I Nau Rêh Jêng 21 - Nau Brah Ndu Ngơi 2023

Y-Đavit kơp rnoh bunuyh

¹ Satan dâk tâm rdâng đah phung Israel, jêh ri nsŭk nsôr Y-Đavit kơp rnoh bunuyh.

² Y-Đavit lah ma Y-Jôap jêh ri ma phung kôranh chiă uănh phung tahan păng pô aơ: “Hăn kơp hom phung Israel, ntơm bơh Bêr-Sêba tât ma ƀon Dan, jêh nây sĭt mbơh ma gâp gay ma gâp dơi gĭt ndah âk nuyh khân păng.”

³ Y-Jôap lah: “Dăn ma Brah Yêhôva ntop âk đŏng ma phung ƀon lan Păng ma du rhiăng tơ̆! Hơi hađăch jêng kôranh gâp, mâu di hĕ lĕ rngôch phung ƀon lan jêng oh mon ma kôranh gâp? Mâm ƀư kôranh gâp ntĭnh ƀư nau nây? Mâm dĭng kôranh gâp nsŭk Israel geh nau tih?”

⁴ Ƀiălah nau ngơi hađăch dơi lơn đah nau ngơi Y-Jôap. Yor ri, Y-Jôap dâk hăn lam n'gor Israel jêh nây plơ̆ sĭt ma Yêrusalem.

⁵ Y-Jôap mbơh ma Y-Đavit lĕ rngôch phung ƀon lan kơt aơ: Tâm lĕ n'gor Israel geh du rkeh ma du rsen bunuyh dơi djôt đao; tâm Yuđa geh puăn rsen pơh rmưn dơi djôt đao.

⁶ Ƀiălah păng mâu kơp ôh nđâp phung Lêvi jêh ri phung Benjamin, yorlah Y-Jôap tâm rmot ngăn ma nau hađăch ntăm.

Brah Ndu rmal phung Israel

⁷ Nau kơp rnoh bunuyh jêng nau mhĭk tanăp măt Brah Ndu, pôri Păng rmal phung Israel.

⁸ Y-Đavit lah ma Brah Ndu: “Gâp hŏ ƀư tih toyh ngăn, dôl gâp ƀư nau nây. Ƀiălah aƀaơ ri, dăn ma Kôranh Brah lơi klăp ndăng lĕ nau kue bơh oh mon May; yorlah gâp ƀư jêh ma nau rluk ngăn.”

⁹ Brah Yêhôva ngơi ma Y-Gat jêng nơm geh nau tâm saơ ma Y-Đavit pô aơ:

¹⁰ “Hăn hom lah ma Y-Đavit: Brah Yêhôva lah: ‘Gâp ntŭp pe nau mhĭk ma may; săch hom du ntil tâm nau nây, gay ma Gâp dơi ƀư nau nây ma may.’”

¹¹ Y-Gat hăn mâp ma Y-Đavit jêh ri lah ma păng: “Brah Yêhôva lah: ‘Săch hom moh nau may ŭch:

¹² mâu lah pe năm ji ngot, mâu lah pe khay nau ƀư rai tă bơh phung rlăng may jêh ri đao phung rlăng may ban lơh may; mâu lah pe nar ma đao Brah Yêhôva rmal, jêng nau ji tưp tâm n'gor jêh ri tông mpăr Brah Yêhôva ƀư rai lam n'gor bri Israel.’ Pôri aƀaơ ri, săch hom nau gâp mra plơ̆ sĭt lah ma Nơm prơh gâp hăn.”

¹³ Y-Đavit lah ma Y-Gat: “Gâp tŭp tâm nau rêh ni toyh ngăn. Ăn gâp tŭp tâm ti Brah Yêhôva, yorlah nau Păng yô̆ nđach toyh ngăn; lơi ăn ôh gâp tŭp tâm ti bunuyh.”

Tông mpăr Brah Yêhôva ta ntŭk mprah ba Y-Ôrnan, bunuyh Jêbusit

¹⁴ Brah Yêhôva njuăl nau ji tưp tât ma phung Israel ƀư ma pơh rmưn bunuyh Israel cha lôt khĭt.

¹⁵ Brah Ndu prơh du huê tông mpăr hăn gay ƀư rai Yêrusalem. Ƀiălah tơlah saơ tông mpăr dôl ƀư rai Yêrusalem, Brah Yêhôva tâm rgâl nau mĭn ma nau ƀư mhĭk nây, jêh ri Păng ntăm ma tông mpăr nơm ƀư rai: “Găp jêh! Nkân hom ti may.” Rnôk nây taơ, tông mpăr Brah Yêhôva dâk dăch ntŭk mprah ba Y-Ôrnan, bunuyh Jêbusit.

