I Nau Rêh Jêng 5 - Nau Brah Ndu Ngơi 2023

Noi deh Y-Ruben

¹ Yorlah Y-Ruben, kon bu klâu bôk rah ma Y-Israel, ƀư ƀơ̆ sưng bê̆ch mbơ̆ păng, yor ri nau dơi kon bôk rah bu jao jêh ma phung kon Y-Yôsep, jêng kon Y-Israel. Yor ri, bu mâu nchih păng tâm noi deh tâm ban kon bu klâu bôk rah.

² Nđâp tơlah Y-Yuđa rlau lơn phung oh nâu păng, jêh ri du huê kôranh chiă uănh mra geh tă bơh păng, ƀiălah nau dơi kon bôk rah ăt jêng ndơ ma Y-Yôsep.

³ Aơ jêng phung kon Y-Ruben, kon bôk rah ma Y-Israel jêng Y-Hanŏk, Y-Palu, Y-Hêsron, jêh ri Y-Karmi.

⁴ Kon bu klâu Y-Yôel jêng Y-Sêmaya, kon Y-Sêmaya jêng Y-Gôk, kon Y-Gôk jêng Y-Simei,

⁵ kon Y-Simei jêng Y-Mika, kon Y-Mika jêng Y-Rêaya, kon Y-Rêaya jêng Y-Baal,

⁶ kon Y-Baal jêng Y-Bêera, nơm Y-Tiglat-Phinêser, hađăch n'gor bri Asiri, nhŭp ƀư bu nă. Y-Bêra jêng kôranh chiă uănh phung Ruben.

⁷ Phung oh nâu Y-Bêera tĭng mpôl păng, di nâm bu hŏ nchih kơp tâm ndrom samƀŭt ƀoi yau jêng: Y-Jêiêl ƀư kôranh, jêh ri Y-Sakari,

⁸ Y-Bêla, kon Y-Asas, sau Y-Sêma, se Y-Yôel, Y-Bêla gŭ ta ƀon Arôer tât ta yôk Nêbô jêh ri Baal-Mêon.

⁹ Mpeh luh nar, păng pit sŏk neh ntơm bơh ntŭk lăp bri rdah n'ho tât dak krong Ơphrat, yorlah tâm n'gor Gilêat mpô mpa khân păng rong lĕ bĭk âk ngăn.

¹⁰ Tâm rnôk hađăch Sôl, khân păng tâm lơh đah phung Hagrit, dơi khân păng, jêh ri pit in lĕ ngih bok khân păng lam nkual mpeh luh nar n'gor Gilêat.

Noi deh Y-Gat

¹¹ Phung kon sau Y-Gat gŭ tâm tra đah khân păng tâm n'gor Basan, tât ta ƀon Salêka.

¹² Y-Yôel jêng kôranh, Y-Sapham jêng nơm groi păng; geh đŏng Y-Janai jêh ri Y-Saphat tâm n'gor Basan.

¹³ Mpôl khân păng tĭng nâm noi deh khân păng geh pơh bunuyh: Y-Mikel, Y-Mêsulam, Y-Sêba, Y-Jôrai, Y-Jakan, Y-Sia jêh ri Y-Êber.

¹⁴ Nây jêng phung kon bu klâu Y-Abihai, Y-Abihai kon Y-Hur, Y-Hur kon Y-Jarôa, Y-Jarôa kon Y-Gilêat, Y-Gilêat kon Y-Mikel, Y-Mikel kon Y-Jêsisai, Y-Jêsisai kon Y-Jadô, Y-Jadô kon Y-Bus.

¹⁵ Y-Ahi kon bu Y-Apdiêl, Y-Apdiêl kon Y-Guni, Y-Ahi jêng kôranh tâm noi deh.

¹⁶ Khân păng gŭ ta n'gor Gilêat, tâm n'gor Basan, jêh ri lĕ ƀon jê̆ jê̆ păng, jêh ri tâm lĕ rngôch ndrêch gơ̆ ta Sarôn tât ta dŭt n'har păng.

¹⁷ Lĕ rngôch phung nây bu nchih jêh amoh tâm ndrom samƀŭt ƀoi yau tâm rnôk hađăch Jôtham bri dak Yuđa, jêh ri tâm rnôk hađăch Jêrôbôam bri dak Israel.

¹⁸ Phung kon sau ndŭl mpôl Ruben, Gat, jêh ri du n'gul ndŭl mpôl Manasê, geh phung dăng ktang, djôt khêl jêh ri djôt đao, pănh na, jêh ri blau tâm lơh, geh puăn rmưn puăn rbăn pơh rhiăng prao jât nuyh ndrăp jêh hăn luh tâm lơh.

¹⁹ Khân păng tâm lơh đah phung Hagrit, phung Jêtur, phung Napis, jêh ri phung Nôdap.

²⁰ Dôl khân păng tâm lơh, khân păng vơl dăn ma Brah Ndu, jêh ri yorlah khân păng geh nuih n'hâm rnơm nsing ma Păng, pôri Păng kơl rklaih an, jao phung Hagrit jêh ri lĕ rngôch phung tĭng păng tâm ti khân păng.

²¹ Khân păng sŏk gro mpô mpa khân păng rong, geh: prăm rmưn mlâm seh samô, bar rsen prăm rmưn mlâm biăp, bar rbăn mlâm seh bri; khân păng sŏk đŏng du rsen bu nă.

²² Geh âk ngăn bunuyh lĕ cha lôt khĭt, yorlah nau tâm lơh nây luh tă bơh Brah Ndu. Khân păng pit in neh phung nây jêh ri gŭ ta nây ma tât nôk bu nhŭp njŭn leo khân păng ƀư dĭk bu.

Noi deh Ma-na-se

²³ Du n'gul phung ndŭl mpôl Manasê gŭ tâm n'gor ntơm bơh Basan tât Baal-Hermôn, yôk Sênir, jêh ri yôk Hermôn; rnoh bunuyh khân păng âk ngăn.

²⁴ Aơ jêng kôranh tâm ndŭl mpôl tâm noi deh khân păng: Y-Êpher, Y-Isi, Y-Êliêl, Y-Asriêl, Y-Yêrêmi, Y-Hôdavia, jêh ri Y-Jahdiêl; khân păng jêng phung tahan janh ktang geh nau janh nanh jêh ri geh lư n'găr.

²⁵ Ƀiălah khân păng ƀư tih đah Brah Ndu ma phung chô yau khân păng, jêh ri tăch khân păng nơm ma phung brah phung ƀon lan tâm n'gor nây, Brah Ndu ƀư rai jêh tanăp khân păng.

²⁶ Pôri, Brah Ndu Israel nsônh nau mĭn Y-Pul, hađăch bri dak Asiri, jêh ri Y-Tiglat-Pilêser, hađăch bri dak Asiri, hăn tât gay nhŭp phung ndŭl mpôl Ruben, Gat, jêh ri du n'gul ndŭl mpôl Manasê, njŭn khân păng tât ma ƀon Hala, ƀon Habôr, ƀon Hara, jêh ri nkual ta dăch dak krong Gôsan, jêng ntŭk khân păng hôm gŭ tât ma nar aơ.