I Nau Rêh Jêng 26 - Nau Brah Ndu Ngơi 2023

Kơp phung mât njrăng mpông pêr ngih brah

¹ Phung mât njrăng mpông pêr tâm pă jêng mbŭch nâm bu: Noi deh Kôra geh Y-Mêsêlêmia, kon Y-Kôrê, sau Y-Asap.

² Phung kon Y-Mêsêlêmia: Geh Y-Sakari jêng kon bôk rah, Y-Jêdiaêl jêng kon rơh bar, Y-Sêbadia jêng kon rơh pe, Y-Jatniêl jêng kon rơh puăn,

³ Y-Êlam jêng kon rơh prăm, Y-Jêhôhanan jêng kon rơh prao, jêh ri Y-Êliôênai jêng kon rơh pơh.

⁴ Y-Ôbet-Êđôm geh phung kon bu klâu: Y-Sêmaya jêng kon bôk rah, Y-Jêhôsaƀat jêng kon rơh bar, Y-Jôa jêng kon rơh pe, Y-Sakar jêng kon rơh puăn, Y-Nêthanel jêng kon rơh prăm,

⁵ Y-Amiêl jêng kon rơh prao, Y-Isakar jêng kon rơh pơh, jêh ri Y-Pêulêthai jêng kon rơh pham; yorlah Brah Ndu ăn nau ueh uĭn ma Y-Ôbet-Êđôm.

⁶ Y-Sêmaya, kon Y-Ôbet-Êđôm, jêng mbơ̆ phung kon bu klâu geh nau dơi ma noi deh khân păng nơm yorlah khân păng jêng phung tahan janh ktang.

⁷ Phung kon Y-Sêmaya jêng Y-Ôthni, Y-Rêphaêl, Y-Ôbet, Y-Êlsabat, jêh ri phung oh khân păng jêng Y-Êlihu jêh ri Y-Sêmakia, jêng phung janh ktang.

⁸ Lĕ rngôch phung nây jêng phung kon sau Y-Ôbet-Êđôm da dê; khân păng ndrel ma phung kon khân păng jêh ri phung oh nâu khân păng jêng phung janh ktang jêh ri geh nau dơi ƀư kan, geh prao jât ma bar nuyh jêng noi deh Y-Ôbet-Êđôm.

⁹ Y-Mêsêlêmia geh phung kon bu klâu jêh ri phung oh nâu jêng phung janh ktang da dê, lĕ rngôch geh jât ma pham nuyh.

¹⁰ Y-Hôsa, bơh noi Y-Mêrari, geh đŏng phung kon: Y-Simri jêng kôranh nđâp lah păng mâu jêng kon bôk rah, yorlah mbơ̆ păng njêng păng jêng kon bôk rah;

¹¹ Y-Hilkia jêng kon rơh bar, Y-Têbalia jêng kon rơh pe, jêh ri Y-Sakari jêng kon rơh puăn. Lĕ rngôch phung kon jêh ri phung oh nâu Y-Hôsa geh jât ma pe nuyh.

¹² Aơ jêng mbŭch phung mât njrăng mpông pêr ndrel ma phung kôranh mbŭch tĭng nâm di tâm ndăch gay pah kan tâm ngih Brah Yêhôva tâm ban ma phung oh nâu khân păng.

¹³ Khân păng ƀư tĭng nâm noi deh khân păng nchroh n'hôr ma kan gak mpông pêr, nơm jê̆ tâm ban ma bu ranh.

¹⁴ Nau tâm nchroh mât njrăng mpông pêr di ma Y-Sêlêmia. Jêh nây khân păng tâm nchroh mât njrăng mpông pêr mpeh pa lơ di ma Y-Sakari, kon Y-Sêlêmia, du huê nơm nchră geh nau gĭt mĭn.

¹⁵ Nau tâm nchroh mât njrăng mpông pêr mpeh pa dâng di ma Y-Ôbet-Êđôm; bi phung kon păng, kâp njrăng jay prăp drăp khlay.

¹⁶ Y-Supim jêh ri Y-Hôsa nchroh n'hôr di mât njrăng mpông pêr mpeh nhâp nar dăch mpông pêr Salêket, ta trong hao klơ sop. Ntŭk gak aơ tâm tra đah ntŭk gak ri.

¹⁷ Ăp nar geh prao nuyh phung Lêvi gak mpông pêr mpeh luh nar, puăn nuyh gak mpông pêr mpeh pa lơ, puăn nuyh gak mpông pêr mpeh pa dâng, jêh ri ta lĕ jay prăp drăp khlay geh đŏng bar hê.

