâm amoh nơm tơm gôl nây jêng Y-Sêmer.

²⁵ Y-Ômri ƀư nau mhĭk tanăp măt Brah Yêhôva, jêh ri hôm ƀư nau mhĭk rlau lơn ma lĕ phung lor panăp păng.

²⁶ Tâm lĕ rngôch nau, hađăch hăn tĭng ndô̆ trong Y-Jêrôbôam, kon bu klâu Y-Nêbat, ƀư tih nâm bu Y-Jêrôbôam hŏ ƀư tih, jêh ri tâm nau tih păng ƀư nsŭk jêh ma phung Israel, nsônh ăn Yêhôva Brah Ndu Israel ji nuih yor rup brah khân păng.

²⁷ Lĕ kan êng Y-Ômri, lĕ nau kan hađăch hŏ ƀư, jêh ri nau ktang hađăch bu hŏ nchih da dê jêh tâm ndrom samƀŭt nau rêh jêng phung hađăch Israel.

²⁸ Y-Ômri khĭt hăn gŭ n'hanh phung chô yau păng jêh ri bu tâp păng ta Samari. Kon bu klâu hađăch jêng Y-Ahap gŭ ta sưng hađăch chiă uănh ntrok păng.

Y-Ahap ƀư hađăch Israel

²⁹ Tâm năm rơh pe jât ma pham nôk rô̆ Y-Asa, hađăch Yuđa chiă uănh, Y-Ahap, kon bu klâu Y-Ômri gŭ ta sưng hađăch phung Israel. Hađăch chiă uănh phung Israel bar jât ma bar năm ta Samari.

³⁰ Y-Ahap, kon bu klâu Y-Ômri, ƀư nau mhĭk tanăp măt Brah Yêhôva rlau lơn ma phung hađăch lor panăp păng.

Y-Ahap sŏk H'Jêsêbel jêh ri mbah brah Baal

³¹ Hađăch tĭng kơt nau tih bơh Y-Jêrôbôam, kon bu klâu Y-Nêbat, jêng nau jê̆ dơm, yor nây păng hŏ nsông kon bu ur Y-Êtbaal, hađăch phung Sidôn, jêng H'Jêsêbel ƀư ur păng. Hađăch pah kan đŏng jêh ri yơk mbah ma brah Baal.

³² Hađăch ndâk nơng ƀư brah ma brah Baal tâm ntŭk jây rhŏ brah Baal păng hŏ ndâk jêh ta Samari.

³³ Y-Ahap ƀư đŏng du mlâm rup brah Asêra. Pônây, Y-Ahap ƀư âk nau mhĭk, nsônh nau ji nuih Yêhôva Brah Ndu phung Israel rmeh lơn ma phung hađăch Israel lor panăp păng.

³⁴ Tâm rnôk rô̆ Y-Ahap, Y-Hiêl gŭ ta Bêthel ndâk tay ƀon Yêrikô. Tơlah păng ntơm ƀư mbon, pôri Y-Abiram, kon bu klâu bôk rah păng khĭt; tơlah păng ndâk lĕ mpông ƀon, Y-Sêgup, kon mpŏt păng khĭt, di nâm nau Brah Yêhôva ngơi jêh ma bâr mbung Y-Yôsuê, kon bu klâu Y-Nun.