I Phung Hađăch 11 - Nau Brah Ndu Ngơi 2023

Y-Salômôn chalơi Brah Ndu

¹ Padih ma kon bu ur Pharaôn, hađăch Salômôn rŏng kơnh đŏng âk phung bu ur bu năch êng; nĕ jêng phung kon bu ur Môap, Ammôn, Êđôm, Sidôn jêh ri Hitit.

² Khân păng jêng phung ntil mpôl Brah Yêhôva lah jêh đah phung Israel pô aơ: “Khân may lơi tâm gŭ ur sai ôh đah khân păng, yorlah nanê̆ khân păng mra nsŭk nuih n'hâm khân may tĭng ndô̆ phung brah khân păng.” Ƀiălah, Y-Salômôn ăt rŏng klâng phung bu ur nây.

³ Hađăch geh pơh rhiăng nuyh ur jêh ri pe rhiăng nuyh ur yông; khân păng ƀư vĭ ma nuih n'hâm hađăch.

⁴ Di ngăn, tơlah Y-Salômôn ranh jêh, phung ur hađăch nsŭk nuih n'hâm hađăch hăn tĭng phung brah êng. Nuih n'hâm hađăch mâu hôm răp jăp ôh đah Yêhôva Brah Ndu păng nơm nâm bu Y-Đavit, mbơ̆ hađăch,

⁵ yorlah Y-Salômôn hăn tĭng ndô̆ brah bu ur Astarôt phung Sidôn jêh ri tĭng brah Milkôm, jêng brah dŭt mhĭk tâm phung Ammôn.

⁶ Pôri, Y-Salômôn ƀư nau mhĭk tanăp măt Brah Yêhôva, mâu lĕ nuih n'hâm tĭng Brah Yêhôva nâm bu Y-Đavit, mbơ̆ hađăch.

⁷ Nôk nây, Y-Salômôn ndâk đŏng du ntŭk prêh ta klơ yôk tâm tra đah ƀon Yêrusalem ăn ma brah Chêmôs jêng brah dŭt mhĭk tâm phung Môap, jêh ri ăn ma brah Môlek jêng brah dŭt mhĭk tâm phung Ammôn.

⁸ Hađăch ƀư đŏng pônây ma lĕ rngôch phung ur bu năch păng nơm; khân păng gŭch ndơ ƀâu kah jêh ri nhhơr mpa ƀư brah ma phung brah khân păng nơm.

⁹ Brah Yêhôva ji nuih ma Y-Salômôn, yorlah nuih n'hâm hađăch hŏ chalơi jêh Yêhôva Brah Ndu phung Israel, Nơm hŏ tâm mpơl jêh ma păng bar tơ̆,

¹⁰ hŏ ntĭnh jêh ma hađăch lơi ta tĭng phung brah êng ôh, ƀiălah hađăch mâu tông bâr ôh nau ntăm bơh Brah Yêhôva.

¹¹ Yor ri, Brah Yêhôva lah ma Y-Salômôn: “Yorlah may hŏ ƀư kơt nây, mâu ŭch djôt prăp ôh nau Gâp tâm rnglăp jêh ri lĕ nau vay dăp Gâp ntĭnh jêh ma may, n'hêl nanê̆ Gâp mra tâm nkhah lơi ƀon bri hađăch tă bơh may jêh ri ăn păng ma oh mon may.

¹² Ƀiălah, yor ma Y-Đavit, mbơ̆ may, Gâp mâu mra ƀư nau nây tâm rnôk rô̆ may. Ƀiălah Gâp mra sŏk ƀon bri hađăch tă bơh tâm ti kon bu klâu may.

¹³ Nđâp tơlah pônây, Gâp mâu mra sŏk ôh lĕ rngôch ƀon bri hađăch tă bơh păng; ƀiălah yor Y-Đavit, oh mon Gâp, jêh ri yor Yêrusalem ntŭk Gâp hŏ săch jêh, Gâp mra ăn tay ma du ndŭl mpôl kon bu klâu may.”

Phung rlăng đah Y-Salômôn

¹⁴ Brah Yêhôva nsônh du huê dâk tâm rdâng đah Y-Salômôn jêng Y-Hadat, bunuyh Êđôm, jêng du huê tâm ngih hađăch Êđôm.

¹⁵ Alor, tâm nôk Y-Đavit tŭn mpet n'gor Êđôm, Y-Jôap jêng kôranh chiă uănh ma phung tahan, hŏ nkhĭt lĕ rngôch phung bu klâu tâm Êđôm, tâm nôk hăn tâp brôi phung bunuyh khĭt.

