I Nau Rêh Jêng 29 - Nau Brah Ndu Ngơi 2023

Lĕ ndơ nhhơr gay ma ndâk njêng ngih brah

¹ Y-Đavit lah ma lĕ rngôch phung tâm rƀŭn: “Y-Salômôn, kon gâp, knŏng êng păng Brah Ndu hŏ săch jêh, hôm ndăm jêh ri hom pưt nau gĭt mĭn, jêh ri kan jêng toyh; yorlah ngih brah nây mâu di ndâk ma bunuyh ôh, ƀiălah mra prăp ma Yêhôva Brah Ndu.

² Gâp ndrăp nkra lĕ nau ktang ăn ma ngih Brah Ndu gâp, mah prăp ma ndơ ƀư đah mah, prăk prăp ma ndơ ƀư đah prăk, kông prăp ma ndơ ƀư đah kông, loih prăp ma ndơ ƀư đah loih, tơm si prăp ma ndơ ƀư đah tơm si; rơm ndrăp âk lŭ ônik, lŭ khlay gay kach, lŭ khlay nchrat ang, lŭ khlay geh âk ntil dak, jêh ri lĕ ntil lŭ khay, jêh ri lŭ marbrơ nglang âk ngăn.

³ Yorlah nuih n'hâm gâp rŏng ma ngih Brah Ndu gâp, pôri lĕ nau gâp ndrăp nkra jêh ma ngih brah kloh ueh, gâp ăt nhhơr đŏng ma ngih Brah Ndu lĕ rngôch ndơ ma mah jêh ri ma prăk jêng ndơ gâp,

⁴ jêng sĭn jât tân mah Ôphir, jêh ri bar rhiăng jât tân prăk kloh gay prăp ndop lĕ mpir ngih brah;

⁵ mah gay ƀư lĕ ndơ ma mah, prăk gay ƀư lĕ ndơ ma prăk, jêh ri gay ma phung blau ƀư lĕ kan êng. Pônây nar aơ, pônây nar aơ mbu nơm geh nuih n'hâm lŏng ŭch nhhơr drăp ma Brah Yêhôva?”

⁶ Nôk nây, phung kôranh tâm noi deh, phung kôranh ndŭl mpôl Israel, phung kôranh chiă uănh toyh ma du rbăn nuyh tahan jêh ri ma du rhiăng nuyh, phung mât uănh kan hađăch ma nau maak

⁷ nhhơr ndơ da dê ma nau kan ngih Brah Ndu. Khân păng nhhơr du rhiăng prăm jât tân mah, du rmưn prăk darik, pe rhiăng tân prăk, prăm rhiăng puăn jât tân kông, jêh ri pe rbăn rsen loih.

⁸ Mbu nơm geh lŭ khlay ăn đŏng ma Y-Jêhiêl, noi deh Gersôn, gay nhhơr ma jay Brah Yêhôva.

⁹ Phung ƀon lan hâk răm ngăn yorlah nau phung nây ăn jêh ma nuih n'hâm lŏng jêh ri lĕ nuih n'hâm nhhơr ma Brah Yêhôva. Hađăch Đavit răm maak tâm ban đŏng.

Y-Đavit mât ton ma Brah Ndu

¹⁰ Tra năp lĕ rngôch phung tâm rƀŭn, Y-Đavit mât ton ma Brah Yêhôva pô aơ: “Hơi Yêhôva Brah Ndu chô yau hên jêng Israel! Mât ton ma May kŏ tât ƀaƀơ n'ho ro!

¹¹ Hơi Brah Yêhôva! May toyh ngăn, nau brah ngăn, nau chrêk rmah, nau dơi, jêh ri nau hit rnam khư ma May; yorlah lĕ rngôch ndơ klơ lĕ ndâr trôk jêh ri tâm neh ntu jêng ndơ May da dê. Hơi Brah Yêhôva! Ƀon bri hađăch jêng ndơ May; hên yơk ma May jêng Kôranh Brah ta klơ lĕ rngôch.

¹² Nđâp nau ndrŏng kuăng jêh ri nau chrêk rmah luh bơh Kôranh Brah. May chiă uănh ta klơ lĕ rngôch, nau brah jêh ri nau ktang gŭ tâm ti May. Ti May ăn nau yơk jêh ri nau ktang n'hâm suan ma lĕ rngôch bunuyh.

¹³ Aƀaơ ri, hơi Brah Ndu hên! Hên tâm rnê ma Kôranh Brah jêh ri mât ton ma amoh chrêk rmah May.

¹⁴ Ƀiălah mbu gâp jêng jêh ri mbu phung ƀon lan gâp jêng dĭng hên dơi nhhơr ma nuih n'hâm lŏng tâm ban pô aơ? Yorlah lĕ rngôch ndơ luh bơh Kôranh Brah, jêh ri lĕ ndơ hên nhhơr ma May jêng ndơ May nơm.

¹⁵ Yorlah tanăp măt May, hên jêng phung bu năch jêh ri phung gŭ njưh nâm bu lĕ rngôch phung chô yau hên kăl e. Lĕ nar hên gŭ rêh ta neh ntu nâm bu gui rgăn gơnh, jêh ri mâu geh ôh nau kâp gân.

