I Nau Rêh Jêng 23 - Nau Brah Ndu Ngơi 2023

Y-Đavit njêng Y-Salômôn jêng hađăch

¹ Tơlah Y-Đavit hŏ ranh jêh ri năm jŏ jêh, păng njêng Y-Salômôn, kon bu klâu păng, jêng hađăch chiă uănh phung Israel.

Kơp phung Lêvi

² Y-Đavit rgum lĕ rngôch phung kôranh chiă uănh Israel ndrel ma phung kôranh ƀư brah jêh ri phung Lêvi.

³ Bu kơp phung Lêvi ntơm pe jât năm leo klơ, lĕ rngôch geh pe rmưn pham rbăn nuyh bu klâu.

⁴ Tâm phung nây, geh bar rmưn puăn rbăn bunuyh mra mât uănh nau kan tâm ngih Brah Yêhôva, prao rbăn bunuyh mra jêng phung kôranh jêh ri phung kôranh phat dôih,

⁵ puăn rbăn bunuyh mât njrăng mpông pêr, jêh ri puăn rbăn bunuyh tâm rnê ma Brah Yêhôva ma gong Y-Đavit hŏ ƀư jêh prăp ma kan tâm rnê Kôranh Brah.

⁶ Y-Đavit tâm pă khân păng jêng ăp mbŭch tĭng pe kon bu klâu Y-Lêvi jêng Y-Gersôn, Y-Kôhat jêh ri Y-Mêrari.

⁷ Phung kon bu klâu Y-Gersôn geh Y-Ladan jêh ri Y-Simei.

⁸ Phung kon Y-Ladan: Y-Jêhiêl jêng kôranh, jêh nây tât Y-Sêtham jêh ri Y-Yôel, lĕ rngôch jêng pe bunuyh.

⁹ Phung kon Y-Simei jêng Y-Sêlômôt, Y-Hasiêl, jêh ri Y-Haran, lĕ rngôch jêng pe bunuyh. Nĕ jêng phung kôranh tâm noi deh ma ndŭl mpôl Ladan.

¹⁰ Phung kon Y-Simei jêng Y-Jahat, Y-Sina, Y-Jêush, jêh ri Y-Bêria. Aơ jêng puăn bunuyh kon bu klâu Y-Simei.

¹¹ Y-Jahat jêng kôranh, Y-Sisa jêng nơm tal bar; ƀiălah Y-Jêush jêh ri Y-Bêria mâu geh ôh âk kon sau, yor nây bu kơp khân păng jêng phung du ndŭl mpôl.

¹² Phung kon Y-Kôhat jêng Y-Amram, Y-Ishar, Y-Hêbron, jêh ri Y-Usiêl, lĕ rngôch jêng puăn bunuyh.

¹³ Phung kon Y-Amram jêng Y-Arôn jêh ri Y-Môis; Y-Arôn jêh ri noi deh păng bu rnglah êng gay prăp ma kan nhhơr lĕ ndơ dŭt kloh ueh, jêh ri n'ho ro gŭch ndơ ƀâu kah, pah kan tanăp măt Brah Yêhôva, jêh ri sŏk amoh Păng gay ăn nau ueh uĭn ma phung ƀon lan kŏ tât ƀaƀơ n'ho ro.

¹⁴ Bi ma Y-Môis, bunuyh Brah Ndu, phung kon bu klâu păng mra kơp ndrel ma ndŭl mpôl Lêvi.

¹⁵ Phung kon Y-Môis jêng Y-Gersôm jêh ri Y-Êliêser.

¹⁶ Tâm phung kon Y-Gersôm geh Y-Sêbuel jêng kôranh.

¹⁷ Tâm phung kon Y-Êliêse geh Y-Rêhabia jêng kôranh; Y-Êliêser mâu geh ôh phung kon bu klâu, ƀiălah Y-Rêhabia geh âk ngăn kon bu klâu.

¹⁸ Tâm phung kon Y-Y-Ishar geh Y-Sêlômit jêng kôranh.

¹⁹ Tâm phung kon Y-Hêbron geh Y-Jêria jêng kôranh, Y-Amaria jêng nơm rơh bar, Y-Jahasiêl jêng nơm rơh pe, jêh ri Y-Jêkamêam jêng nơm rơh puăn.

²⁰ Phung kon Y-Usiêl geh Y-Mika jêng kôranh, jêh ri Y-Isiya jêng nơm rơh bar.

²¹ Phung kon Y-Mêrari jêng Y-Mahli jêh ri Y-Musi. Phung kon Y-Mahli jêng Y-Êlêasar jêh ri Y-Kis.

²² Y-Êlêasar khĭt, mâu geh ôh kon bu klâu, knŏng geh kon bu ur; phung kon bu klâu Y-Kis jêng phung mpôl băl khân păng sŏk phung bu ur nây ƀư ur.

²³ Phung kon Y-Musi jêng Y-Mahli, Y-Êder jêh ri Y-Jêrêmôt, lĕ rngôch jêng pe nuyh.

Y-Đavit pă kan ma phung Lêvi

²⁴ Aơ jêng phung kon sau Y-Lêvi tĭng nâm ndŭl mpôl khân păng, jêng kôranh tâm noi deh bu nchih amoh khân păng tĭng amoh săk ăp nơm, ntơm bơh bar jât năm leo klơ; khân păng pah kan tâm ngih Brah Yêhôva.

²⁵ Yorlah Y-Đavit lah pô aơ: “Yêhôva Brah Ndu phung Israel ăn jêh nau đăp mpăn ma phung ƀon lan Păng, jêh ri Păng gŭ tâm ƀon Yêrusalem n'ho ro,

²⁶ pôri phung Lêvi mâu mra hôm ôh tung Ngih Bok mâu lah lĕ ndơ dŏng prăp ma kan tâm Ngih Bok.”

²⁷ Tĭng nâm nau Y-Đavit ntĭnh dăch dŭt, bu kơp phung Lêvi, ntơm bơh bar jât năm leo klơ.

²⁸ Nau kan khân păng jêng gŭ êp phung kon sau Y-Arôn gay ƀư nau kan ma ngih Brah Yêhôva, kan mât mray ndring ngih jêh ri lĕ jrô, mât mray ăn kloh lĕ rngôch ndơ kloh ueh, jêh ri ƀư ăp nau kan ma ngih Brah Yêhôva:

²⁹ nâm bu ndrăp nkra piăng let nhhơr, rnih môi dŏng ƀư ndơ ƀư brah rnih môi, ƀănh n'hơ mâu geh ndrui, lĕ ndơ gŭch ta klơ mpĭt, ndơ ƀư brah pot dak ngi ôlive, jêh ri lĕ ndơ veh.

³⁰ Ăp ôi jêh ri kêng mhaơ, khân păng mra dâk ta nây tâm rnê jêh ri mât ton ma Brah Yêhôva.

³¹ Ăp nar saƀat, nar rƀŭn khay mhe, jêh ri lĕ nar rƀŭn toyh, khân păng kơl mro nhhơr tanăp măt Brah Yêhôva lĕ ndơ ƀư brah gŭch, nhhơr ƀaƀơ ma Brah Yêhôva tĭng nâm nau vay ma ndơ ƀư brah.

³² Khân păng tâm ban đŏng djôt kan chiă uănh Ngih Bok Nau Tâm Rƀŭn jêh ri Ntŭk Kloh Ueh, jêh nây kơl phung kon sau Y-Arôn, jêng phung oh nâu khân păng, gay pah kan tâm ngih Brah Yêhôva.