¹⁶ Y-Đavit n'gơr uănh, saơ tông mpăr Brah Yêhôva dâk vah vang neh đah trôk, ti păng djôt đao yơr ta klơ Yêrusalem. Y-Đavit jêh ri phung bu ranh dôl nsoh ao ƀau, chon mon tâm neh.

¹⁷ Y-Đavit lah ma Brah Ndu: “Mâu di hĕ gâp ntĭnh jêh ăn kơp rnoh bunuyh? Ơ, gâp nơm ƀư jêh nau tih jêh ri ƀư nau mhĭk, ƀiălah moh phung biăp aơ mâu geh ƀư tih ôh? Hơi Yêhôva Brah Ndu gâp! Gâp dăn ma ti Kôranh Brah rmal ma gâp jêh ri ma ngih mbơ̆ gâp, ƀiălah lơi ƀư mhĭk ma phung ƀon lan May.”

Y-Đavit ndâk nơng ƀư brah jêh ri nhhơr mpa ƀư brah

¹⁸ Nôk nây, tông mpăr Brah Yêhôva ntĭnh ma Y-Gat lah ma Y-Đavit gay ma Y-Đavit hăn hao ndâk du nơng ƀư brah ma Brah Yêhôva ta ntŭk mprah ba Y-Ôrnan, bunuyh Jêbusit.

¹⁹ Y-Đavit hăn ƀư tĭng nâm nau Y-Gat hŏ ngơi tâm amoh Brah Yêhôva.

²⁰ Y-Ôrnan n'gĭl, saơ tông mpăr; bi puăn nuyh kon bu klâu păng dôl gŭ ta nây du krap da dê. Nôk nây, Y-Arauna dôl gŭ mprah ba ƀlê.

²¹ Y-Đavit văch ma Y-Ôrnan. Uănh saơ Y-Đavit, Y-Ôrnan luh tă bơh ntŭk mprah ba, chon mon ta neh jêh ri păn muh măt ta neh tanăp măt Y-Đavit.

²² Y-Đavit lah ma Y-Ôrnan: “Ăn hom ma gâp ntŭk mprah ba aơ. Tăch hom di rnoh khlay gay gâp dơi ndâk du nơng ƀư brah ma Brah Yêhôva gay ma nau mhĭk nsrŭng, mâu hôm ăn tât ta phung ƀon lan.”

²³ Y-Ôrnan lah ma Y-Đavit: “Dăn hađăch sŏk hom ntŭk mprah ba! Dăn kôranh gâp ƀư hom moh nau may mĭn ueh. Aơ, gâp ăn ndrôk ma hađăch dŏng ƀư ma ndơ ƀư brah gŭch, ndơ mprah ba ƀư long, bi ba ƀlê prăp ndơ ƀư brah rnih môi; gâp ăn lĕ ndơ nây.”

²⁴ Hađăch Đavit lah ma Y-Ôrnan: “Mâu ôh, gâp ŭch rvăt păng di rnoh khlay; yorlah gâp mâu ŭch sŏk ôh ndơ may nhhơr ma Brah Yêhôva, mâu đŏng nhhơr ôh du ndơ ƀư brah gŭch mâu huach ôh ndơ rvăt.”

²⁵ Pôri, Y-Đavit rvăt ntŭk mprah ba nây, mplơ̆ ma Y-Ôrnan ma sêkel mah, njing jâk klăp lah pơh kilô

²⁶ Ta nây, Y-Đavit ndâk nơng ƀư brah ma Brah Yêhôva, nhhơr lĕ ndơ ƀư brah gŭch, ndơ ƀư brah ma nau đăp mpăn, jêh ri kuăl mbơh sơm ma Brah Yêhôva. Păng plơ̆ lah ma păng ma ŭnh tă bơh trôk trŭnh ta klơ nơng ƀư brah nhhơr ndơ ƀư brah gŭch.

²⁷ Brah Yêhôva ntăm ma tông mpăr ntrŭp đao tâm ndrop.

Bu săch ntŭk ndâk ngih brah

²⁸ Tơlah Y-Đavit saơ Brah Yêhôva plơ̆ lah nau păng mbơh sơm ta ntŭk mprah ba Y-Ôrnan, bunuyh Jêbusit, hađăch nhhơr mpa ƀư brah ta nây.

²⁹ Yorlah nôk nây Ngih Bok Brah Yêhôva Y-Môis hŏ ndâk jêh tâm bri rdah jêh ri nơng ƀư brah nhhơr ndơ ƀư brah gŭch ăt hôm gŭ ta ntŭk prêh ta Gibêôn.

³⁰ Y-Đavit mâu nănh ôh hăn panăp nơng ƀư brah nây gay ôp ma Brah Ndu, yorlah păng klach krit ma đao tông mpăr Brah Yêhôva.