I Nau Rêh Jêng 9 - Nau Brah Ndu Ngơi 2023

Phung ƀon lan Yêrusalem plơ̆ sĭt tă bơh ntŭk ƀư dĭk bu

¹ Pôri bu nchih amoh tâm ndrom samƀŭt lĕ rngôch phung Israel tĭng nâm ndŭl mpôl khân păng; jêh ri nau nây bu hŏ nchih jêh tâm ndrom samƀŭt phung hađăch Israel. Bu njŭn leo phung Yuđa jêng bu nă tâm n'gor bri Babilôn yor nau khân păng mâu geh gŭ răp jăp ôh.

² Phung plơ̆ sĭt lor ntơm saơm gŭ tay tâm lĕ drăp ndơn, tâm lĕ ƀon khân păng, jêng phung Israel, phung kôranh ƀư brah, phung Lêvi, jêh ri phung pah kan tâm ngih brah.

³ Jêh ri phung ƀaƀă ƀon lan Yuđa, Benjamin, Êphraim, jêh ri phung Manasê gŭ tâm ƀon Yêrusalem, geh đŏng:

⁴ Tă tâm ndŭl mpôl Y-Pêres, kon Yuđa, geh Y-Uthai, kon Y-Amihut; Y-Amihut jêng kon Y-Ômri, Y-Ômri jêng kon bu klâu Y-Imri, jêh ri Y-Imri jêng kon Y-Bani.

⁵ Tă tâm phung Silô geh Y-Asaya, kon bu klâu bôk dak, jêh ri phung kon păng.

⁶ Tă tâm ndŭl mpôl Y-Sêra geh Y-Jêuêl jêh ri oh nâu păng, lĕ rngôch geh prao rhiăng sĭn jât nuyh.

⁷ Tă tâm ndŭl mpôl Benjamin geh Y-Salu, kon Y-Mêsulam (Y-Mêsulam kon Y-Hôdavia; Y-Hôdavia kon bu klâu Y-Hasênua);

⁸ geh đŏng Y-Ipneya, kon Y-Jêrôham; Y-Êla kon Y-Usi (Y-Usi kon Y-Mikri); jêh ri Y-Mêsulam, kon Y-Sêphatia (Y-Sêphatia kon Y-Rêuel; Y-Rêuel kon Y-Ipnija).

⁹ Oh nâu khân păng kơp tĭng nâm băl mpôl khân păng geh sĭn rhiăng prăm jât ma prao nuyh. Lĕ rngôch phung nây jêng phung kôranh tâm phung noi deh khân păng.

Phung noi deh kôranh ƀư brah

¹⁰ Tă tâm phung kôranh ƀư brah geh Y-Jêdaya, Y-Jêhôyarip, Y-Jakin,

¹¹ jêh ri Y-Asaria, kon Y-Hilkia (Y-Hilkia kon Y-Mêsulam; Y-Mêsulam kon Y-Sadôk; Y-Sadôk kon Y-Mêraiôt; Y-Mêraiôt kon Y-Ahitup, jêng kôranh mât uănh ma ngih Brah Ndu);

¹² geh đŏng Y-Adaya, kon Y-Jêrôham (Y-Jêrôham kon Y-Pashur; Y-Pasur kon Y-Malkija; Y-Malkija kon Y-Masai; Y-Masai kon Y-Adiêl; Y-Adiêl kon Y-Jahsêra; Y-Jahsêra kon Y-Mêsulam; Y-Mêsulam kon Y-Mêsilômit; Y-Mêsilômit kon Y-Imer).

¹³ Jêh ri ndŭl mpôl khân păng geh du rbăn pơh rhiăng prao jât nuyh, kôranh ma ndŭl deh khân păng, geh nau blau ngăn prăp ma kan tâm ngih Brah Ndu.

Lĕ ndŭl mpôl Lêvi

¹⁴ Tâm phung Lêvi geh Y-Sêmaya, kon bu klâu Y-Hasup; sau Y-Asrikam, se Y-Hasabia; lĕ rngôch jêng noi deh Y-Mêrari;

¹⁵ geh đŏng Y-Bakbakar, Y-Hêres, Y-Galal, jêh ri Y-Matania, kon Y-Mika da dê, sau Y-Sikri, se Y-Asap;

¹⁶ Y-Ôbadia, kon Y-Sêmaya, sau Y-Galal, se Y-Jêduthun; Y-Bêrêkia, kon Y-Asa, sau Y-Êlkana, jêng nơm gŭ tâm lĕ ƀon jê̆ jê̆ phung Nêtôphat.

¹⁷ Phung gak mpông pêr geh: Y-Salum, Y-Akup, Y-Talmôn, Y-Ahiman, jêh ri oh nâu khân păng; Y-Salum jêng kôranh.

¹⁸ N'ho tât ma aƀaơ khân păng gŭ gak tâm mpông pêr hađăch ta mpeh luh nar; bi kăl e, chô yau khân păng jêng phung mât mray mpông ngih bok phung Lêvi.

¹⁹ Y-Salum kon Y-Kôrê, sau Y-Êbiasap, se Y-Kôrê, jêh ri oh nâu nđâp ma ndŭl mpôl păng jêng phung Kôra, ƀư nau pah kan jêh ri mât uănh ntŭk lăp mpông Ngih Bok; tâm ban đŏng kăl e, chô yau khân păng djôt nau kâp njrăng lăp mpông ngih bok Brah Yêhôva.

