I Nau Rêh Jêng 28 - Nau Brah Ndu Ngơi 2023

Y-Đavit ntĭm ma kan ndâk ngih brah

¹ Y-Đavit kuăl rgum lĕ rngôch phung kôranh toyh phung Israel văch ta ƀon Yêrusalem geh phung kôranh ndŭl mpôl, phung kôranh mpôl pah kan ma hađăch, kôranh chiă uănh toyh ma du rbăn nuyh tahan jêh ri di rhiăng nuyh tahan, phung kôranh mât uănh drăp ndơn jêh ri mpô mpa hađăch rong, phung kon bu klâu hađăch, ndrel ma phung kôranh bu char jêh ri phung tahan janh ktang.

² Hađăch Đavit dâk jêh ri ngơi: “Hơi phung oh nâu jêh ri phung ƀon lan gâp, iăt hom! Gâp geh nau mĭn ndâk du mlâm ngih brah gay dơm Hip Nau Tâm Rnglăp Brah Yêhôva, jêh ri jêng rnơl chrong jâng ma Brah Ndu he. Gâp lĕ ndrăp nkra jêh ndơ dŏng prăp ndâk ngih.

³ Ƀiălah Brah Ndu lah ma gâp pô aơ: ‘May mâu dơi ndâk ôh ngih brah ăn amoh Gâp, yorlah may jêng du huê tahan jêh ri hŏ ƀư nkhŭt mham bu âk ir.’

⁴ Ƀiălah, Yêhôva Brah Ndu Israel săch jêh gâp tă bơh rnăk vâl mbơ̆ gâp, gay ƀư hađăch chiă uănh phung Israel n'ho ro. Yorlah Păng săch jêh ndŭl mpôl Yuđa hao chiă uănh, jêh ri tâm ngih Yuđa, Păng hŏ săch rnăk vâl mbơ̆ gâp, jêh nây tă tâm nklang phung kon bu klâu mbơ̆ gâp, Păng hŏ maak đah gâp gay ŭch njêng gâp jêng hađăch chiă uănh lĕ phung Israel.

⁵ Brah Yêhôva ăn jêh ma gâp geh âk kon bu klâu; tâm lĕ rngôch phung kon bu klâu gâp, Păng săch jêh Y-Salômôn, kon gâp, ăn gŭ ta sưng hađăch ƀon bri hađăch Brah Yêhôva chiă uănh phung Israel.

⁶ Păng lah ma gâp pô aơ: ‘Y-Salômôn, kon bu klâu may mra ndâk ngih brah jêh ri lĕ ndring ngih Gâp, yorlah Gâp hŏ săch jêh păng ăn jêng kon Gâp, jêh ri Gâp mra jêng mbơ̆ păng

⁷ Tơlah păng ton thoi djôt prăp lĕ nau vay ntăm jêh ri nau Gâp ntrŭnh nâm bu nar aơ, Gâp mra ƀư ăn ƀon bri hađăch păng nâp n'ho ro.’

⁸ Pôri aƀaơ, tanăp lĕ rngôch phung Israel, jêng phung tâm rƀŭn Brah Yêhôva, Brah Ndu he gŭ iăt, gâp ntĭnh ma khân may joi hom jêh ri djôt prăp lĕ nau vay Yêhôva Brah Ndu ntăm khân may, gay ma khân may sŏk dơn n'gor ueh aơ jêh ri ăn tay ma phung kon sau khân may ƀư drăp ndơn n'ho ro.

⁹ Bi may, Y-Salômôn, kon bu klâu gâp, gĭt năl hom Brah Ndu mbơ̆ may, pah kan hom ma Păng ma lĕ nuih n'hâm jêh ri ma lĕ nau mĭn; yorlah Brah Yêhôva sek uănh lĕ nuih n'hâm, jêh ri păng gĭt vât lĕ rngôch nau ŭch tâm nau mĭn. Tơlah may joi Păng, Păng mra ăn may saơ Păng; ƀiălah tơlah may chalơi Păng, nanê̆ Păng mra chalơi may n'ho ro.

