I Phung Hađăch 15 - Nau Brah Ndu Ngơi 2023

Y-Abijam ƀư hađăch phung Yuđa

¹ Tâm năm rơh jât ma pham rnôk rô̆ hađăch Jêrôbôam, kon bu klâu Y-Nêbat, Y-Abijam ntơm ƀư hađăch n'gor Yuđa.

² Y-Abijam chiă uănh pe năm tâm Yêrusalem. Mê̆ păng amoh H'Maka, kon bu ur Y-Abisalom.

³ Păng hăn tĭng trong nau tih mbơ̆ păng hŏ hăn. Păng mâu lĕ nuih n'hâm ôh ma Yêhôva Brah Ndu păng nâm bu Y-Đavit, chô yau păng.

⁴ Ƀiălah yor Y-Đavit, Brah Yêhôva prăp ma păng du huê bunuyh thoi sưng hađăch ta Yêrusalem, njêng kon bu klâu păng chiă uănh thoi ntrok păng jêh ri ƀư ăn Yêrusalem hôm e mro.

⁵ Yorlah Y-Đavit ƀư jêh nau ueh jêng sŏng tanăp măt Brah Yêhôva, du njăr nau rêh păng mâu chalơi du ntil nau ôh bơh nau Brah Yêhôva hŏ ntĭnh ma păng, padih ma nau đah Y-Uri, bunuyh Hitit.

⁶ Nau tâm lơh ta nklang Y-Rôbôam jêh ri Y-Jêrôbôam hôm mro dôl tâm nôk rô̆ Y-Abijam chiă uănh.

⁷ Lĕ nau kan êng Y-Abijam, lĕ rngôch nau păng ƀư jêh, mâu di hĕ bu lĕ nchih da dê tâm ndrom samƀŭt nau rêh jêng phung hađăch Yuđa? Y-Abijam jêh ri Y-Jêrôbôam geh ƀaƀơ tâm lơh ndrăng khân păng.

⁸ Y-Abijam khĭt hăn gŭ ndrel phung chô yau păng jêh ri bu tâp păng tâm ƀon Đavit. Kon bu klâu păng jêng Y-Asa, gŭ ta sưng hađăch chiă uănh thoi ntrok păng.

Y-Asa ƀư hađăch phung Yuđa

⁹ Tâm năm rơh bar jât nôk rô̆ Y-Jêrôbôam hađăch Israel, pôri Y-Asa ntơm chiă uănh n'gor Yuđa.

¹⁰ Păng chiă uănh tâm puăn jât ma nguay năm tâm ƀon Yêrusalem. Mê̆ păng amoh H'Maka, kon bu ur Y-Abisalom.

¹¹ Y-Asa ƀư nau di tanăp măt Brah Yêhôva, nâm bu Y-Đavit, che păng hŏ ƀư.

¹² Păng mprơh lơi phung bu klâu văng tĭr luh bơh n'gor jêh ri ngroh lơi lĕ rngôch rup brah phung chô yau păng hŏ ƀư.

¹³ Hađăch n'glưh nsot mê̆ hađăch amoh H'Maka jêng hađăch bu ur, yorlah păng geh ndâk du mlâm rup brah Asêra, jêng Brah Yêhôva tâm rmot. Y-Asa ƀư rlâm lơi rup brah păng jêh ri su rup brah nây ta rlŭng Kidrôn.

¹⁴ Ƀiălah păng mâu ƀư rai ôh ntŭk prêh klơ. Nđâp lah pônây, nuih n'hâm Y-Asa jêng răp jăp ma Brah Yêhôva tâm du bông nau rêh păng.

¹⁵ Păng djôt leo ma ngih Brah Yêhôva lĕ ndơ kloh mbơ̆ păng jêh ri păng nơm hŏ prăp êng ăn nau kloh ueh, mâu lah mah, prăk, mâu lah lĕ ndơ dŏng.

Yuđa tâm rnglăp đah Aram tâm rdâng đah phung Israel

¹⁶ Hađăch Yuđa jêng Y-Asa geh nau tâm lơh đah hađăch Israel jêng Y-Baêsa, tâm lĕ rnôk nau chiă uănh.

¹⁷ Y-Baêsa, hađăch Israel, hăn hao tâm lơh đah phung Yuđa, ndâk pôih ta Rama gay king mâu ăn ôh du huê dơi luh lăp n'gor Y-Asa, hađăch Yuđa.

¹⁸ Nôk nây, Y-Asa sŏk lĕ rngôch prăk jêh ri mah hôm e tâm jay ngih Brah Yêhôva jêh ri tâm jay ngih hađăch, jao lĕ rngôch ăn ma phung oh mon păng, jêh nây prơh khân păng hăn mâp đah Y-Ben-Hadat, kon bu klâu Y-Tarimmôn, sau Y-Hêsiôn, hađăch Aram gŭ ta ƀon Damas, lah pô aơ:

¹⁹ “Ăn he tâm rnglăp ndrel, tâm ban mbơ̆ may jêh ri mbơ̆ gâp hŏ ƀư. Aơ gâp njuăl djôt leo ndơ nhhơr ma prăk jêh ri mah gay nkơ ma may. Dăn may chalơi nau tâm rnglăp may đah Y-Baêsa, hađăch Israel, gay ma păng du ngai bơh n'gor gâp.”

