I Phung Hađăch 14 - Nau Brah Ndu Ngơi 2023

Y-Ahija mbơh lor ma nau rai lôch ngih Y-Jêrôbôam

¹ Nôk nây, Y-Abija, kon Y-Jêrôbôam, geh nau ji.

² Y-Jêrôbôam lah đah ur: “Aơ, ăn ay tâm rgâl muh măt ay gay ma bu mâu gĭt năl ma ay jêng ur gâp, jêh nây hăn tât ma Silô. Ta nây geh nơm mbơh lor Y-Ahija, nơm hŏ lah lor jêh ma gâp nau gâp mra jêng hađăch ma phung ƀon lan aơ.

³ Ay djôt leo hom jât glo piăng let, djê̆ ƀănh njŭng jêh ri du nông dak sŭt, jêh nây hăn mâp đah nơm mbơh lor. Păng mra lah ma ay nau mra dơi tât ma kon se aơ.”

⁴ Ur Y-Jêrôbôam ƀư di kơt nây. Ay dâk hăn tât ma Silô, jêh ri tât ta ngih Y-Ahija. Nôk nây, Y-Ahija mâu dơi saơ ôh, măt păng lĕ ngo jêh yor lĕ ranh.

⁵ Ƀiălah Brah Yêhôva lah ma Y-Ahija pô aơ: “Aơ, ur Y-Jêrôbôam văch tât ŭch ôp may ma nau kon bu klâu păng, yorlah păng ji. May mra plơ̆ lah ma păng kơt aơ, kơt aơ. Tơlah hăn tât, păng mra nklă n'hi săk jêng du huê bu ur êng.”

⁶ Tơlah Y-Ahija tăng nteh jâng păng dôl chuat lăp ta mpông sâng, lah ro: “Hơi ur Y-Jêrôbôam, lăp hom. Mâm ay ƀư n'hi săk jêng du huê êng? Gâp sŏk dơn nau ntăm gay mbơh ma ay du nau mhĭk. Hăn sĭt hom lah đah Y-Jêrôbôam pô aơ

⁷ Yêhôva Brah Ndu Israel lah kơt aơ: ‘Gâp hŏ n'hao may bơh ta nklang phung ƀon lan jêh ri njêng jêh may kôranh chiă uănh ma phung ƀon lan Israel jêng phung ƀon lan Gâp.

⁸ Gâp hŏ pit sŏk jêh ƀon bri hađăch tă bơh ngih Y-Đavit jêh ri jao păng ma may. Ƀiălah may mâu tâm ban ma Y-Đavit, oh mon Gâp, jêng bunuyh djôt prăp lĕ nau vay ntăm bơh Gâp, lĕ nuih n'hâm hăn tĭng Gâp jêh ri ƀư knŏng nau di jêng sŏng tanăp măt Gâp.

⁹ Ƀiălah may hŏ ƀư nau mhĭk jêh rlau lơn ma phung lor panăp may, njêng ma may nơm phung brah êng, rup tŏ chiăr gay nsônh nau ji nuih Gâp jêh ri dun mƀăr lơi Gâp.

¹⁰ Yor ri, Gâp mra ăn tât nau mhĭk ma ngih Y-Jêrôbôam: Gâp mra ƀư rai lĕ rngôch bunuyh bu klâu bơh ngih nây, mâu chrê phung dĭk mâu lah bunuyh kon me tâm phung Israel, jêh ri pih kloh ngih Y-Jêrôbôam nâm bu pih kloh lĕ ek, kŏ tât mâu hôm klen tay du ntil ndơ ôh.

¹¹ Mbu bunuyh ma ngih Y-Jêrôbôam khĭt tâm ƀon, so mra sa puăch, bi mbu moh khĭt tâm mir sĭm klơ trôk mra sa.’ Nĕ jêng nau Brah Yêhôva ngơi jêh.

¹² Pôri, ăn ay plơ̆ sĭt ma ngih ay. Tơlah păng jot jâng hăn lăp ƀon, kon ay mra khĭt.

¹³ Lĕ rngôch phung Israel mra nhhiăng nhĭm jêh ri tâp păng. Tâm phung jêng bunuyh ma ngih Y-Jêrôbôam, knŏng du huê păng dơm bu tâp brôi tâm môch, yorlah tâm lĕ ngih Y-Jêrôbôam păng jêng nơm hôm ƀư nau ueh ma nuih n'hâm Yêhôva Brah Ndu Israel.

¹⁴ Brah Yêhôva mra n'hao du huê ƀư hađăch ma phung Israel, păng mra ƀư rai ngih Y-Jêrôbôam ro nar aơ. Di ngăn, aƀaơ ro!

