I Nau Rêh Jêng 20 - Nau Brah Ndu Ngơi 2023

Y-Đavit pit sŏk ƀon Raba

¹ Lăp yan kao, dôl phung hađăch vay leo phung tahan khăn păng hăn tâm lơh, Y-Jôap leo phung tahan ƀư rai lơi lĕ n'gor Ammôn jêh ri văch tât nchueng jŭm ƀon Raba, Y-Đavit hôm e ta ƀon Yêrusalem. Y-Jôap rduh lơh jêh ri ƀư rai ƀon Raba.

² Y-Đavit sŏk lơi đon hađăch tă bơh bôk rup brah Milkôm; đon hađăch nây njing jâk pe jât kilô mah, geh du găr lŭ khlay. Bu ndô đon hađăch nây ta bôk Y-Đavit. Rlau ma nây, Y-Đavit tâm ban đŏng sŏk âk ngăn ndơ pit tâm ƀon nây.

³ Bi phung ƀon lan tâm ƀon nây, hađăch ăn khân păng pah kan jâk ma ndruih, mâu lah kau loih, mâu lah sung loih. Y-Đavit ƀư pônây ma lĕ rngôch ƀon phung Ammôn. Jêh nây Y-Đavit jêh ri lĕ rngôch phung tahan plơ̆ sĭt ma Yêrusalem.

Nau dơi đah phung Philistin. – Bu nkhĭt pe bunuyh juat toyh

⁴ Jêh nau nây, geh nau tâm lơh đah phung Philistin ta Gêser. Nôk nây, Y-Sibêkai jêng bunuyh Husa lơh nkhĭt Y-Sipai, tâm noi deh phung toyh juat, jêh ri phung Philistin tông khân păng.

⁵ Geh tay đŏng nau tâm lơh đah phung Philistin, Y-Êlhanan, kon Y-Jar, lơh nkhĭt Y-Lahmi, oh Y-Gôliat, bunuyh Gat; n'gâr tak păng jêng nâm bu mâng mpeh tanh.

⁶ Geh đŏng nau tâm lơh ta ƀon Gat, ta nây geh du huê bunuyh săk jăn juat toyh, ăp mpang ti geh prao nglau jêh ri ăp mpang jâng geh đŏng prao mlâm, lĕ rngôch jêng bar jât ma puăn nglau; păng jêng noi deh phung toyh juat.

⁷ Păng mưch ma phung Israel, pôri Y-Jônathan, kon Y-Simêa, nâu Y-Đavit, lơh nkhĭt păng.

⁸ Phung nây jêng noi deh phung toyh juat ta Gat; khân păng khĭt ma ti Y-Đavit jêh ri ma ti phung oh mon păng.