I Pêtrôs 2 - Nau Brah Ndu Ngơi 2023

Brah Yêsu Krist jêng lŭ njônh ngih

¹ Pôri, khân may chalơi hom lĕ nau janh ƀai, ƀlêp ƀlêr, nuih n'hâm nklă, mâu nach jêh ri lĕ nau ngơi nchơt.

² Khân may ji hir hom ma dak toh brah kloh rsang nâm bu kon se mhe deh, gay tă bơh nĕ khân may văch ma toyh ma nau tâm rklaih,

³ tơlah khân may hŏ chiăm ăn gĭt Kôranh Brah jêng njŭng ngăn.

⁴ Văch dăch hom ta Păng jêng lŭ rêh, kon bunuyh mƀăr lơi jêh, ƀiălah Brah Ndu săch jêh ri jêng geh nau khlay ngăn.

⁵ Ăn Păng dŏng hom khân may nâm bu lŭ rêh gay rdâk du mlâm ngih brah, jêh ri tă bơh Brah Yêsu Krist, khân may kan kôranh ƀư brah kloh ueh, gay nhhơr ndơ ƀư brah, ƀư maak nuih n'hâm Brah Ndu.

⁶ Yorlah Nau Brah Ndu Ngơi nchih: “Aơ, Gâp dơm ta Siôn du mlâm lŭ, Lŭ njônh ngih Gâp săch jêh ri khlay ngăn; Mbu nơm chroh lŭ nây mâu đit prêng ôh.”

⁷ Pônây, ma khân may jêng phung chroh jêh, Păng jêng khlay; ƀiălah ma phung mâu chroh, pô ri: “Lŭ phung ƀư ngih mƀăr lơi jêh, Plơ̆ jêng lŭ njônh ngih,”

⁸ jêh ri jêng “Lŭ ƀư chêh jâng, Lŭ toyh ƀư chêh prah bu;” Khân păng chêh prah yorlah mâu tông prăp ma nau chroh, tâm ban ma tâm nal jêh ma khân păng.

⁹ Ƀiălah khân may jêng phung Brah Ndu săch jêh, jêng phung kôranh ƀư brah ta ngih hađăch, jêng phung mpôl kloh ueh, jêng phung ƀon lan sŏk prăp ma Brah Ndu, gay ma khân may mbơh nkoch nau ueh dŭt toyh Nơm kuăl jêh khân may luh bơh ntŭk ngo, njŭn lăp ntŭk ang khlay Păng.

¹⁰ kăl e ri khân may mâu di jêng du phung ƀon lan ôh, ƀiălah aƀaơ jêng phung ƀon lan Brah Ndu; kăl e ri mâu dơi yô̆ nđach ôh, ƀiălah aƀaơ geh jêh nau yô̆ nđach.

Mât mray păng nơm ta nklang phung bu năch

¹¹ Hơi phung gâp rŏng, khân may nâm bu phung bu năch, phung gŭ njưh ƀât lât; gâp vơl dăn ma khân may ver hom lĕ nau kơnh ŭch nglay săk, jêng nau tâm rdâng đah huêng.

¹² Ăn khân may gŭ ngao sŏng ta nklang phung bu năch, gay ma tơlah khân păng ngơi mhĭk khân may jêng bunuyh djơh mhĭk, khân păng ăt saơ nau ueh khân may ƀư jêh ri tâm rnê Brah Ndu tâm nar Păng chop khâl.

Nau kan đah kôranh chiă uănh bri dak

¹³ Yor Kôranh Brah, tông hom lĕ rngôch nau dơi kon bunuyh, mâu lah đah hađăch jêng bunuyh geh nau dơi toyh lơn,

¹⁴ mâu lah phung kôranh n'gor jêng phung bunuyh hađăch njuăl tât gay ma tâm rmal phung ƀư nau mhĭk jêh ri tâm rnê ma phung ƀư nau ueh.

¹⁵ Yorlah nau mĭn Brah Ndu ŭch ăn khân may ƀư nau ueh gay ƀư rklăk nau ngơi djơh tă bơh phung rluk mâl.

¹⁶ Jêng oh mon Brah Ndu, khân may gŭ rêh hom tâm ban ma phung bunuyh kon me, ƀiălah mâu dŏng ôh nau kon me khân may nơm ƀư bok nkŭm nau djơh mhĭk.

¹⁷ Yơk hom ma lĕ rngôch bunuyh, rŏng ma phung oh nâu tâm nau rnơm, klach yơk ma Brah Ndu, yơk ma hađăch.

Brah Krist leo trong tâm nau rêh ni

¹⁸ Jêng phung oh mon, khân may tông hom ma phung kôranh khân may nơm ma lĕ nuih n'hâm klach yơk, mâu knŏng ma phung kôranh rdơ̆ rbăn, ueh ngăn, ƀiălah nđâp ma phung kôranh geh nau mĭn mhĭk tâm ban lĕ.

¹⁹ Tơlah yor nau gĭt năl Brah Ndu khân may dơn nau nđêh nji, nau rêh ni tâm nau mâu sŏng, nau nĕ jêng nau ueh uĭn.

²⁰ Yorlah moh nau tâm rnê dơi geh tơlah srôih dơn nau bu dong yor nau ƀư tih? Ƀiălah tơlah khân may srôih dơn nau rêh ni yor ƀư ueh, nau nĕ jêng nau ueh uĭn tanăp Brah Ndu.

²¹ Khân may geh jêh nau kuăl ma nau nĕ, yorlah Brah Krist anh dơn jêh nau rêh ni ma khân may, prăp ma khân may du nơm leo trong, gay ma khân may hăn tĭng têl jâng Păng;

²² “Păng mâu mâp ƀư tih ôh, Tâm trôm mbung Păng mâu mâp saơ nau mƀruh lĕ.”

²³ Nôk bu rak rtăp, Păng mâu rak rtăp ma bu ôh; tâm nôk dơn nau rêh ni, Păng mâu mâp thăm rmat ôh; ƀiălah jao Păng nơm ma Nơm phat dôih sŏng.

²⁴ Păng djôt nau tih he tâm săk jăn Păng ta klơ tơm si, gay ma he khĭt jêh đah nau tih jêh ri gŭ rêh ma nau sŏng srăng; tă bơh lĕ sôt rmanh Păng, khân may geh nau ƀư bah jêh.

²⁵ Yorlah khân may nâm bu biăp hăn nhhơt, ƀiălah aƀaơ khân may plơ̆ sĭt jêh ma Nơm Rmăk Biăp jêh ri ma Kôranh chiă Uănh huêng khân may nơm.