I Phung Hađăch 12 - Nau Brah Ndu Ngơi 2023

Nau tâm pă ƀon bri hađăch: Nau rêh jêng phung hađăch Yuđa jêh ri phung hađăch Israel ( 12:1 – 22:54 ) Phung ndŭl mpôl mpeh pa lơ nkhah du bơh ngih Y-Đavit

¹ Y-Rôbôam hăn tât Sichem yorlah lĕ rngôch phung Israel văch tât ta nây gay njêng păng ƀư hađăch.

² Y-Jêrôbôam, kon Y-Nêbat, tăng nau nây dôl păng hôm e gŭ ta Êjipt, ta ntŭk păng nchuăt du bơh hađăch Salômôn.

³ Bu prơh bunuyh hăn kuăl Y-Jêrôbôam plơ̆ sĭt. Jêh nây lĕ rngôch phung Israel tâm rƀŭn văch tât lah ma Y-Rôbôam pô aơ:

⁴ “Mbơ̆ may hŏ n'gân klơ hên du mlâm mâng mbăk jâk jêr. Aƀaơ aơ, dăn may n'hŭch hom ăn n'gơch nau rêh ni jêh ri mâng mbăk jâk ngăn mbơ̆ may hŏ n'gân jêh ta klơ hên, hên mra pah kan ma may.”

⁵ Păng plơ̆ lah ma khân păng: “Hăn sĭt hom, lôch pe nar pakơi plơ̆ sĭt ta aơ tâm mâp đah gâp.” Phung ƀon lan hăn sĭt ro.

⁶ Hađăch Rôbôam nchră đah phung kôranh bu ranh hŏ tă gŭ pah kan tanăp Y-Salômôn, mbơ̆ păng, dôl păng hôm e rêh. Hađăch ôp: “Mâm nau khân may kơl mĭn ma gâp gay plơ̆ lah ma phung ƀon lan aơ?”

⁷ Khân păng lah ma păng: “Tơlah nar aơ may jêng du huê oh mon ma phung ƀon lan aơ, pah kan ma khân păng, jêh ri dŏng ngơi nau ueh gay plơ̆ lah ma khân păng, ri mơ khân păng mra jêng oh mon ma may mro mrăng.”

⁸ Ƀiălah Y-Rôbôam mâu tông nau phung kôranh bu ranh nchră đah păng, ƀiălah păng ôp tay nau mĭn đah phung mom ndăm văch ma toyh du rơh ndrel ma păng jêh ri dôl pah kan tanăp păng.

⁹ Păng ôp khân păng: “Phung nây lah jêh ma gâp pô aơ: ‘Dăn n'hŭch ăn n'gơch hom mâng mbăk mbơ̆ may hŏ n'gân ta klơ hên.’ Pônây, moh nau khân may kơl mĭn ma gâp gay plơ̆ sĭt lah ma phung ƀon lan aơ?”

¹⁰ Phung mom ndăm hao toyh du rơh ndrel ma păng lah: “Phung ƀon lan aơ hŏ dăn jêh ma may pô aơ: ‘Mbơ̆ may hŏ n'gân ta klơ hên mâng mbăk jâk ngăn, dăn ma may n'hŭch ăn n'gơch mâng mbăk ma hên.’ Pônây, dăn may plơ̆ lah ma khân păng kơt aơ: ‘Nglau ti kon gâp toyh lơn ndŭl mbơ̆ gâp.

¹¹ Mbơ̆ gâp hŏ n'gân jêh du mâng mbăk jâk ngăn ta klơ khân may, gâp mra ƀư ma mâng mbăk khân may jâk lơn đŏng. Mbơ̆ gâp tâm rmal khân may ma mâng rvĕ, gâp mra tâm rmal khân may ma mâng rvĕ ndŭr vơng.’”

¹² Pe nar pakơi, Y-Jêrôbôam nđâp lĕ rngôch phung ƀon lan văch tât tâm mâp đah Y-Rôbôam nâm bu păng hŏ tâm nal jêh: “Pe nar đŏng văch plơ̆ hom tâm mâp đah gâp.”

¹³ Hađăch plơ̆ sĭt lah ma phung ƀon lan ma nau ngơi dăng. Dun lơi nau phung kôranh bu ranh sâm nchră ma păng,

¹⁴ păng plơ̆ lah ma khân păng tĭng nâm nau phung mom ndăm nchră pô aơ: “Mbơ̆ gâp hŏ n'gân du mâng mbăk jâk ngăn, gâp mra ƀư ma mâng mbăk khân may jâk lơn đŏng. Mbơ̆ gâp hŏ tâm rmal khân may ma mâng rvĕ ntâu, gâp mra tâm rmal khân may ma mâng rvĕ ndŭr vơng.”

¹⁵ Pônây hađăch mâu ŭch iăt ôh tǐng nau phung ƀon lan dăn, yor lĕ nau nây jêng kan Brah Yêhôva ăn nau tât geh gay ƀư tât di ngăn nau Păng hŏ ngơi đah Y-Jêrôbôam, kon bu klâu Y-Nêbat, rgăn bâr mbung Y-Ahija, bunuyh ƀon Silô.

¹⁶ Tơlah saơ hađăch mâu ŭch iăt ôh nau khân păng dăn, lĕ rngôch phung Israel plơ̆ lah ma hađăch: “Moh kô̆ hên geh tâm ngih Y-Đavit? Hên mâu geh drăp ndơn ôh tâm kon Y-Yêsê. Ơ phung Israel! Plơ̆ sĭt hom ma ngih bok khân may. Hơi Y-Đavit! Ntơm bơh aƀaơ uănh njrăng hom ma ngih khân may.” Jêh nây phung ƀon lan Israel plơ̆ sĭt ma ngih bok khân păng.