²⁰ Rnôk saơm Y-Phinêas, kon Y-Êlêasar, hŏ tă jêng kôranh chiă uănh ma khân păng; jêh ri Brah Yêhôva gŭ ndrel ma păng.

²¹ Y-Sakari, kon Y-Nêsêlêmia, jêng nơm mât njrăng mpông pêr ta Ngih Bok Nau Tâm Rƀŭn.

²² Lĕ rngôch phung nây bu săch jêh jêng phung mât njrăng ntŭk lăp mpông pêr geh bar rhiăng jât ma bar nuyh. Bu nchih jêh amoh tâm ndrom samƀŭt ƀoi yau tĭng nâm ndŭl mpôl tâm ƀon khân păng. Y-Đavit jêh ri nơm geh nau tâm saơ Y-Samuel rnơm jao ma khân păng nau kan nây.

²³ Pônây, khân păng jêh ri phung kon sau khân păng mât njrăng lĕ mpông ngih Brah Yêhôva, jêng Ngih Bok.

²⁴ Phung mât njrăng mpông pêr gŭ ta puăn mpeh: luh nar, nhâp nar, pa dâng, pa lơ.

²⁵ Phung oh nâu khân păng gŭ tâm lĕ ƀon jê̆, tĭng nâm di nau tâm ndăch, hăn văch tât gay kơl khân păng du pơh.

²⁶ Puăn nuyh Lêvi jêng kôranh ma phung mât njrăng mpông pêr, hôm geh nau kan djôt kan chiă uănh lĕ jrô jêh ri jay prăp drăp khlay tâm ngih Brah Ndu.

²⁷ Dôl măng, khân păng bê̆ch văr jŭm ngih Brah Ndu, yorlah khân păng geh nau kan gak; ăp ôi, khân păng geh nau kan pơk mpông pêr.

²⁸ Tâm khân păng, geh bar pe bunuyh bu dăp nau mât uănh lĕ ndơ dŏng tâm ngih brah; ăn khân păng kơp lĕ ndơ dŏng nây tơlah khân păng djôt leo padih, tâm ban đŏng tơlah djôt leo tâm trôm.

²⁹ Ƀaƀă phung êng bu dăp ăn djôt kan chiă uănh ndơ dŏng jêh ri lĕ ndơ dŏng tâm ntŭk kloh ueh, nđâp rnih ueh, ndrănh, dak ngi ôlive, ndơ ƀâu kah, jêh ri dak si ƀâu kah.

³⁰ Tâm phung kon phung bu klâu kôranh ƀư brah geh phung pot dak si ƀâu kah.

³¹ Bi Y-Matithia, du huê Lêvi, kon bu klâu dak bôk Y-Salum, jêng noi deh Kôra, geh kan ƀư ƀănh nhhơr.

³² Tâm phung oh nâu khân păng bơh noi deh Kôhat, geh phung ƀư ƀănh nhhơr, ndrăp nkra piăng let ma ăp nar saƀat.

³³ Aơ jêng phung geh nau kan mprơ; phung jêng kôranh tâm noi deh tâm phung Lêvi, gŭ tâm jrô ngih brah, jêh ri mâu hôm ƀư lĕ nau kan êng yorlah khân păng pah kan nar nđâp măng.

³⁴ Tĭng nâm noi deh, phung nây jêng kôranh tâm noi deh phung Lêvi, jêh ri gŭ ta ƀon Yêrusalem.

Noi deh Y-Saul jêh ri Y-Jônathan

³⁵ Y-Jêiêl, nơm njêng ƀon Gibêôn, gŭ ta Gibêôn, ur păng jêng H'Maka.

³⁶ Kon bu klâu bôk rah păng jêng Y-Apdôn; jêh ta nây geh Y-Sur, Y-Kis, Y-Baal, Y-Ner, Y-Nadap,

³⁷ Y-Gêdor, Y-Ahiô, Y-Sakari, jêh ri Y-Miklôt.

³⁸ Y-Miklôt jêng mbơ̆ Y-Simêam. Khân păng nđâp ma phung oh nâu khân păng gŭ dăch ma phung ndŭl mpôl khân păng tâm ƀon Yêrusalem.

³⁹ Y-Ner jêng mbơ̆ Y-Kis; Y-Kis jêng mbơ̆ Y-Sôl; Y-Sôl jêng mbơ̆ Y-Jônathan, Y-Malki-Sua, Y-Abinadap, jêh ri Y-Êsbaal.

⁴⁰ Kon Y-Jônathan jêng Y-Mêri-Baal; Y-Mêri-Baal jêng mbơ̆ Y-Mika.

⁴¹ Phung kon Y-Mika jêng Y-Pithôn, Y-Mêlek, Y-Tarêa, jêh ri Y-Ahas.

⁴² Y-Ahas jêng mbơ̆ Y-Jara; Y-Jara jêng mbơ̆ Y-Alêmet, Y-Asmavet, jêh ri Y-Simri; Y-Simri jêng mbơ̆ Y-Môsa;

⁴³ Y-Môsa jêng mbơ̆ Y-Binêa, kon Y-Binêa jêng Y-Rêphaya; Y-Rêphaya jêng mbơ̆ Y-Êlêasa; jêh ri Y-Êlêasa jêng mbơ̆ Y-Asel.

⁴⁴ Y-Asel geh prao nuyh kon bu klâu jêh ri amoh khân păng jêng Y-Asrikam, Y-Bôkêru, Y-Ismaêl, Y-Sêaria, Y-Ôbadia, jêh ri Y-Hanan; nây jêng phung kon Y-Asel.