I Pêtrôs 1 - Nau Brah Ndu Ngơi 2023

Nau mbah jô̆ khâl

¹ Y-Pêtrôs, kôranh oh mon Brah Yêsu Krist, nchih njuăl ma phung bunuyh nchah rai du gŭ tâm n'gor Pôntus, Galati, Kapadôs, Asi jêh ri Bithini, jêng phung Brah Ndu săch jêh

² tĭng nau gĭt lor tă bơh Brah Ndu jêng Mbơ̆, jêh ri geh nau ƀư kloh ueh tă bơh Brah Huêng Ueh, gay tông bâr Brah Yêsu Krist jêh ri geh kô̆ tâm nau mbrih mham Păng. Mbơh sơm dăn nau yô̆ jêh ri nau đăp mpăn lơ hô n'hao ma khân may!

Nau kâp gân tâm nau rlong uănh

³ Mât ton ma Brah Ndu, Mbơ̆ Kôranh Brah he jêng Brah Yêsu Krist! Yor nuih n'hâm yô̆ nđach rmeh ler tă bơh Păng, phung he dơi deh mhe tay gay geh nau kâp gân rêh, yor nau dâk rêh tay Brah Yêsu Krist tă bơh nau khĭt,

⁴ gay dơn du drăp ndơn mâu hôm blau ôm rai, mâu ƀơ̆, mâu blau huănh, prăp jêh tâm trôk ma khân may,

⁵ jêng phung bunuyh yor ma nau chroh dơi geh nau mât mray tă bơh nau brah Brah Ndu, gay dơn nau tâm rklaih jêng nau rơm ndrăp tâm mpơl tâm rnôk nglĕ dŭt!

⁶ Răm maak hom ma nau nây, nđâp tơlah aƀaơ aơ khân may hôm anh dơn nau rngot rvê tâm ƀât lât tâm âk ngăn nau rlong uănh;

⁷ gay ma nau chroh khân may lah jêh dơn nau rlong uănh mra khlay rlau lơn ma mah — nđâp tơlah mah bu rlong uănh păng tâm ŭnh kđôi lĕ, ăt blau roh rai — djôt leo tay nau tâm rnê, nau chrêk rmah jêh ri nau yơk nôk Brah Yêsu Krist tât tâm mpơl.

⁸ Nđâp tơlah ê hŏ saơ Păng, khân may ăt rŏng jêh ma Păng, nđâp tơlah ê hŏ tâm mâp đah Păng, khân may ăt chroh jêh ma Păng, jêh ri hâk răm tâm nau răm maak dŭt hâu ngăn, mâu blau rblang ôh;

⁹ yorlah khân may dơn nau nkhôm tă bơh nau chroh, jêng nau tâm rklaih ma huêng khân may nơm.

Mbơh lor jêh nau tâm rklaih

¹⁰ Ma nau tâm rklaih nĕ, phung nơm mbơh lor tĭng joi, sek uănh, jêh ri mbơh lor jêh ma nau yô̆ prăp ndrăp jêh ma khân may.

¹¹ Khân păng sek uănh gay gĭt năl moh rnôk jêh ri mâm nau Brah Huêng Ueh Brah Krist tâm khân păng lĕ ntĭm jêh, dôl Păng mbơh lor ma nau rêh ni Brah Krist jêh ri nau chrêk rmah tĭng groi pakơi.

¹² Geh nau tâm mpơl ma phung mbơh lor gĭt năl pô aơ khân păng mâu di pah kan ma khân păng nơm ôh, ƀiălah pah kan ma khân may yơh ma lĕ nau aƀaơ aơ mbơh jêh ma khân may tă bơh phung bunuyh, rnơm jêh Brah Huêng Ueh jêng Nơm dơi njuăl jŭr tă bơh trôk, mbơh nkoch Nau Mhe Mhan Ueh ma khân may. Phung tông mpăr yơh ŭch uănh saơ lĕ nau nây lĕ.

Kuăl gŭ rêh kloh ueh

¹³ Pôri, khân may ndrăp lor hom nau mĭn, di keh hom, dơm nau kâp gân tâm nau yô̆ mra ăn ma khân may nôk Brah Yêsu Krist tâm mpơl.

¹⁴ Nâm bu phung kon tông bâr, khân may lơi ƀư tĭng lĕ nau kơnh ŭch kăl e, dôl khân may gŭ tâm nau rluk mâl.

¹⁵ Ƀiălah, nâm bu Nơm kuăl khân may jêng kloh ueh, ăn khân may kloh ueh tâm ban lĕ tâm lĕ nau gŭ ngao khân may nơm,

¹⁶ yorlah geh nau nchih jêh: “Ăn khân may jêng kloh ueh, yorlah Gâp jêng kloh ueh.”

¹⁷ Tơlah khân may mbơh Păng jêng Mbơ̆, Nơm mâu chrê du huê jêh ri phat dôih ăp nơm tĭng nâm nau khân păng ƀư, pôri djôt leo hom nuih n'hâm klach yơk gay gŭ rêh tâm rnôk gŭ njưh aơ.

¹⁸ Yorlah khân may gĭt jêh mâu di ma lĕ ndơ blau rai yot nâm bu prăk mâu lah mah ôh khân may geh nau chuai bơh nau rêh dơm dam ntơm bơh phung chô yau khân may nơm nkoch tay,

¹⁹ ƀiălah ma mham khlay Brah Krist, nâm bu mham du mlâm kon biăp geh ntŭk kuet, mâu geh têl khap,

²⁰ tâm nal jêh êlor rhăk njêng trôk neh ntu, ƀiălah tâm mpơl tâm rnôk nglĕ dŭt aơ yorlah khân may.

²¹ Yor ma Păng, khân may chroh ma Brah Ndu, jêng Nơm ƀư ăn Păng dâk rêh tay tă bơh nau khĭt jêh ri ăn ma Păng nau chrêk rmah, gay ma nau chroh jêh ri nau khân may kâp gân mra dơm tâm Brah Ndu.

²² Yor tông bâr nau ngăn, khân may ƀư kloh jêh ma huêng khân may nơm gay geh nau rŏng ndrăng oh nâu. Ăn khân may tâm rŏng ndrăng nơm dŭt hâu ngăn ma lĕ nuih n'hâm.

²³ Khân may geh jêh nau deh mhe tay, mâu di ma găr ntil blau rai yot, ƀiălah găr ntil mâu hôm blau ôm rai, nây jêng nau ngơi gŭ rêh mro mrăng jêh ri nâp ngăn bơh Brah Ndu.

²⁴ Yorlah, “Lĕ rngôch nglay săk nâm bu gơ̆, Jêh ri lĕ rngôch nau chrêk rmah păng nâm bu kao gơ̆. Gơ̆ kro, kao rŭng,

²⁵ Ƀiălah nau ngơi Kôranh Brah ăt hôm ƀaƀơ n'ho ro.” Nau ngơi nĕ jêng Nau Mhe Mhan Ueh mbơh jêh ma khân may.