I Phung Hađăch 10 - Nau Brah Ndu Ngơi 2023

Hađăch bu ur Sêba hăn khâl

¹ Hađăch bu ur n'gor Sêba tăng lư Y-Salômôn yor amoh Brah Yêhôva, păng văch tât gay ŭch rlong uănh Y-Salômôn âk nau hôr dŭt jêr.

² Păng văch tât ma ƀon Yêrusalem nđâp ma phung hăn tĭng âk ngăn, geh âk seh samô rdeng dak si ƀâu kah jêh ri du rnoh mah âk ngăn nđâp ma lŭ khlay. Păng lĕ hăn mâp jêh ma hađăch Salômôn jêh ri lah ma hađăch lĕ rngôch nau păng mĭn tâm trôm nuih n'hâm păng.

³ Y-Salômôn plơ̆ sĭt lah lĕ rngôch nau păng ôp, mâu geh ôh du nau ôp jêng pôn ndâp ir gay ma hađăch mâu dơi rblang ma păng.

⁴ Tơlah hađăch bu ur n'gor Sêba saơ jêh lĕ nau blau mĭn bơh Y-Salômôn, ngih hađăch hŏ ndâk jêh,

⁵ lĕ ndơ sông sa ta klơ sưng sông hađăch, rnơl gŭ ma phung kôranh păng, nau pah kan jêh ri ndơ nsoh khân păng, lĕ ntil ndrănh hađăch, jêh ri lĕ ndơ ƀư brah gŭch hađăch nhhơr tâm ngih Brah Yêhôva, bu ur nây hih rhâl hâu ngăn.

⁶ Păng lah ma hađăch: “Lĕ nau gâp hŏ tăng tă bơh n'gor gâp ma may jêh ri nau blau mĭn may, di ngăn.

⁷ Ƀiălah êlor ma gâp tât ta aơ, jêh ri mâu hŏ saơ ma măt ôh lĕ nau aơ, ri dĭng gâp mâu ŭch iăt. Nau bu nkoch ma gâp gĭt ê hŏ dơi du n'gul klong! Nau gĭt mĭn jêh ri nau may ndrŏng ngăn ngên păng jêng rmeh rlau lơn ma lĕ nau gâp hŏ tăng jêh.

⁸ Phung ur hađăch geh nau ueh lăng ngăn! Phung kơl kan hađăch, phung gŭ panăp may ƀaƀơ jêh ri tăng nau blau mĭn may, geh nau ueh lăng ngăn!

⁹ Mât ton ma Yêhôva Brah Ndu may, Nơm hŏ maak nuih n'hâm n'gân may gŭ ta sưng hađăch phung Israel! Yorlah Brah Yêhôva rŏng ma phung Israel kŏ tât ƀaƀơ n'ho ro, yor ri Păng hŏ njêng jêh may ƀư hađăch gay ƀư nau di jêh ri nau sŏng.”

¹⁰ Jêh nây hađăch bu ur n'gor Sêba nhhơr ma hađăch pe rbăn prao rhiăng kilô mah, jêh ri dŭt âk dak si ƀâu kah n'hanh ma lŭ khlay. Mâu hôm mâp geh ôh bu djôt leo dak si ƀâu kah âk tâm ban hađăch bu ur n'gor Sêba ăn jêh ma hađăch Salômôn.

¹¹ Jêh ma nây, âk bôk kumpăn Y-Hiram rdeng mah tă bơh n'gor Ôphir, rdeng đŏng tơm si rte jêh ri lŭ khlay âk râk ngăn.

¹² Hađăch sŏk tơm si rte nây ƀư jrŏng gâng ma ngih Brah Yêhôva jêh ri ngih hađăch, ƀư gong rêng loih jêh ri gong rêng ma phung mprơ. Ntơm bơh nây kŏ tât nar aơ, mâu geh ôh bu djôt leo tât Yêrusalem mâu lah rnoh tơm si rte âk kơt nĕ.

¹³ Hađăch Salômôn ăn ma hađăch bu ur n'gor Sêba lĕ rngôch ndơ păng ŭch jêh ri dăn, mâu kơp lĕ ndơ Y-Salômôn hŏ ăn păng tĭng nâm nuih n'hâm lŏng hađăch. Jêh nau nây, hađăch bu ur jêh ri phung tǐng păng hăn sĭt ma bri khân păng nơm.