¹⁸ Ta Parbar mpeh nhâp nar geh đŏng puăn nuyh gak: ta trong geh puăn bunuyh, jêh ri ta Parbar geh bar hê bunuyh.

¹⁹ Nây jêng lĕ mbŭch phung mât njrăng mpông pêr tâm kan kon sau Kôra jêh ri Y-Mêrari.

Phung kôranh chiă uănh jay prăp drăp khlay, phung kôranh phat dôih, jêh ri phung kôranh êng

²⁰ Tâm phung Lêvi, Y-Ahija jêng nơm mât mray drăp ngih Brah Ndu jêh ri drăp ndơ bu nhhơr kloh ueh.

²¹ Phung kon Y-Ladan, jêng noi deh phung Gersôn, jêng kôranh phung noi deh ma mpôl Y-Landan, bunuyh Gersôn, jêng Y-Jêhiêli.

²² Phung kon Y-Jêhiêli jêng Y-Sêtham jêh ri oh păng jêng Y-Yôel, sâm dơn mât uănh lĕ jay prăp drăp khlay ngih Brah Yêhôva.

²³ Tâm phung noi deh Amram, Ishar, Hêbron, jêh ri Usiêl,

²⁴ geh Y-Sêbuel, kon Y-Gersôm, kon Y-Môis, jêng kôranh chiă uănh lĕ jay prăp drăp khlay.

²⁵ Phung oh nâu Y-Sêbuel, jêng phung kon sau Y-Êliêser, geh Y-Rêhabia, kon Y-Êliêser; Y-Êsai, kon Y-Rêhabia; Y-Jôram, kon Y-Êsai; Y-Sikri, kon Y-Jôram, jêh ri Y-Sêlômôt, kon Y-Sikri.

²⁶ Y-Sêlômôt jêh ri phung oh nâu păng sâm dơn mât uănh lĕ rngôch ndơ kloh ueh, hađăch Đavit, phung kôranh ndŭl mpôl, phung kôranh chiă uănh toyh ma du rbăn nuyh jêh ri ma du rhiăng nuyh, jêh ri phung kôranh ma phung tahan hŏ prăp êng ma nau kloh ueh.

²⁷ Khân păng prăp êng kloh ueh lĕ ndơ hŏ pit sŏk tâm nau tâm lơh, gay nhhơr ma nau nkra ngih Brah Yêhôva.

²⁸ Lĕ rngôch ndơ nơm geh nau tâm saơ Y-Samuel, Y-Sôl (kon Y-Kis), Y-Apner (kon Y-Ner), jêh ri Y-Jôap (kon H'Sêruya), hŏ prăp êng ma nau kloh ueh, ndrel ma lĕ rngôch ndơ kloh ueh êng gŭ tâm dâng nau mât uănh Y-Sêlômôt jêh ri phung oh nâu păng da dê.

²⁹ Tâm noi phung Ishar, bu dơm Y-Kênania jêh ri phung kon păng jêng phung kôranh jêh ri phung kôranh phat dôih gay chiă ma lĕ nau kan phung ƀon lan Israel.

³⁰ Tâm noi deh Y-Hêbron, Y-Hasabia jêh ri phung oh nâu păng jêng phung tahan janh ktang, lĕ rngôch geh du rbăn pơh rhiăng nuyh; khân păng mât chiă phung Israel mpeh đah ri dak krong Yurdan ma mpeh nhâp nar, djôt kan chiă uănh lĕ nau kan Brah Yêhôva jêh ri pah kan hađăch.

³¹ Tâm noi deh Y-Hêbron, geh Y-Jêrija jêng kôranh tâm noi deh. Tâm năm rơh puăn jât rnôk rô̆ hađăch Đavit chiă uănh, bu kơp rnoh bunuyh noi deh Y-Hêbron, tĭng ăp noi deh khân păng, jêh ri saơ ta nklang khân păng geh phung dăng janh ta ƀon Jaser tâm n'gor Gilêat.

³² Phung oh nâu Y-Jêria jêng phung tahan janh ktang, geh bar rbăn pơh rhiăng nuyh, jêng phung kôranh tâm noi deh. Hađăch Đavit dơm khân păng mât chiă phung Ruben, phung Gat, jêh ri du n'gul ndŭl mpôl Manasê, gay chiă uănh lĕ nau kan Brah Ndu jêh ri ma kan hađăch.