I Phung Hađăch 1 - Nau Brah Ndu Ngơi 2023

Rnôk Y-Salômôn chiă uănh ( 1:1 – 11:43 ) Nau ranh hađăch Đavit

¹ Hađăch Đavit hŏ ranh jêh, nđâp lah bu ntâk ăn păng ma âk phôi, păng ăt mâu răm lĕ.

² Phung oh mon păng lah ma păng: “Ăn bu joi ma hađăch jêng kôranh gâp du huê bu ur druh tang tat, ăn păng pah kan ma hađăch jêh ri mât mray hađăch. Păng mra lâng ta ntang ntơh may, gay ma hađăch jêng kôranh gâp dơi geh nau răm.”

³ Pôri khân păng joi du huê bu ur druh ueh tâm lam n'gor Israel, jêh ri saơ H'Abisak, bunuyh Sunamit, jêh nây leo păng ma hađăch.

⁴ Bu ur druh aơ ueh ngăn. Păng mât mray jêh ri pah kan ma hađăch, ƀiălah hađăch mâu gŭ ôh nsum đah păng.

Y-Adônija kơp êng păng nơm jêng hađăch

⁵ Rnôk nây Y-Adônija, kon bu klâu H'Hagit, n'hao êng păng nơm pô aơ: “Gâp mra jêng hađăch.” Păng ndrăp ma păng nơm du bôk ndeh, seh tâm lơh, jêh ri prăm jât nuyh nchuăt panăp păng.

⁶ Mbơ̆ păng mâu mâp buay lơi ôh păng ma nau ôp: “Mâm ƀư may ƀư pônây?” Y-Adônija jêng du huê bu klâu ueh ngăn jêh ri bu deh ma păng groi Y-Apsalôm.

⁷ Y-Adônija tâm nchră đah Y-Jôap, kon H'Sêruya jêh ri ndrel ma kôranh ƀư brah Y-Abiathar; jêh ri khân păng ŭch tĭng mpeh Y-Adônija jêh ri kơl păng.

⁸ Ƀiălah kôranh ƀư brah Y-Sadôk, Y-Bênaya kon Y-Jêhôida, nơm mbơh lor Y-Nathan, Y-Simei, Y-Rei, jêh ri phung tahan janh ktang Y-Đavit mâu ŭch tĭng mpeh Y-Adônija.

⁹ Y-Adônija nhhơr mpa ƀư brah ma biăp, ndrôk, jêh ri mpô mpa lay êp ta meng lŭ Sôhêlet, dăch dak n'hor Ên-Rôgel. Păng jă lĕ rngôch phung oh nâu păng jêng phung kon bu klâu hađăch, jêh ri lĕ rngôch phung kôranh Yuđa pah kan tâm ngih hađăch hăn tât râng ndrel.

¹⁰ Ƀiălah păng mâu jă ôh nơm mbơh lor Y-Nathan, Y-Bênaya, phung kôranh tahan janh ktang, jêh ri mâu lĕ jă oh păng jêng Y-Salômôn.

Y-Salômôn jêng hađăch

¹¹ Nôk nây, Y-Nathan lah ma H'Batsêba, mê̆ Y-Salômôn: “Ay mâu mâp tăng hĕ ma Y-Adônija, kon H'Hagit, lĕ jêng hađăch, ƀiălah Y-Đavit, kôranh he, mâu gĭt ôh nau nây?

¹² Aƀaơ aơ, gâp mra ntĭm leo ma ay du nau nchră gay rklaih nau rêh ay jêh ri nau rêh kon ay jêng Y-Salômôn.

¹³ Hăn hom mpơl măt tanăp hađăch Đavit jêh ri lah pô aơ: ‘Hơi hađăch, kôranh gâp! Mâu di hĕ hađăch lĕ sơm ton đah oh mon bu ur may pô aơ: “Kon bu klâu may jêng Y-Salômôn nanê̆ mra chiă uănh thoi ntrok may jêh ri păng mra gŭ ta sưng hađăch gâp?” Pônây, mâm dĭng Y-Adônija ƀư đŏng hađăch?’

