I Phung Hađăch 13 - Nau Brah Ndu Ngơi 2023

Bunuyh Brah Ndu luh bơh Yuđa hăn tât gay nduyh Y-Jêrôbôam

¹ Nôk nây, tĭng nâm nau Brah Yêhôva ntăm, geh du huê bunuyh Brah Ndu luh bơh Yuđa hăn tât ta Bêthel tâm nôk Y-Jêrôbôam dâk dăch nơng ƀư brah gay su ndơ ƀâu kah.

² Tông tĭng nau ntăm Brah Yêhôva, bunuyh nây nter tâm rdâng đah nơng ƀư brah pô aơ: “Hơi nơng ƀư brah, nơng ƀư brah! Brah Yêhôva lah: ‘Ri! du huê kon bu klâu mra dơi deh ma ngih Y-Đavit, amoh păng jêng Y-Jôsia. Păng mra nhhơr ta klơ may n'hanh phung kôranh ƀư brah ta lĕ ntŭk prêh klơ, jêng phung gŭch ndơ ƀâu kah ta klơ may, jêh ri bu mra su ta klơ may nting phung bunuyh khĭt.’”

³ Tâm nar nây, bunuyh Brah Ndu ăn nau mbên khlay jêh ri lah: “Aơ jêng nau mbên khlay gay tâm mpơl pô aơ Brah Yêhôva ngơi jêh: Nơng ƀư brah mra đang jêh ri buh ta klơ nơng ƀư brah mra hŭk.”

⁴ Tơlah tăng nau bunuyh Brah Ndu nter tâm rdâng đah nơng ƀư brah ta Bêthel, hađăch Jêrôbôam yơr ti tă bơh nơng ƀư brah jêh ri lah: “Nhŭp hom păng!” Ƀiălah dôl hađăch yơr ti tâm rdâng đah bunuyh nây, nting tur hađăch jêng dăng kro ro, mâu hôm blau kôn tay đŏng ôh.

⁵ Nơng ƀư brah đang jêh ri buh ta klơ nơng ƀư brah hŭk, di nâm nau mbên khlay bunuyh Brah Ndu hŏ tông bâr nau ntăm Brah Yêhôva ngơi jêh.

⁶ Rnôk nây, hađăch lah ma bunuyh Brah Ndu pô aơ: “Dăn ma may vơl dăn ma Yêhôva Brah Ndu may jêh ri mbơh sơm an ma gâp gay ăn ti gâp kôn tay nâm bu ơm.” Bunuyh Brah Ndu vơl dăn ma Brah Yêhôva jêh ri ti hađăch kôn dơi tay bah nâm bu saơm.

⁷ Hađăch lah ma bunuyh Brah Ndu: “Dăn jă may sĭt n'hanh gâp tât ma ngih gâp, dŏng ndơ sông sa, jêh ri gâp mra nkơ ma may du drăp ndơ.”

⁸ Ƀiălah bunuyh Brah Ndu plơ̆ lah: “Nđâp tơlah may ăn ma gâp n'gul drăp ndơ may, gâp mâu đŏng lăp ôh ndrel ma may, mâu lah sa piăng let mâu lah nhêt dak tâm ntŭk aơ,

⁹ yorlah Brah Yêhôva ntĭnh ntăm jêh ma gâp pô aơ: ‘May lơi sa piăng let ôh mâu lah nhêt dak, mâu đŏng tĭng trong ơm gay may plơ̆ sĭt.’”

¹⁰ Pônây, păng hăn sĭt trong êng, mâu sĭt ôh trong păng văch tât ma Bêthel.

¹¹ Nôk nây, geh du huê nơm mbơh lor bu ranh gŭ ta Bêthel. Du huê tâm phung kon bu klâu păng nkoch ma păng lĕ rngôch nau bunuyh Brah Ndu hŏ ƀư ta Bêthel tâm nar nây, jêh ri lĕ nau păng hŏ ngơi đah hađăch.

¹² Jêh iăt, mbơ̆ păng ôp: “Mbah trong bunuyh nây sĭt?” Phung kon bu klâu păng nchŏng ma păng trong bunuyh Brah Ndu gŭ ta n'gor Yuđa hŏ hăn sĭt jêh.

¹³ Păng lah ma phung kon bu klâu păng: “Dăp hom ưn seh bri ma gâp.” Khân păng dăp ưn seh bri ma păng, jêh nây păng ncho jêh ri

¹⁴ tĭng bunuyh Brah Ndu, tâm mâp bunuyh nây dôl gŭ tâm dâng tơm n'ho. Păng ôp: “Di lĕ may jêng bunuyh Brah Ndu văch tât bơh Yuđa?” Bunuyh nây plơ̆ lah: “Di ngăn, Gâp ro yơh.”

¹⁵ Păng lah ma bunuyh nây: “Jă may sĭt ma ngih gay sông sa nđâp ma gâp.”

¹⁶ Ƀiălah bunuyh nây plơ̆ lah: “Gâp mâu dơi sĭt ôh ndrel ma may, mâu đŏng lăp tâm ngih may, mâu lah sa piăng let mâu lah nhêt dak ndrel ma may tâm ntŭk aơ,

¹⁷ yorlah Brah Yêhôva hŏ ntĭnh ntăm jêh ma gâp pô aơ: ‘May lơi sa ôh piăng let, lơi nhêt dak ta ntŭk nây, jêh ri mâu dơi đŏng sĭt tĭng trong may hŏ hăn jêh.’”