²⁰ Y-Ben-Hadat iăt tĭng nau hađăch Asa, prơh phung kôranh tahan păng hăn tâm lơh đah lĕ ƀon phung Israel, pit sŏk ƀon Ijôn, Dan, Abel-Bel-Maka, jêh ri lam lĕ n'gor Chinêrôt jêh ri n'gor Naptali.

²¹ Y-Baêsa gĭt nau nây, rlu ro ndâk pôih Rama jêh ri gŭ ta Tirsa.

²² Hađăch Asa tâm rƀŭn lĕ rngôch phung Yuđa, mâu lơi du huê ôh jêh ri khân păng văch tât djôt lŭ jêh ri tơm si Y-Baêsa hŏ dŏng ndâk pôih ta Rama. Hađăch Asa dŏng lĕ ndơ nây ndâk njêng ƀon Gêba tâm n'gor Benjamin jêh ri Mispa.

²³ Lĕ nau kan êng Y-Asa, lĕ nau ktang păng, lĕ kan păng ƀư, jêh ri lĕ ƀon păng hŏ ndâk, mâu di hĕ bu nchih da dê jêh tâm ndrom samƀŭt nau rêh jêng phung hađăch Yuđa? Tơlah păng hŏ ranh jêh, păng geh nau ji jâng.

²⁴ Y-Asa khĭt hăn gŭ ndrel ma phung chô yau păng jêh ri bu tâp păng ndrel ma phung chô yau păng tâm ƀon Đavit. Kon bu klâu păng jêng Y-Jôsaphat gŭ ta sưng hađăch chiă uănh ntrok păng.

Y-Nadap ƀư hađăch Israel

²⁵ Tâm năm tơ̆ bar nôk rô̆ chiă uănh Y-Asa, hađăch Yuđa, Y-Nadap, kon bu klâu Y-Jêrôbôam, hao sưng hađăch Israel jêh ri chiă uănh phung Israel bar năm.

²⁶ Păng ƀư nau mhĭk tanăp măt Brah Yêhôva, hăn tĭng tâm trong chô yau păng, ƀư tih tâm ban Y-Jêrôbôam hŏ ƀư tih jêh ri nsŭk phung Israel ƀư tih tay đŏng.

²⁷ Y-Baêsa, kon bu klâu Y-Ahija, jêng noi deh Isakar, tâm chră nau tâm rdâng ma hađăch. Tâm dôl Y-Nadap jêh ri lĕ rngôch phung Israel nchueng jêh Gibêthôn, jêng phung Philistin, pôri Y-Baêsa nkhĭt lơi hađăch ta nây.

²⁸ Tâm năm tơ̆ pe Y-Asa, hađăch Yuđa, Y-Baêsa nkhĭt lơi Y-Nadap jêh ri pit sŏk sưng hađăch.

²⁹ Tơlah mhe gŭ ta sưng hađăch, Y-Baêsa nkhĭt lĕ rngôch bunuyh tâm noi deh Y-Jêrôbôam, mâu hôm om ôh du huê hôm rêh klen, ma tât tơlah hŏ ƀư rai lĕ ngih Y-Jêrôbôam, di nâm nau Brah Yêhôva hŏ ngơi jêh ma bâr mbung Y-Ahija, oh mon Păng ta Silô;

³⁰ yor nau tih Y-Jêrôbôam hŏ ƀư tih, ƀư tih đŏng ma phung Israel jêh ri nsônh nau ji nuih Yêhôva Brah Ndu phung Israel.

³¹ Lĕ kan êng Y-Nadap jêh ri lĕ nau hađăch hŏ ƀư, bu hŏ nchih da dê tâm ndrom samƀŭt nau rêh jêng phung hađăch Israel.

³² Ta nklang Y-Asa jêh ri Y-Baêsa, hađăch Israel, geh ƀaƀơ nau tâm lơh ndrăng khân păng tâm lĕ rnôk khân păng chiă uănh.

Y-Baêsa ƀư hađăch Israel

³³ Tâm năm tơ̆ pe Y-Asa hađăch Yuđa, Y-Baêsa, kon bu klâu Y-Ahija, hao ƀư hađăch lĕ rngôch Israel jêh ri chiă uănh bar jât ma puăn năm ta Tirsa.

³⁴ Hađăch ƀư nau mhĭk tanăp măt Brah Yêhôva, hăn tĭng trong Y-Jêrôbôam jêh ri nau tih Y-Jêrôbôam hŏ ƀư tih, nsŭk jêh phung Israel ƀư tih đŏng.