¹⁵ Brah Yêhôva mra ƀư nau mhĭk phung Israel nâm bu du tơm rpho n'gơ nklang dak, jêh ri mprơh phung Israel luh bơh n'gor bri ueh aơ yor Păng hŏ ăn jêh ma phung chô yau khân păng, jêh ri ƀư ăn chah rai khân păng mpeh kơl tê̆ dak krong Ơphrat, yorlah khân păng ƀư rup brah nsônh Brah Yêhôva ji nuih.

¹⁶ Yor tă nau tih Y-Jêrôbôam ƀư tih jêh, jêng nau ƀư ăn phung Israel ƀư tih, yor ri Brah Yêhôva mra jao phung Israel tâm ti phung rlăng.”

¹⁷ Ur Y-Jêrôbôam dâk hăn sĭt jêh ri hăn tât ta Tirsa. Tơlah păng jot jâng ta mpông sâng lăp ngih, kon se khĭt.

¹⁸ Bu tâp păng, lĕ rngôch phung Israel nhĭm vơl ma păng da dê, tĭng nâm nau Brah Yêhôva hŏ ngơi jêh ma bâr mbung oh mon Păng, jêng nơm mbơh lor Y-Ahija.

Nau khĭt Y-Jêrôbôam

¹⁹ Lĕ rngôch nau kan êng Y-Jêrôbôam ƀư, jêng nau tâm lơh jêh ri kan păng chiă uănh, bu hŏ nchih da dê tâm ndrom samƀŭt nau rêh jêng ma phung hađăch Israel.

²⁰ Y-Jêrôbôam chiă uănh bar jât ma bar năm; jêh ri păng khĭt hăn gŭ n'hanh phung chô yau păng. Y-Nadap kon bu klâu păng chiă uănh thoi ntrok păng.

Nau Y-Rôbôam chiă uănh

²¹ Y-Rôbôam, kon bu klâu Y-Salômôn, chiă uănh tâm Yuđa. Tơlah gŭ ta sưng hađăch, Y-Rôbôam hŏ geh puăn jât ma nguay năm. Hađăch chiă uănh jât ma pơh năm tâm ƀon Yêrusalem, ƀon Brah Yêhôva hŏ săch tâm phung ndŭl mpôl Israel, gay dơm amoh Păng ta nây. Mê̆ păng amoh jêng H'Naama, bunuyh Ammôn.

²² Phung Yuđa ƀư nau mhĭk tanăp măt Brah Yêhôva. Yor tă nau tih khân păng hŏ ƀư tih, khân păng nsônh Brah Yêhôva ji nuih, rmeh lơn ma phung chô yau khân păng hŏ ƀư jêh.

²³ Khân păng ndâk đŏng ăn ma khân păng nơm lĕ ntŭk prêh klơ, n'gâng mbah jêh ri rup brah Asêrah ta klơ lĕ gôl yôk prêh jêh ri tâm dâng lĕ tơm si dŭt pŭm.

²⁴ Tâm n'gor bri geh đŏng bu klâu văng tĭr pah kan tâm lĕ jây rhŏ brah. Khân păng ƀư tĭng kơt lĕ nau rmot tâm phung ndŭl mpôl Brah Yêhôva mprơh jêh panăp phung ƀon lan Israel.

²⁵ Năm rơh prăm rnôk rô̆ Y-Rôbôam chiă uănh, hađăch n'gor Êjipt jêng Y-Sisăk hăn lơh Yêrusalem.

²⁶ Y-Sisăk sŏk lĕ ndô ndơ khlay tâm ngih Brah Yêhôva jêh ri bơh ngih hađăch, sŏk pit đŏng lĕ rngôch khêl mah Y-Salômôn hŏ ƀư.

²⁷ Hađăch Rôbôam ntrŭnh ƀư lĕ khêl kông ntrok lĕ khêl nây jêh ri jao lĕ ndơ nây ma phung kôranh tahan gak ngih hađăch.

²⁸ Ăp tơ̆ hađăch lăp tâm ngih Brah Yêhôva, tahan gak djôt lĕ khêl nây. Jêh nau nây, khân păng djôt leo lĕ khêl nây prăp tâm jay phung tahan gak.

²⁹ Lĕ kan êng Y-Rôbôam jêh ri lĕ nau păng hŏ ƀư, hŏ nchih jêh da dê tâm ndrom samƀŭt nau rêh jêng phung hađăch Yuđa.

³⁰ Nau tâm lơh tât geh mro mrăng ta nklang Y-Rôbôam jêh ri Y-Jêrôbôam.

³¹ Y-Rôbôam khĭt gŭ ndrel ma phung chô yau păng jêh ri bu tâp păng n'hanh phung chô yau păng tâm ƀon Đavit. Mê̆ păng amoh H'Naama, bunuyh Ammôn. Kon hađăch jêng Y-Abijam, gŭ ta sưng hađăch chiă uănh ntrok păng.