¹⁶ Y-Jôap nđâp lĕ rngôch phung Israel hŏ gŭ jêh ta nây tâm prao khay kŏ tât khân păng hŏ nkhĭt lĕ phung bu klâu tâm Êđôm.

¹⁷ Rnôk nây, Y-Hadat jêng du huê ndăm rah ndrel ma lĕ bunuyh Êđôm, jêng lĕ oh mon mbơ̆ păng nơm, nchuăt du tât ma Êjipt.

¹⁸ Khân păng du luh bơh n'gor Madian tât ma Paran. Jêh nây bơh Paran, khân păng djôt leo du rnoh bunuyh Paran hăn tât ta Êjipt jêh ri mpơl măt đah Pharaôn, hađăch n'gor Êjipt. Hađăch nây ăn ma Y-Hadat du mlâm ngih gŭ, ndơ sông sa jêh ri neh mir.

¹⁹ Y-Hadat geh âk nau yô̆ tanăp măt Pharaôn, pônây Pharaôn ăn oh ur păng nơm ma păng, jêng oh hađăch bu ur H'Tahpênes.

²⁰ Oh H'Tahpênes deh ăn ma Y-Hadat du huê kon bu klâu ntơ amoh Y-Gênubat, nây jêng kon lĕ chalơi toh dôl gŭ tâm ngih Pharaôn. Pônây, Y-Gênubat gŭ tâm ngih Pharaôn, tâm nklang phung kon Pharaôn.

²¹ Dôl gŭ ta Êjipt, Y-Hadat tăng lư ma Y-Đavit lĕ khĭt jêh hăn gŭ ndrel ma phung chô yau păng nơm, jêh ri kôranh chiă uănh phung tahan jêng Y-Jôap kŏ khĭt jêh, pôri Y-Hadat ngơi đah ma Pharaôn: “Dăn ma hađăch ăn gâp dơi plơ̆ sĭt rlet ma bri ƀon gâp nơm.”

²² Pharaôn ôp: “Moh ndơ may mâu tŏng dôl gŭ ndrel ma gâp, mâm aƀaơ may dăn plơ̆ sĭt rlet ma bri ƀon may nơm?” Y-Hadat plơ̆ lah: “Mâu geh pưt du ntil ndơ ôh, ƀiălah knŏng dăn ăn ma gâp dơi hăn ro.”

²³ Brah Ndu nsônh tay du huê êng đŏng dâk tâm rdâng đah Y-Salômôn, jêng Y-Rêson, kon Y-Êliada, Y-Rêson, jêng bunuyh du tă bơh kôranh păng jêng Y-Hadadêser, hađăch n'gor Sôba.

²⁴ Tơlah Y-Đavit lơh nkhĭt phung tahan hađăch n'gor Sôba, Y-Rêson rgum tay băl du rnoh bunuyh gŭ văr jŭm păng nơm jêh ri ƀư kôranh chiă uănh phung nây. Khân păng hăn rlet ma ƀon Damas, gŭ ta nây jêh ri chiă uănh ƀon nây.

²⁵ Lĕ du rnôk rô̆ Y-Salômôn, Y-Rêson tâm rdâng mro đah phung Israel, ƀư âk nau mhĭk tâm ban Y-Hadat ƀư jêh. Tơlah ƀư hađăch ta Aram, Y-Rêson tâm rmot ngăn ma phung Israel.

Y-Jêrôbôam dâk tâm rdâng

²⁶ Y-Jêrôbôam, kon bu klâu Y-Nêbat, bunuyh Êphraim, ta n'gor Sêrêda, păng hŏ tă pah kan ma Y-Salômôn, dâk đŏng tâm rdâng đah hađăch. Mê̆ păng jêng du huê bu ur ndrô amoh H'Sêrua.

²⁷ Aơ jêng nau păng dâk tâm rdâng đah hađăch: Y-Salômôn ndâk Milô, njĭr tay ntŭk lĕ bluh mpêr ƀon Đavit, jêng ƀon mbơ̆ păng hŏ ndâk.

²⁸ Nôk nây, Y-Jêrôbôam jêng du huê ngăch prăl jêh ri geh nau dơi. Y-Salômôn saơ păng hôm ndăm jêh ri geh blau rĭ dĭng dơm păng jêng kôranh ma lĕ rngôch nau pah kan jâk ngih Yôsep.