¹⁷ Hôm phung Israel dôl gŭ tâm lĕ ƀon Yuđa, Y-Rôbôam chiă uănh khân păng.

¹⁸ Nôk hađăch Rôbôam prơh Y-Adôniram, jêng kôranh chiă uănh ma phung pah kan jâk, tât ma phung Israel, ƀiălah khân păng klŭp lŭ nkhĭt păng. Hađăch Rôbôam ncho ndal ndeh seh, nchuăt du sĭt rlet ta Yêrusalem.

¹⁹ Ntơm bơh nây, phung Israel tâm rdâng đah ngih Y-Đavit n'ho tât nar aơ.

Y-Jêrôbôam ƀư hađăch phung Israel

²⁰ Tơlah tăng lư Y-Jêrôbôam plơ̆ sĭt jêh, phung ƀon lan Israel rgum nau tâm rƀŭn toyh, jêh ri prơh bunuyh hăn jă păng tât gay njêng păng ƀư hađăch chiă uănh lĕ rngôch phung Israel. Bu mâu tĭng ngih Y-Đavit ôh, knŏng ndŭl mpôl Yuđa.

²¹ Plơ̆ sĭt ma ƀon Yêrusalem, Y-Rôbôam kuăl rgum lĕ rngôch ngih Yuđa jêh ri ndŭl mpôl Benjamin geh du rsen pham rmưn bunuyh tahan dăng ktang, gay tâm lơh đah ngih Israel, gay ndâk đŏng ƀon bri hađăch ma Y-Rôbôam, kon bu klâu Y-Salômôn.

²² Ƀiălah geh nau Brah Ndu ngơi ma Y-Sêmaya, bunuyh Brah Ndu:

²³ “Lah hom ma Y-Rôbôam, kon Y-Salômôn, hađăch Yuđa, nđâp ma lĕ rngôch ngih Yuđa, Benjamin jêh ri ma phung ƀon lan hôm e pô aơ:

²⁴ Aơ jêng nau Brah Yêhôva lah: ‘Khân may mâu dơi tâm lơh ôh đah phung oh nâu khân may, jêng phung ƀon lan Israel. Ăp nơm plơ̆ sĭt hom ngih păng nơm, yorlah nau aơ tă bơh Gâp ăn dơi tât.’” Pônây, khân păng iăt tĭng ma nau Brah Yêhôva ntrŭnh jêh ri plơ̆ sĭt.

²⁵ Y-Jêrôbôam ŭch ndâk ƀon Sichem tâm n'gor klơ dor yôk Êphraim jêh ri gŭ ta nây. Jêh nây hađăch luh tă bơh ƀon nây gay ndâk ƀon Pênuel.

Lĕ ndrôk mah ta Bêthel jêh ri Dan

²⁶ Nôk nây, Y-Jêrôbôam lah tâm nuih n'hâm păng: “Klăp lah ƀon bri hađăch mra plơ̆ sĭt tay ma ngih Y-Đavit.

²⁷ Tơlah phung ƀon lan aơ ăt hăn hao rlet Yêrusalem gay nhhơr mpa ƀư brah tâm ngih Brah Yêhôva, pôri nuih n'hâm khân păng nanê̆ mra plơ̆ sĭt tay ma kôranh khân păng nơm jêng Y-Rôbôam, hađăch phung Yuđa. Khân păng mra nkhĭt gâp jêh ri plơ̆ sĭt ma Y-Rôbôam, hađăch phung Yuđa.”

²⁸ Jêh nây nchră mĭn, hađăch ntrŭnh ƀư bar mlâm ndrôk kon ma mah, jêh ri păng lah ma phung ƀon lan: “Khân may hăn hao Yêrusalem jêr ngăn! Hơi Israel! Aơ jêng phung brah khân may, hŏ njŭn leo khân may du luh bơh Êjipt.”

²⁹ Hađăch dơm du mlâm rup ndrôk kon tâm Bêthel, hôm du mlâm rup ri dơm tâm Dan.

³⁰ Nau kan nây hŏ ƀư ma phung ƀon lan ƀư tih, yorlah khân păng hăn tât ta Dan gay yơk mbah ma rup ndrôk kon nây.

³¹ Y-Jêrôbôam ƀư tay đŏng tâm ntŭk yơk mbah ta klơ lĕ ntŭk prêh, săch bunuyh tâm nklang phung ƀon lan jêh ri njêng khân păng ƀư kôranh brah, mâu di săch bunuyh tâm noi deh Lêvi.

³² Hađăch Jêrôbôam njêng tay du nar nau rƀŭn tâm nar jât ma prăm khay pham, nâm bu nau rƀŭn nkra jêh tâm n'gor Yuđa, jêh ri nhhơr lĕ mpa ƀư brah ta klơ nơng ƀư brah. Hađăch ƀư đŏng kơt nây ta Bêthel, nhhơr mpa ƀư brah ma rup ndrôk kon păng hŏ ƀư jêh. Hađăch njêng đŏng ta Bêthel phung kôranh ƀư brah tâm ntŭk yơk mbah ta lĕ ntŭk prêh klơ păng hŏ ndâk jêh.

³³ Tâm nar jât ma prăm khay pham jêng khay păng tâm nal jêh tĭng nâm mĭn ŭch êng păng nơm, Y-Jêrôbôam hăn hao tât ta nơng ƀư brah păng tâm Bêthel. Hađăch njêng du nau nar rƀŭn ma phung ƀon lan Israel, jêh nây hăn hao rlet ma nơng ƀư brah gây su ndơ ƀâu kah.