¹⁴ Dôl ay hôm e ngơi ma hađăch tâm ban pônây, gâp nơm tâm ban lĕ mra lăp pakơi ay, jêh ri ăn n'hêl nanê̆ nau ay ngơi.”

¹⁵ Pôri H'Batsêba hăn tât tâm mâp ma hađăch tâm jrô păng. Hađăch lĕ ranh ngăn jêh; geh H'Abisak, bunuyh Sunamit, gŭ pah kan ma hađăch.

¹⁶ H'Batsêba chon mon mbah tanăp măt hađăch. Hađăch lah: “Moh nau ay ŭch?”

¹⁷ Păng plơ̆ lah ma păng: “Hơi kôranh gâp! May nơm lĕ sŏk amoh jêh Yêhôva Brah Ndu may gay sơm ton ma oh mon bu ur may pô aơ: ‘Y-Salômôn, kon bu klâu may mra chiă uănh thoi ntrok gâp, jêh ri mra gŭ ta sưng hađăch.’

¹⁸ Ƀiălah aƀaơ ri, Y-Adônija ƀư hađăch, hađăch nơm jêng kôranh gâp mâu gĭt đŏng nau nây.

¹⁹ Y-Adônija lĕ nhhơr mpa ƀư brah jêh ma ndrôk nkuăng, mpô mpa lay, jêh ri biăp âk ngăn. Kon bu klâu hađăch jă đŏng lĕ rngôch phung kon bu klâu hađăch êng êng, nđâp ma kôranh ƀư brah Y-Abiathar jêh ri kôranh chiă uănh lĭng tahan jêng Y-Jôap, ƀiălah păng mâu jă ôh Y-Salômôn, oh mon may.

²⁰ Hơi hađăch jêng kôranh gâp! Lĕ rngôch măt phung Israel rle uănh ma may, kâp uănh ma may mbơh ma khân păng gĭt mbu nơm mra gŭ ta sưng hađăch gay chiă uănh thoi ntrok may.

²¹ Gâp klach lah tơlah hađăch kôranh gâp khĭt gŭ ndrel ma phung chô yau, gâp jêh ri kon bu klâu gâp jêng Y-Salômôn bu mra phat tâm ban phung geh nau tih.”

²² Dôl păng hôm e tâm ngơi đah hađăch, nơm mbơh lor Y-Nathan tât lăp.

²³ Bu văch tât mbơh ma hađăch: “Geh nơm mbơh lor Y-Nathan văch ta aơ.” Y-Nathan mpơl măt tanăp hađăch, chon mon mbah tanăp hađăch.

²⁴ Y-Nathan lah: “Hơi hađăch jêng kôranh gâp! Di lĕ may hŏ lah pô aơ: ‘Y-Adônija mra chiă uănh thoi ntrok gâp jêh ri păng mra gŭ ta sưng hađăch gâp’?

²⁵ Yor nây, nar aơ, kon bu klâu hađăch hŏ hăn trŭnh nhhơr mpa ƀư brah jêh ma ndrôk, mpa lay, jêh ri biăp âk ngăn, jêh nây lĕ jă jêh lĕ rngôch phung kon bu klâu hađăch, phung kôranh lĭng tahan, jêh ri kôranh ƀư brah Y-Abiathar. Ri, khân păng sông sa nhêt tanăp măt Y-Adônija jêh ri nter lah: ‘Hađăch Adônija mro mrăng!’

²⁶ Bi gâp oh mon may, kôranh ƀư brah Y-Sadôk, Y-Bênaya kon bu klâu Y-Jêhôida, jêh ri oh mon hađăch jêng Y-Salômôn, păng mâu jă ôh.

²⁷ Nau kan aơ mâu hĕ luh tă bơh hađăch? Yorlah hađăch mâu ăn ôh phung oh mon hađăch gĭt mbu nơm mra dơi gŭ ta sưng hađăch gay chiă uănh thoi ntrok ma hađăch jêng kôranh gâp.”