²⁹ Du nar, Y-Jêrôbôam hăn luh bơh Yêrusalem, păng tâm mâp đah Y-Ahija, nơm mbơh lor gŭ ta Silô, dôl nsoh du ao rjai mhe. Nôk nây, knŏng geh bar hê khân păng gŭ êng tâm mir.

³⁰ Y-Ahija sŏk ao mhe păng dôl nsoh, nkhêk lơi păng tâm jât ma bar nchroi.

³¹ Jêh nây păng lah ma Y-Jêrôbôam: “Sŏk hom jât nchroi ma may, yorlah Yêhôva Brah Ndu Israel lah: ‘Aơ, Gâp mra nkhêk lơi ƀon bri hađăch bơh ti Y-Salômôn jêh ri jao ma may jât ndŭl mpôl.

³² Ƀiălah yor ma oh mon Gâp jêng Y-Đavit jêh ri yor Yêrusalem, ƀon Gâp hŏ săch jêh ta nklang lĕ rngôch ndŭl mpôl phung Israel, rĭ dĭng hôm klen du ndŭl mpôl ma noi deh Y-Salômôn.

³³ Yorlah khân păng hŏ chalơi jêh Gâp gay yơk mbah ma brah bu ur Astarôt phung Sidôn, brah Chêmôs phung Môap, jêh ri brah Milkôm phung Ammôn. Khân păng mâu chuat hăn ôh tĭng nâm lĕ trong Gâp gay ƀư nau di tanăp măt Gâp, jêh ri mâu đŏng djôt prăp lĕ nau vay dăp jêh ri lĕ nau vay ƀư bơh Gâp nâm bu Y-Đavit, chô yau khân păng.

³⁴ Ƀiălah, Gâp mâu mra sŏk lơi ôh lĕ rngôch ƀon bri hađăch tă bơh ti Y-Salômôn, ƀiălah Gâp mra njêng păng ƀư hađăch lôch du njăr rêh păng, yor ma Y-Đavit, oh mon Gâp hŏ săch jêh, nơm djôt prăp jêh lĕ nau vay ntăm jêh ri lĕ nau vay dăp bơh Gâp.

³⁵ Ƀiălah Gâp mra sŏk lơi ƀon bri hađăch tă bơh ti kon bu klâu păng, ăn ma may jât ndŭl mpôl.

³⁶ Gâp mra prăp du ndŭl mpôl ma kon bu klâu păng, gay ăn ma Y-Đavit, oh mon Gâp, dơi geh bunuyh thoi sưng hađăch n'ho ro tanăp măt Gâp ta Yêrusalem, jêng ƀon Gâp săch jêh gay dơm amoh Gâp ta nây.

³⁷ Gâp mra săch jêh ri njêng may ƀư hađăch phung Israel; may mra chiă uănh lĕ n'gor tĭng nâm nuih n'hâm may ŭch.

³⁸ Tơlah may tông bâr nau vay Gâp ntăm, hăn tĭng ndô̆ lĕ trong Gâp, ƀư nau di tanăp măt Gâp, djôt prăp lĕ nau vay dăp jêh ri lĕ nau ntăm bơh Gâp nâm bu oh mon Gâp jêng Y-Đavit hŏ ƀư jêh, Gâp mra gŭ ndrel ma may, njêng ma may du nau chiă uănh nâp ktang nâm bu Gâp hŏ njêng jêh ma Y-Đavit, jêh ri Gâp mra ăn phung Israel ma may.

³⁹ Tâm ban pônây, Gâp mra ƀư nau bêk prêng ma noi deh Y-Đavit, ƀiălah mâu geh mro mrăng ôh.’”

⁴⁰ Y-Salômôn joi nau gay nkhĭt Y-Jêrôbôam, ƀiălah Y-Jêrôbôam dâk nchuăt jêh rlet ma Êjipt, văch tât ma Y-Sisăk, hađăch n'gor Êjipt, jêh nây gŭ ta nây kŏ tât Y-Salômôn khĭt.

Y-Salômôn khĭt

⁴¹ Lĕ nau kan êng Y-Salômôn, lĕ rngôch nau hađăch hŏ ƀư, jêh ri nau blau mĭn hađăch bu nchih tâm ndrom samƀŭt nau rêh jêng Y-Salômôn.

⁴² Y-Salômôn chiă uănh lĕ rngôch phung Israel puăn jât năm tâm Yêrusalem.

⁴³ Y-Salômôn khĭt hăn gŭ ndrel ma phung chô yau păng jêh ri bu tâp păng tâm ƀon Đavit, mbơ̆ păng. Kon bu klâu hađăch jêng Y-Rôbôam chiă uănh thoi ntrok păng.