I Nau Rêh Jêng 22 - Nau Brah Ndu Ngơi 2023

Y-Đavit ndrăp ndâk njêng ngih brah

¹ Y-Đavit lah: “Ntŭk aơ mra jêng ntŭk ngih brah ma Yêhôva Brah Ndu, jêh ri aơ jêng nơng ƀư brah prăp ăn ma phung Israel nhhơr ndơ ƀư brah gŭch.”

² Y-Đavit ntĭnh rgum lĕ phung bu năch gŭ tâm n'gor Israel, jêh ri păng ntĭnh ma phung châm trah lŭ gay ndâk ngih Brah Ndu.

³ Tâm ban đŏng Y-Đavit lĕ ndrăp âk ngăn loih prăp ƀư kđĭn, lăk-lê mpông; bi kông âk ngăn, kŏ tât bu mâu dơi njing.

⁴ Tơm si sêdar mâu dơi kơp ôh, yorlah phung Sidôn jêh ri phung Tyre rdeng âk ngăn tơm si sêdar tât ma hađăch Đavit.

⁵ Y-Đavit lah: “Y-Salômôn, kon bu klâu gâp, hôm ndăm jêh ri ê hŏ blau kan, ƀiălah ngih brah mra ndâk ma Brah Yêhôva toyh ngăn ngên, chrêk rmah jêh ri lư n'găr lam bri dak. Pônây, gâp mra ndrăp ma păng.” Yor ri, Y-Đavit ndrăp âk ngăn ndơ dŏng êlor păng khĭt.

Y-Đavit jao nau kan ndâk ngih brah ma Y-Salômôn jêh ri phung kôranh chiă uănh phung Israel

⁶ Nôk nây, Y-Đavit kuăl kon bu klâu păng jêng Y-Salômôn jêh ri ntĭnh ma păng gay ăn păng ndâk du mlâm ngih ma Brah Yêhôva Israel.

⁷ Y-Đavit lah ma Y-Salômôn: “Hơi kon, gâp geh nau mĭn ŭch ndâk du mlâm ngih brah ma amoh Yêhôva Brah Ndu gâp.

⁸ Ƀiălah Brah Yêhôva ngơi ma gâp pô aơ: ‘May hŏ ƀư pling mham bu âk jêh, hŏ ƀư jêh âk nau tâm lơh toyh; may mâu mra ndâk du mlâm ngih brah ma amoh Gâp ôh, yorlah may ƀư pling jêh âk ir mham tanăp Gâp klơ neh ntu,

⁹ Aơ, bu mra deh ma may du huê kon bu klâu, păng jêng du huê bunuyh đăp mpăn. Gâp mra ăn ma păng nau đăp mpăn, phung rlăng gŭ jŭm păng mâu mra hôm ôh ƀư rkhŭk păng; yor ri, amoh păng jêng Y-Salômôn. Tâm rô̆ păng, Gâp mra ăn phung Israel đăp mpăn, gŭ păn thơ.

¹⁰ Păng mra ndâk du mlâm ngih brah ma amoh Gâp; păng mra jêng kon bu klâu Gâp jêh ri Gâp mra jêng mbơ̆ păng. Gâp mra njêng sưng hađăch păng nâp ngăn ngên n'ho ro tâm n'gor Israel.’

¹¹ Aơ kon bu klâu gâp, aƀaơ, dăn Brah Yêhôva gŭ n'hanh may jêh ri kơl may geh nau dơi tâm kan ndâk ngih brah ma Yêhôva Brah Ndu may, tĭng nâm nau Păng ngơi jêh ma may.

¹² Dăn ma Brah Yêhôva ăn ma may nau gĭt mĭn jêh ri nau gĭt rbăng gay may chiă uănh phung Israel jêh ri djôt prăp nau vay Yêhôva Brah Ndu may.

¹³ Tơlah may njrăng tĭng lĕ nau vay dăp jêh ri lĕ nau vay ƀư bơh Brah Yêhôva hŏ ngơi jêh ma Y-Môis ntăm ma phung Israel, may mra geh nau dơi. Dăng ktang hom jêh ri nâp nuih n'hâm! Lơi klach ôh, lơi rdja nuih ôh!

¹⁴ Aơ, gâp hŏ anh jêh hŏt rgănh âk ngăn gay ndrăp nkra ma ngih brah Brah Yêhôva pe rmưn tân mah, pe rmưn tân prăk; bi kông jêh ri ro loih mâu hôm dơi njing ôh, yorlah geh âk ir. Gâp tâm ban đŏng ndrăp nkra jêh tơm si jêh ri lŭ, ƀiălah may ntop đŏng ma ndơ aơ.

¹⁵ Rlau lơn ma nĕ, may geh âk ngăn bunuyh pah kan, phung châm trah lŭ, phung ndâk lŭ, phung trah si, ăp ntil phung blau pah lĕ rngôch nau kan;

¹⁶ phung blau ma mah, prăk, kông, jêh ri loih jêng âk ir mâu dơi kơp ôh. Dâk pah kan hom! Brah Yêhôva mra gŭ n'hanh may.”

¹⁷ Tâm ban đŏng Y-Đavit ntĭnh jêh ma lĕ rngôch phung kôranh chiă uănh Israel ăn kơl Y-Salômôn, kon bu klâu păng:

¹⁸ “Mâu di hĕ Yêhôva Brah Ndu khân may gŭ ndrel ma khân may? Păng ăn jêh ma khân may nau đăp mpăn puăn mpeh. Yorlah Păng jao jêh phung gŭ ta n'gor tâm ti gâp, jêh ri n'gor aơ hŏ lăp jêh tanăp Brah Yêhôva jêh ri phung ƀon lan Păng.

¹⁹ Pôri aƀaơ, ma lĕ nuih n'hâm jêh ri lĕ mĭn khân may joi hom Yêhôva Brah Ndu khân may. Ntơm ndâk hom ngih brah kloh ueh ma Yêhôva Brah Ndu, gay ma Hip Nau Tâm Rnglăp Brah Yêhôva jêh ri lĕ ndơ dŏng kloh ueh Brah Ndu dơm tâm ngih brah ndâk jêh ma amoh Brah Yêhôva.”