¹⁸ Nơm mbơh lor ranh lah tay: “Gâp jêng du huê nơm mbơh lor nâm bu may đŏng. Du huê tông mpăr hŏ tông bâr Brah Yêhôva ngơi ma gâp pô aơ: ‘Leo hom păng sĭt lăp tâm ngih ndrel ma may, gay ăn păng sa piăng let jêh ri nhêt dak.’” Ƀiălah nơm mbơh lor ranh aơ hŏ lah mƀruh ma păng.

¹⁹ Bunuyh Brah Ndu plơ̆ tay ndrel ma nơm mbơh lor ranh, jêh ri sông sa nhêt ta ngih păng.

²⁰ Tơlah bar hê khân păng dôl gŭ ta sưng sông sa, geh nau Brah Yêhôva ngơi đah nơm mbơh lor hŏ leo bunuyh ri plơ̆ tay.

²¹ Păng ngơi huy ro ma bunuyh Brah Ndu văch tât bơh Yuđa: “Brah Yêhôva lah: ‘Yorlah may mâu tông ôh nau Brah Yêhôva ngơi, mâu djôt prăp ôh nau vay Yêhôva Brah Ndu ntăm may hŏ ntrŭnh ma may,

²² ƀiălah plơ̆ tay sa piăng let nhêt dak ta ntŭk Brah Yêhôva lĕ buay hâu ngăn, pôri săk jăn khĭt may mâu mra dơi tâp ôh tâm môch phung chô yau may.’”

²³ Jêh sông sa nhêt lôch jêh, nơm mbơh lor ranh dăp ưn seh bri ma nơm mbơh lor jêng nơm păng hŏ leo sĭt jêh.

²⁴ Bunuyh aơ luh hăn, rŏ trong păng mâp du mlâm yau mŭr jêh ri yau mŭr nây kăp nkhĭt păng. Săk jăn khĭt păng mplâng ta trong, geh seh bri gŭ grem êp meng păng, yau mŭr đŏng gŭ grem ta meng săk jăn khĭt.

²⁵ Geh bunuyh prot rgăn ta nây, saơ săk jăn khĭt ta trong jêh ri yau mŭr gŭ grem ta meng, khân păng hăn lăp tâm ƀon kôranh nơm mbơh lor ranh nây gŭ, nkoch tay nau păng lĕ saơ.

²⁶ Tơlah nơm mbơh lor bu ranh, nơm hŏ ƀư ăn ma bunuyh Brah Ndu plơ̆ tay, tăng nau nây, păng lah pô aơ: “Nây jêng bunuyh Brah Ndu, hŏ mâu tông nau Brah Yêhôva ngơi. Yor ri, Brah Yêhôva hŏ jao bunuyh nây ăn yau mŭr sa hêk săk jăn jêh ri nkhĭt lơi păng, di tĭng nâm nau Brah Yêhôva ngơi jêh ma păng.”

²⁷ Jêh păng đă phung kon bu klâu păng nơm: “Dăp hom ưn seh bri gâp.” Khân păng dăp ưn seh bri ma păng.

²⁸ Păng hăn ro jêh ri saơ săk jăn khĭt ta trong, geh seh bri jêh ri yau mŭr gŭ grem êp meng săk jăn khĭt. Yau mŭr mâu sa hêk săk jăn khĭt jêh ri mâu kăp đŏng seh bri nây.

²⁹ Nơm mbơh lor ranh leo săk jăn khĭt bunuyh Brah Ndu dơm ta klơ ndŭr kơi seh bri, leo sĭt rlet ma ƀon păng nơm gay nhĭm nhhiăng jêh nây tâp brôi păng.

³⁰ Păng tâp brôi săk jăn khĭt bunuyh nây tâm môch păng nơm, jêh nây nhĭm nhhiăng: “Yô̆ nđach ngăn! bunuyh oh nâu gâp!”

³¹ Tâp brôi lôch jêh, păng lah ma phung kon bu klâu păng pô aơ: “Tơlah gâp khĭt, khân may tâp gâp tâm môch hŏ tâp jêh bunuyh Brah Ndu, gay nting gâp ta meng nting păng.

³² Yorlah lĕ nau ngơi păng tông bâr nau ntăm Brah Yêhôva nter tâm rdâng đah nơng ƀư brah ta Bêthel jêh ri lĕ jây rhŏ brah ta klơ lĕ ntŭk prêh gŭ tâm ƀon Samari nanê̆ mra dơi tât di ngăn.”

³³ Jêh nau nây, Y-Jêrôbôam ăt mâu chalơi trong nau djơh mhĭk păng, ƀiălah hađăch ăt njêng phung kôranh ƀư brah ma lĕ ntŭk prêh klơ săch tâm phung ƀon lan; ma mbu nơm ŭch, păng ăn păng jêng kôranh ƀư brah ma lĕ ntŭk prêh klơ nây.

³⁴ Nau nây rlơ̆ jêng du nau tih toyh ma ngih Y-Jêrôbôam, kŏ tât nau chiă uănh Y-Jêrôbôam bu ƀư ăn rlâm jêh ri rai lôch lĕ bơh klơ neh ntu.