I Pêtrôs 3 - Nau Brah Ndu Ngơi 2023

Nau vay ur sai

¹ Tâm ban lĕ, phung bunuyh ƀư ur, tông hom ma sai khân ay nơm, gay ma tơlah geh ƀaƀă sai nđâp lah mâu tông prăp ma nau chroh, ƀiălah tă bơh nau gŭ ngao bơh ur, khân păng mra plơ̆ sĭt, mâu ŭch dŏng ma nau ngơi,

² yorlah khân păng saơ jêh nau kloh rsang jêh ri nau klach yơk tâm nau gŭ rêh bơh khân ay.

³ Lơi uănh khlay nau nkrơ̆ padih nâm bu păch sŏk rlau keh ir, dok văn mah, nsoh kho ao mâu tâm di;

⁴ ƀiălah nkrơ̆ hom bunuyh ndâp tâm trôm ma nau ueh mâu blau ôm rai tâm nuih n'hâm rdơ̆ rbăn jêh ri gŭ rklăk; nây jêng nau khlay dŭt hâu tanăp Brah Ndu.

⁵ Yorlah phung bu ur kloh ueh rnôk kăl e, phung bunuyh kâp gân tâm Brah Ndu jêh ri blau tông ma sai khân păng, nkrơ̆ kơt nĕ đŏng;

⁶ nâm bu H'Sara tông ma Y-Abraham, kuăl păng jêng kôranh. Tơlah khân ay ƀư nau ueh, mâu geh du ntil ƀư ma khân ay rvê klach, khân ay jêng kon bu ur H'Sara yơh.

⁷ Phung bunuyh ƀư sai tâm ban lĕ, tâm mpơl hom nau gĭt rbăng nôk khân may gŭ rêh ndrel ma ur khân may nơm, yơk ur nâm bu đah phung rdja lơn, yorlah khân păng mra ndrel ma khân may dơn nau rêh bơh nau yô̆, gay mâu geh du ntil ndơ king nau khân may mbơh sơm.

Rêh ni yor ƀư nau ueh

⁸ Nglĕ dŭt, ăn lĕ rngôch khân may geh nuih n'hâm jêng nguay, blau yô̆, rŏng oh nâu tâm Kôranh Brah, geh nuih n'hâm ueh jêh ri nuih n'hâm dêh rhêt.

⁹ Lơi sŏk nau mhĭk mplơ̆ sĭt nau mhĭk mâu lah sŏk nau rak rtăp mplơ̆ sĭt nau rak rtăp; ƀiălah, ăn hom nau ueh uĭn, yorlah nây khân may geh nau kuăl, gay ma khân may dơn nau ueh lăng.

¹⁰ Yorlah: “Mbu nơm ŭch rŏng ma nau rêh Jêh ri saơ lĕ nar ueh, Nkân hom mpiăt păng nơm bơh nau mhĭk, Jêh ri trôm mbung păng lơi ngơi nau ndơm;

¹¹ Der hom nau mhĭk, ƀư nau ueh, Joi hom nau đăp mpăn jêh ri hăn tĭng păng.

¹² Yorlah măt Kôranh Brah treng uănh ma phung sŏng srăng, Jêh ri tôr Păng kâp iăt nau khân păng mbơh sơm. Ƀiălah muh măt Kôranh Brah tâm rdâng đah phung ƀư mhĭk.”

¹³ Tơlah khân may duh nđơr ƀư nau ueh, mbu ƀư mhĭk ma khân may?

¹⁴ Ƀiălah tơlah khân may dơn nau rêh ni yor nau sŏng srăng, khân may geh ueh lăng ngăn. Lơi klach ma nau khân păng klach, mâu đŏng rdja nuih n'hâm;

¹⁵ ƀiălah ăn khân may yơk ma Brah Krist jêng kloh ueh, Kôranh Brah tâm nuih n'hâm khân may. Ăn khân may gŭ njrăng ƀaƀơ gay dơi plơ̆ lah ma nau yơk jêh ri nau rdơ̆ ma mbu nơm ôp ăn gĭt ma nau khân may kâp gân.

¹⁶ Nôk geh nau ngơi mhĭk, ăn khân may djôt prăp nuih n'hâm sŏng khân may nơm ăn kloh, gay ma phung nsak nkhăng ma nau khân may gŭ ngao ueh tâm Brah Krist geh nau đit prêng.

¹⁷ Yorlah tơlah nây jêng nau mĭn Brah Ndu ŭch, pôri ueh lơn ƀư nau ueh jêh ri dơn nau rêh ni, đah ƀư nau mhĭk.

¹⁸ Brah Krist hŏ yor ma nau tih, khĭt du tơ̆ rĭng jêh, jêng Nơm sŏng srăng tâm tang an ma phung mâu sŏng srăng, gay ma njŭn leo he văch ma Brah Ndu; bu nkhĭt jêh Păng tâm nglay săk, ƀiălah tâm huêng Păng dâk rêh jêh;

¹⁹ tâm huêng nuih n'hâm nây, Păng hăn mbơh nkoch jêh ma phung huêng gŭ tâm trôm ndrung,

²⁰ jêng phung kăl e mâu tông ôh Brah Ndu, nôk Păng srôih gŭ kâp tâm rnôk Y-Nôê, tâm lĕ mông nar ƀư kumpăn. Tâm kumpăn geh knŏng djê̆ bunuyh, lĕ rngôch jêng pham bunuyh, dơi klaih bơh dak.

²¹ ƀaptem nar aơ jêng nau tâm ntĭt ma nau nây gay rklaih khân may; ƀaptem jêng mâu di sŏk lơi nau ƀơ̆ ƀơch luh bơh săk jăn, ƀiălah nau kuăl dăn ma Brah Ndu tă bơh nuih n'hâm sŏng kloh, ma nau Brah Yêsu Krist dâk rêh tay,

²² jêng Nơm hao jêh ta klơ trôk, dôl gŭ pa ma Brah Ndu, geh phung tông mpăr, phung chiă uănh jêh ri lĕ rngôch nau ktang yơk tâm Păng da dê.