Y-Salômôn dơi gŭ ta sưng hađăch

²⁸ Hađăch Đavit lah: “Kuăl hom H'Batsêba ma gâp.” Păng lăp jêh ri dâk tanăp măt hađăch.

²⁹ Y-Đavit sơm ton pô aơ: “Tĭng nâm Brah Yêhôva gŭ rêh mro mrăng, Nơm hŏ sâm rklaih jêh gâp luh tă bơh lĕ rngôch nau rêh ni, mbơh ma gâp!

³⁰ Di nâm gâp hŏ sŏk amoh Yêhôva Brah Ndu phung Israel sơm ton jêh ma may pô aơ: ‘N'hêl nanê̆ kon bu klâu may jêng Y-Salômôn mra chiă uănh thoi ntrok gâp, păng mra gŭ ta sưng hađăch ntrok gâp’, pônây ro nar aơ, gâp mra ƀư nau nây.”

³¹ H'Batsêba păn muh măt ta neh, mbah tanăp măt hađăch jêh ri lah: “Ăn hađăch Đavit, kôranh gâp, mro mrăng!”

³² Hađăch Đavit lah: “Kuăl hom ma gâp: kôranh ƀư brah Y-Sadôk, nơm mbơh lor Y-Nathan, jêh ri Y-Bênaya, kon bu klâu Y-Jêhôida.” Khân păng văch tât mpơl măt tanăp hađăch.

³³ Jêh nây hađăch lah ma khân păng: “Djôt leo hom phung oh mon kôranh khân may hăn tĭng, chông Y-Salômôn, kon bu klâu gâp, hao ncho seh bri gâp nơm, jêh nây njŭn păng trŭnh ta dak n'hor Gihôn.

³⁴ Ta nây, kôranh ƀư brah Y-Sadôk jêh ri nơm mbơh lor Y-Nathan, tŏ dak ƀâu kah ma păng ƀư hađăch phung Israel. Khân may uh nŭng hom, jêh nây nter lah pô aơ:

³⁵ ‘Hađăch Salômôn mro mrăng!’ Khân may mra hăn hao tĭng pakơi hađăch, jêh nây hađăch mra văch gŭ ta sưng hađăch gâp, chiă uănh ntrok gâp. Nây jêng nơm gâp hŏ njêng jêh ƀư hađăch phung Israel jêh ri phung Yuđa.”

³⁶ Y-Bênaya, kon bu klâu Y-Jêhôida plơ̆ sĭt lah ma hađăch: “Amen! Dăn ma Yêhôva Brah Ndu hađăch jêng kôranh gâp ŭch lah tâm ban pônây đŏng.

³⁷ Tâm ban Brah Yêhôva gŭ jêh ndrel ma hađăch kôranh gâp, pônây đŏng dăn Păng gŭ ndrel ma Y-Salômôn, jêh ri ƀư ăn sưng hađăch păng jêng toyh lơn ma sưng hađăch Đavit, jêng kôranh gâp!”

³⁸ Pôri kôranh ƀư brah Y-Sadôk hăn trŭnh ta Gihôn ndrel ma nơm mbơh lor Y-Nathan, Y-Bênaya kon bu klâu Y-Jêhôida, phung Chêrêthit jêh ri phung Pêlêthit. Khân păng chông Y-Salômôn hao ncho seh bri hađăch Đavit jêh ri njŭn leo trŭnh ta dak n'hor Gihôn.

³⁹ Kôranh ƀư brah Y-Sadôk sŏk nke dơm dak ƀâu kah tă tâm Ngih Bok jêh ri tŏ ta Y-Salômôn. Khân păng uh nŭng, jêh nây lĕ rngôch phung ƀon lan nter lah: “Hađăch Salômôn mro mrăng!”

⁴⁰ Lĕ rngôch phung ƀon lan hăn hao tĭng ndô̆ hađăch. Khân păng uh n'hôm jêh ri nter huy hâk răm ngăn kŏ tât neh ntu n'gơ n'găr bơh nau troh nter khân păng.

