I Nau Rêh Jêng 27 - Nau Brah Ndu Ngơi 2023

Y-Đavit pă kan ma phung kôranh tahan

¹ Aơ jêng samƀŭt nchih amoh phung ƀon lan Israel, phung kôranh ma noi deh, kôranh ma du rbăn nuyh jêh ri du rhiăng nuyh jêh nây phung kôranh pah kan ma hađăch lĕ rngôch ntil tâm phung kan tahan; tĭng nâm mpôl lăp jêh ri luh ăp khay lĕ du năm, ăp mpôl geh bar rmưn puăn rbăn nuyh.

² Kôranh chiă uănh toyh ma mpôl tahan rơh nguay pah kan tâm khay rơh nguay jêng Y-Jasôbêam, kon Y-Sapdiêl. Mpôl tahan aơ geh bar rmưn puăn rbăn nuyh tahan.

³ Păng jêng noi deh Y-Pêres, jêng kôranh ma lĕ rngôch phung kôranh chiă uănh tahan tâm khay rơh nguay.

⁴ Kôranh chiă uănh toyh ma mpôl tahan pah kan tâm khay rơh bar jêng Y-Dôdai bunuyh Ahôhit, geh Y-Miklôt jêng kôranh ma mpôl tahan nây. Mpôl tahan aơ geh bar rmưn puăn rbăn nuyh tahan.

⁵ Kôranh chiă uănh toyh ma mpôl tahan rơh pe pah kan tâm khay rơh pe jêng Y-Bênaya, kon kôranh ƀư brah Y-Jêhôida. Mpôl tahan păng geh bar rmưn puăn rbăn nuyh tahan.

⁶ Y-Bênaya jêng du huê janh ktang tâm Pe Jât Nuyh nây jêh ri păng jêng kôranh ma phung pe jât nuyh nây. Y-Amisabat, kon păng tâm ban đŏng gŭ tâm mpôl tahan nây.

⁷ Kôranh chiă uănh toyh ma mpôl tahan rơh puăn pah kan tâm khay rơh puăn jêng Y-Asahel, oh Y-Jôap, jêh ri kon păng jêng Y-Sêbadia ntrok jêh păng. Mpôl tahan păng geh bar rmưn puăn rbăn nuyh tahan.

⁸ Kôranh chiă uănh toyh ma mpôl tahan rơh prăm pah kan tâm khay rơh prăm jêng Y-Samhut, bunuyh Isra. Mpôl tahan păng geh bar rmưn puăn rbăn nuyh tahan.

⁹ Kôranh chiă uănh toyh ma mpôl tahan rơh prao pah kan tâm khay rơh prao jêng Y-Ira, kon bu klâu Y-Ikês, bunuyh Têkôa. Mpôl tahan păng geh bar rmưn puăn rbăn nuyh tahan.

¹⁰ Kôranh chiă uănh toyh ma mpôl tahan rơh pơh pah kan tâm khay rơh pơh jêng Y-Hêles, tâm ndŭl mpôl Êphraim gŭ ta Pêlôn. Mpôl tahan păng geh bar rmưn puăn rbăn nuyh tahan.

¹¹ Kôranh chiă uănh toyh ma mpôl rơh pham tahan pah kan tâm khay rơh pham jêng Y-Sibêkai gŭ ta Husa, tâm noi deh Sêra. Mpôl tahan păng geh bar rmưn puăn rbăn nuyh tahan.

¹² Kôranh chiă uănh toyh ma mpôl tahan rơh sĭn pah kan tâm khay rơh sĭn jêng Y-Abiêser, tâm ndŭl mpôl Benjamin gŭ ta Anathôt. Mpôl tahan păng geh bar rmưn puăn rbăn nuyh tahan.

¹³ Kôranh chiă uănh toyh ma mpôl tahan rơh jât pah kan tâm khay rơh jât geh Y-Maharai, tâm noi deh Sêra gŭ ta Nêtôphat. Mpôl tahan păng geh bar rmưn puăn rbăn nuyh tahan.

¹⁴ Kôranh chiă uănh toyh ma mpôl rơh jât ma nguay pah kan tâm khay jât ma nguay jêng Y-Bênaya, tâm ndŭl mpôl Êphraim gŭ ta Pirathôn. Mpôl tahan păng geh bar rmưn puăn rbăn nuyh tahan.

¹⁵ Kôranh chiă uănh toyh ma mpôl rơh jât ma bar pah kan tâm khay jât ma bar jêng Y-Hêldai, tâm noi deh Y-Ôtniêl gŭ ta Nêtôphat. Mpôl tahan păng geh bar rmưn puăn rbăn nuyh tahan.