¹⁴ Rnoh mah hađăch Salômôn sŏk tâm ăp năm njing jâk klăp lah tât bar jât tân,

¹⁵ mâu kơp ôh rnoh mah sŏk bơh phung tăch rgâl, tâm nau rgâl đah mpôl tăch rgâl, tă bơh lĕ rngôch phung hađăch Arabi jêh ri bơh phung kôranh chiă uănh tâm bri dak djôt leo chê̆ pi.

¹⁶ Hađăch Salômôn ƀư bar rhiăng mlâm khêl toyh bu chiăr ndop mah, tâm ăp khêl dŏng pơh kilô mah.

¹⁷ Hađăch ƀư đŏng pe rhiăng mlâm khêl jê̆, bu chiăr ndop ma mah, tâm ăp khêl dŏng bar kilô mah. Hađăch dơm lĕ khêl nây tâm ngih Bri Krŏng Liban.

¹⁸ Hađăch ƀư đŏng du mlâm sưng hađăch toyh ma la, mblum păng ma mah chrêk.

¹⁹ Sưng hađăch nây geh prao bak gung hao. Ta klơ ntŭk nsing ndŭr kơi sưng hađăch geh bar rup rvang, bar đah ding gŭ geh ntŭk rkơl ti, jêh ri ăp đah ntŭk rkơl ti geh du mlâm rup yau mŭr dâk êp meng.

²⁰ Rlau ma nây geh đŏng jât ma bar rup yau mŭr êng dâk ta klơ prao bak gung hao ta bar đah nây. Mâu hŏ geh ôh ƀon bri hađăch êng ƀư sưng hađăch tâm ban pônây.

²¹ Lĕ rngôch kachok dŏng gay nhêt hađăch Salômôn ƀư đah mah da dê, jêh ri lĕ rngôch ndơ dŏng tâm ngih Bri Krŏng Liban ƀư đah mah kloh da dê. Mâu geh ôh ndơ dŏng ƀư đah prăk, yorlah tâm rnôk hađăch Salômôn, prăk mâu geh nau khlay ôh.

²² Tâm ăp pe năm, mpôl kumpăn hăn tât ta Tarsis păng rgăn dak mƀŭt ndrel ma mpôl kumpăn hađăch Hiram, djôt leo sĭt mah, prăk, la rveh, dôk jêh ri brak.

²³ Pônây, hađăch Salômôn rlau lơn ma lĕ rngôch phung hađăch ta neh ntu tâm nau ndrŏng jêh ri nau blau mĭn.

²⁴ Lam lĕ neh ntu ŭch tâm mâp đah Y-Salômôn gay iăt nau blau mĭn Brah Ndu hŏ dơm jêh tâm nuih n'hâm hađăch.

²⁵ Mbu hăn mâp hađăch, djôt leo da dê ndơ nhhơr nâm bu: lĕ ndơ dŏng ƀư ma prăk jêh ri ma mah, ao mbâl, ao loih, dak si ƀâu kah, seh jêh ri seh bri.

²⁶ Y-Salômôn bun rgum âk ndeh seh jêh ri phung tahan ncho seh; hađăch geh du rbăn puăn rhiăng bôk ndeh jêh ri du rmưn bar rbăn phung tahan ncho seh tâm lĕ ƀon geh ndeh seh jêh ri ta ƀon Yêrusalem, dăch kêng hađăch.

²⁷ Ta ƀon Yêrusalem, hađăch hŏ ƀư jêh prăk jêng mâu nă khlay ôh nâm bu lŭ, jêh ri tơm si sêdar âk nâm bu tơm si sikamôr tâm n'gor Sêphêla.

²⁸ Hađăch Salômôn rvăt âk seh bơh Êjipt, jêh ri n'gor Kuê du phung sâm tăch drăp ăn ma hađăch rvăt tă bơh n'gor Kuê tâm di rnoh.

²⁹ Ăp bôk ndeh rvăt bơh n'gor Êjipt tâm rnoh klăp lah pơh kilô prăk, bi ăp mlâm seh rnoh klăp lah bar kilô prăk. Hađăch phung Hitit jêh ri hađăch Aram sâm đă phung tăch rgâl ăn ma hađăch rvăt tĭng nâm rnoh nây.