¹⁶ Hơi Yêhôva Brah Ndu hên! Lĕ rngôch ndơ hên ndrăp nkra jêh gay ndâk ngih brah ma amoh kloh ueh Kôranh Brah, luh bơh ti Kôranh Brah nơm da dê, jêh ri lĕ rngôch ndơ jêng ndơ May nơm.

¹⁷ Hơi Brah Ndu gâp! Gâp gĭt jêh Kôranh Brah sek uănh nuih n'hâm bunuyh jêh ri maak ma nau di. Mpeh ma gâp, gâp maak nuih n'hâm nhhơr lĕ ndơ nây nđâp ma nuih n'hâm sŏng. Aƀaơ ri, gâp saơ jêh phung ƀon lan May gŭ ta aơ ma nau răm rhơn nhhơr ma May.

¹⁸ Hơi Yêhôva Brah Ndu phung chô yau hên jêng Y-Abraham, Y-Isăk, jêh ri Y-Israel! Dăn ăn ma phung ƀon lan May djôt prăp mro nau ton jêh ri nau mĭn nây tâm nuih n'hâm, jêh ri ăn ma nuih n'hâm khân păng gŭ mpeh ma May.

¹⁹ Dăn ma Kôranh Brah ăn ma Y-Salômôn, kon gâp, du nuih n'hâm mâu geh bu dơi nduyh djôt prăp lĕ nau vay ntăm, lĕ nau ntĭnh, jêh ri lĕ nau vay dăp bơh May, tâm ban ƀư lĕ kan gay ndâk ngih brah, gâp hŏ rơm nŭm jêh.”

Bu njêng Y-Salômôn ƀư hađăch rơh bar

²⁰ Y-Đavit lah ma lĕ rngôch phung tâm rƀŭn: “Mât ton hom ma Yêhôva Brah Ndu khân may.” Lĕ rngôch phung tâm rƀŭn mât ton ma Yêhôva Brah Ndu phung chô yau khân păng, khân păng kŭnh bôk yơk mbah ma Brah Yêhôva, jêh ri kŭnh mbah panăp hađăch.

²¹ Nar pakơi nây, yorlah lĕ rngôch phung Israel nhhơr ndơ ƀư brah jêh ri ndơ ƀư brah gŭch ma Brah Yêhôva geh du rbăn mlâm ndrôk nkuăng, du rbăn mlâm biăp nkuăng, ndrel ma lĕ ndơ nhhơr nhêt jêh ri âk ndơ ƀư brah êng êng.

²² Tâm nar nây, khân păng sông sa nhêt sa răm maak ngăn tanăp Brah Yêhôva. Tơ̆ rơh bar, khân păng n'hao ăn kon bu klâu Y-Đavit jêng Y-Salômôn hao ƀư hađăch. Khân păng sŏk amoh Brah Yêhôva gay tŏ dak ƀâu kah ma Y-Salômôn ƀư hađăch jêh ri ăn Y-Sadôk jêng kôranh ƀư brah.

²³ Nôk nây, Y-Salômôn gŭ ta sưng hađăch Brah Yêhôva, ƀư hađăch ntrok Y-Đavit, mbơ̆ păng. Păng dơi ndrŏng ngăn ngên jêh ri lĕ rngôch phung Israel tông da dê ma nau păng ntăm.

²⁴ Lĕ rngôch phung kôranh, phung tahan janh ktang, ndrel ma phung kon bu klâu hađăch Đavit đŏng tông bâr hađăch Salômôn da dê.

²⁵ Brah Yêhôva ƀư ma Y-Salômôn geh nau yơk tanăp măt lĕ rngôch phung Israel, jêh ri ăn nau hit rnam ma hađăch, kŏ tât tâm phung Israel mâu mâp geh ôh ma du hađăch lor panăp păng dơi tâm ban pônây.

Nau chiă uănh Y-Đavit

²⁶ Y-Đavit, kon bu klâu Y-Yêsê, chiă uănh jêh lĕ rngôch phung Israel.

²⁷ Nôk păng chiă uănh phung Israel geh puăn jât năm: Pơh năm ta Hêbron, jêh ri pe jât năm ta Yêrusalem.

²⁸ Hađăch khĭt, ranh jŏ rêh jêh ri geh nau mpay tâm nau rêh păng, ma nau ndrŏng jêh ri geh nau bu yơk. Y-Salômôn, kon bu klâu păng, gŭ ta sưng hađăch chiă uănh ntrok păng.

²⁹ Lĕ kan hađăch Đavit bơh ntơm tât lôch bu nchih jêh tâm ndrom samƀŭt nơm geh nau tâm saơ Y-Samuel, jêh ri tâm ndrom samƀŭt nơm mbơh lor Y-Nathan, jêh ri tâm ndrom samƀŭt nơm geh nau tâm saơ Y-Gat.

³⁰ Nau chiă uănh jêh ri nau ktang păng, lĕ kan tât geh ma păng, ma phung Israel, jêh ri ma lĕ bri dak êng, bu hŏ nchih da dê tâm ndrom samƀŭt nây.