Kôranh ma phung ndŭl mpôl

¹⁶ Aơ jêng kôranh ndŭl mpôl Israel: Y-Êliêser, kon Y-Sikri, jêng kôranh ma ndŭl mpôl Ruben; Y-Sêphatia, kon Y-Maka, jêng kôranh ma ndŭl mpôl Simêôn;

¹⁷ Y-Hasabia, kon Y-Kêmuêl, kôranh ma kôranh ndŭl mpôl Lêvi; bi Y-Sadôk chiă uănh kon sau Y-Arôn;

¹⁸ Y-Êlihu, nâu Y-Đavit, kôranh ma ndŭl mpôl Yuđa; Y-Ômri, kon Y-Mikel, kôranh ma ndŭl mpôl Isakar;

¹⁹ Y-Ismaya, kon Y-Ôbadia, kôranh ma ndŭl mpôl Sabulôn; Y-Jêrimôt, kon Y-Asriêl, kôranh ma ndŭl mpôl Naptali.

²⁰ Y-Hôsêa, kon Y-Asasia, kôranh ma ndŭl mpôl Êphraim; Y-Yôel, kon Y-Pêdaya, chiă uănh du n'gul ndŭl mpôl Manasê;

²¹ Y-Idô, kon Y-Sakari, chiă uănh du n'gul ndŭl mpôl Manasê tâm n'gor Gilêat; Y-Jasiêl, kon Y-Apner, kôranh ma ndŭl mpôl Benjamin;

²² Y-Asarel, kon Y-Jêrôham, kôranh ma ndŭl mpôl Dan. Aơ phung kôranh ma phung ndŭl mpôl Israel.

²³ Y-Đavit mâu kơp ôh phung Israel tâm dâng bar jât năm, yorlah Brah Yêhôva ton jêh, Păng mra ƀư ăn phung Israel jêng bĭk rơ̆ nâm bu mănh klơ trôk.

²⁴ Y-Jôap, kon H'Sêruya, ntơm kơp rnoh bunuyh ƀiălah mâu dơi lôch ôh. Yorlah kan nây nau Brah Ndu ji nuih tât ma phung Israel, jêh ri păng mâu nchih ôh amoh kơp tâm ndrom samƀŭt nau rêh jêng ma hađăch Đavit.

Phung kôranh mât uănh êng Y-Đavit

²⁵ Y-Asmavet, kon Y-Adiêl mât uănh lĕ jay prăp drăp khlay hađăch; Y-Jônathan, kon Y-Usia, mât uănh lĕ jay prăp drăp khlay tâm mir, tâm lĕ ƀon, tâm ƀon jê̆, jêh ri lĕ tâm pôih.

²⁶ Y-Êsri, kon bu klâu Y-Kêlup, mât uănh phung pah kan tâm mir;

²⁷ Y-Simei, bunuyh Ramat, djôt kan chiă uănh lĕ đang krăk ƀâu; jêh ri Y-Sapdi, bunuyh Sêpham, djôt kan chiă uănh jay ndrănh tâm đang krăk ƀâu;

²⁸ Y-Baal-Hanan, bunuyh Gêder, djôt kan chiă uănh tơm ôlive jêh ri tơm si sikamôr tâm n'gor Sêphêla; jêh ri Y-Jôas djôt kan chiă uănh lĕ jay dak ngi ôlive.

²⁹ Y-Sitrai, bunuyh Sarôn, djôt kan chiă uănh ndrôk phung rong tâm neh lâng Sarôn; bi Y-Saphat, kon Y-Adlai, djôt kan chiă uănh ndrôk tâm rlŭng.

³⁰ Y-Ôbil, bunuyh Ismaêl, djôt kan chiă uănh seh samô; Y-Jêhdêa, bunuyh Mêrônôt, djôt kan chiă uănh seh bri me; Y-Jasis, bunuyh Hagrit, djôt kan chiă uănh biăp.

³¹ Lĕ rngôch phung nây jêng phung kôranh mât uănh lĕ drăp ndơn hađăch Đavit.

³² Y-Jônathan, kônh Y-Đavit, ƀư nơm nchră, jêng du huê bunuyh geh nau gĭt mĭn jêh ri blau nchih samƀŭt; păng ndrel ma Y-Jêhiêl kon Y-Hakmônit, mât mray phung kon bu klâu hađăch.

³³ Y-Ahitôpel jêng nơm kôranh nchră ma hađăch; Y-Husai, bunuyh Arkit, jêng mĭt jiăng hađăch.

³⁴ Pakơi Y-Ahitôpel geh Y-Jêhôida, kon Y-Bênaya, jêh nây Y-Abiathar ntrok Y-Ahitôpel. Y-Jôap jêng kôranh chiă uănh toyh ma lĕ phung tahan hađăch.