¹⁰ Aƀaơ aơ, njrăng hom, yorlah Brah Yêhôva săch jêh may ăn may ndâk du mlâm ngih brah prăp ma ntŭk kloh ueh Păng. Dăng ktang hom, jêh ri ƀư nau nây!”

¹¹ Nôk nây, Y-Đavit ăn ma Y-Salômôn, kon bu klâu păng, samƀŭt rup ndring panăp, ngih brah, lĕ jay prăp drăp khlay, jrô klơ, jrô tâm trôm ngih brah, jêh ri ndrŭp nau yô̆ an.

¹² Păng jao đŏng ma Y-Salômôn lĕ samƀŭt rup Brah Huêng Ueh ăn ma hađăch gĭt ma nhuang ngih Brah Yêhôva, ma lĕ rngôch jrô văr jŭm, ma lĕ jay prăp drăp khlay ngih Brah Ndu, jêh ri ma lĕ jay prăp ndơ kloh ueh;

¹³ ma nau pă kan ma phung kôranh ƀư brah jêh ri phung Lêvi; tâm lĕ rngôch kan bu ƀư tâm ngih Brah Yêhôva, jêh ri ma lĕ rngôch ndơ dŏng prăp ma kan tâm ngih Brah Yêhôva.

¹⁴ Hađăch tâm nal jêh rnoh mah ma lĕ rngôch ndơ dŏng ƀư ma mah prăp ma ăp nau kan, jêh ri rnoh prăk ma lĕ rngôch ndơ dŏng ƀư ma prăk prăp ma ăp nau kan;

¹⁵ rnoh mah gay ƀư lĕ jâng kađen jêh ri kađen ma mah, tâm ăp mlâm jâng kađen jêh ri kađen păng; rnoh prăk gay ƀư lĕ jâng kađen jêh ri kađen ma prăk, tĭng nâm bu dŏng ăp jâng kađen.

¹⁶ Hađăch tâm nal đŏng rnoh mah ma lĕ sưng prăp ma piăng let nhhơr, jêh ri rnoh prăk ma lĕ sưng ma prăk;

¹⁷ rnoh mah ăn ma n'hoi srang, ngan grưng, jêh ri kachok ma mah kloh; ăn ma ngan rlŭ mah, jêh ri rnoh jâk ăp mlâm; ma lĕ ngan rlŭ prăk, jêh ri njing jâk ăp mlâm.

¹⁸ Hađăch ntĭm đŏng ma nơng ƀư brah gŭch ndơ ƀâu kah ma mah, nđâp ma rnoh mah kloh; jêh ri rup ma ndeh seh nđâp ma phung chêrubim ma mah lĭ nting năr khân păng nkŭm Hip Nau Tâm Rnglăp Brah Yêhôva.

¹⁹ Y-Đavit ngơi: “Lĕ rngôch kan nây bu mra ƀư tĭng nâm samƀŭt rup bơh ti Brah Yêhôva gŭ ta klơ gâp jêh ri sol ang ma gâp ma lĕ rngôch ntil tâm samƀŭt rup.”

²⁰ Y-Đavit lah tay ma Y-Salômôn, kon păng nơm pô aơ: “Ktang hom jêh ri nâp nuih n'hâm ƀư nau nây! Lơi klach ôh, lơi rdja nuih n'hâm ôh, yorlah Yêhôva Brah Ndu, jêng Brah Ndu gâp, gŭ ndrel ma may, Păng mâu mra chalơi may, mâu đŏng du luh bơh may, ma tât lôch jêh lĕ rngôch nau kan ndâk ngih Brah Yêhôva.

²¹ Aơ, lĕ mpôl phung kôranh ƀư brah jêh ri phung Lêvi ndrăp jêh ƀư lĕ rngôch kan tâm ngih Brah Ndu. Tâm ăp nau kan, may geh đŏng phung blau kan maak nuih n'hâm kơl ma may ƀư lĕ kan. Lĕ rngôch phung kôranh jêh ri lĕ rngôch bunuyh ƀon lan mra tông tĭng nau ntăm may.”