⁴¹ Nhêt sông lôch jêh, Y-Adônija jêh ri lĕ rngôch phung râng nhêt sông dôl gŭ ndrel ma păng tăng bâr troh nter nây. Tăng nteh nŭng, Y-Jôap ôp: “Mâm ƀư tâm ƀon geh nter drơu drơu kơt nĕ?”

⁴² Dôl păng ngơi, Y-Jônathan kon bu klâu kôranh ƀư brah Y-Abiathar tât. Y-Adônija lah: “Lăp hom aơ, may jêng du huê bunuyh khư yơk, n'hêl nanê̆ mra leo Nau Mhe Mhan Ueh.”

⁴³ Ƀiălah Y-Jônathan plơ̆ lah ma Y-Adônija: “Mâu di pônây ôh, yorlah hađăch Đavit, kôranh he, njêng jêh Y-Salômôn ƀư hađăch.

⁴⁴ Hađăch đă kôranh ƀư brah Y-Sadôk, nơm mbơh lor Y-Nathan, Y-Bênaya kon bu klâu Y-Jêhôida, phung Chêrêthit jêh ri phung Pêlêthit hăn tĭng Y-Salômôn; khân păng chông păng hao ncho seh bri hađăch.

⁴⁵ Ta Gihôn, kôranh ƀư brah Y-Sadôk jêh ri nơm mbơh lor Y-Nathan tŏ jêh dak ƀâu kah ma Y-Salômôn ăn jêng hađăch. Jêh nây tă bơh nĕ khân păng hăn hao ma nau hâk răm jêh ri lĕ ƀon nteh drơu drơu da dê. Nây ro yơh jêng nteh khân may hŏ tăng.

⁴⁶ Aƀaơ aơ, Y-Salômôn gŭ jêh ta sưng hađăch.

⁴⁷ Rlau lơn ma nĕ, phung oh mon hađăch văch tât mât ton ma hađăch Đavit, kôranh he, pô aơ: ‘Dăn ma Brah Ndu may ƀư ma amoh Y-Salômôn lư n'găr lơn ma amoh may, jêh ri ƀư ăn sưng hađăch Salômôn tâm nau toyh lơn ma sưng hađăch may!’ Jêh nây Y-Đavit nơm chon mon ta klơ sưng bê̆ch păng,

⁴⁸ jêh ri mât ton ma Kôranh Brah: ‘Tâm rnê ma Yêhôva Brah Ndu phung Israel, jêng Nơm hŏ ăn ma du huê gŭ ta sưng hađăch gâp nar aơ, măt gâp nơm uănh saơ.’”

⁴⁹ Nôk nây, lĕ rngôch phung râng nhêt sông ndrel ma Y-Adônija klach râm sâr da dê jêh ri dâk, ăp nơm hăn trong êng êng.

⁵⁰ Y-Adônija tâm ban đŏng klach ma Y-Salômôn, pôri păng dâk hăn sĭt jêh ri kuăn ta nke nơng.

⁵¹ Geh bunuyh hăn nkoch ma Y-Salômôn pô aơ: “Aơ, Y-Adônija klach ma hađăch Salômôn. Păng hŏ kuăn ta nke nơng ƀư brah jêh ri lah pô aơ: ‘Nar aơ, dăn ma hađăch Salômôn sơm ton ma gâp pô aơ hađăch mâu mra nkhĭt ôh oh mon hađăch ma đao.’”

⁵² Y-Salômôn lah: “Tơlah păng mpơl păng nơm jêng du huê bunuyh mleh ngăn, mâu geh ôh du brai sŏk păng mra rŭng ôh ta neh. Ƀiălah tơlah bu joi saơ geh saơ nau djơh mhĭk tâm păng, nanê̆ păng mra khĭt.”

⁵³ Jêh nây hađăch Salômôn prơh bunuyh hăn ma Y-Adônija đă jŭr bơh nơng ƀư brah. Y-Adônija hăn tât chon mon mbah tanăp măt hađăch Salômôn jêh ri hađăch ntăm: “Plơ̆ sĭt hom ma ngih may.”