I Nau Rêh Jêng 19 - Nau Brah Ndu Ngơi 2023

Hađăch phung Ammôn mưch rmot ma phung mbơh Y-Đavit

¹ Jêh lĕ nau nây, hađăch Amôn jêng Y-Nahas khĭt, jêh ri kon bu klâu păng jêng hađăch chiă uănh thoi păng.

² Y-Đavit lah: “Gâp ŭch mpơl nau rŏng dơh dăch ma Y-Hanun, kon Y-Nahas, nâm bu mbơ̆ păng nơm ƀư nau ueh ma gâp.” Y-Đavit prơh phung mbơh hăn gay bonh leng Y-Hanun yor nau khĭt mbơ̆ păng. Pônây, phung oh mon Y-Đavit hăn tât ma Y-Hanun tâm n'gor phung Ammôn gay bonh leng păng.

³ Ƀiălah phung kôranh chiă uănh ma phung Ammôn mbơh ma Y-Hanun: “May mĭn lĕ ma Y-Đavit prơh jêh phung mbơh hăn tât gay bonh leng may yorlah nau păng yơk ma mbơ̆ may? Mâu di hĕ phung oh mon păng văch ma may gay ŭch sek uănh jêh ri n'hut uănh n'gor gay ƀư rai n'gor?”

⁴ Y-Hanun nhŭp phung mbơh Y-Đavit, poih lơi têp jêh ri koh lơi ao khân păng ta nklang n'gul gang bŭt khân păng, jêh nây mprơh khân păng sĭt.

⁵ Pônây khân păng hăn. Geh bu nkoch bri ma Y-Đavit gĭt nau lĕ tât. Hađăch prơh bunuyh hăn tâm mâp đah khân păng, yorlah phung nây bêng ma nau prêng. Hađăch lah: “Gŭ hom ta ƀon Yêrikô kŏ tât têp khân may hon tay, jêh nây plơ̆ sĭt hom.”

Phung Ammôn, phung Aram jêh ri phung mpeh băl khân păng roh nau dơi

⁶ Tơlah phung Ammôn gĭt Y-Đavit ji nuih ma khân păng, Y-Hanun jêh ri phung Ammôn prơh bunuyh djôt leo pe jât tân prăk hăn tât n'gor Mêsôpôtami, n'gor Aram-Maka, jêh ri n'gor Sôba gay nkhôm ndeh seh jêh ri phung tahan ncho seh.

⁷ Khân păng nkhôm pe rmưn bar rbăn ndeh seh jêh ri nkhôm hađăch n'gor Maka ndrel ma phung tahan păng đŏng. Khân păng văch jêh ri njơh rmlak ta panăp Mêdêba. Phung Ammôn tă bơh lĕ ƀon khân păng rgum băl ma nau tâm lơh.

⁸ Tăng nau nây, Y-Đavit prơh Y-Jôap hăn tâm lơh ndrel ma phung tahan jêng phung tahan janh ktang păng.

⁹ Phung Ammôn hăn luh, nkrĭp dăp tahan ta ntŭk mpông ƀon; bi phung hađăch mpeh băl păng gŭ tâm mir.

¹⁰ Tơlah Y-Jôap saơ phung rlăng nkrĭp dăp tahan panăp jêh ri pakơi păng, păng săch phung ƀaƀă tahan janh ktang tâm phung tahan Israel jêh ri nkrĭp dăp tahan khân păng panăp phung tahan Aram.

¹¹ Phung tahan hôm e, păng jao ăn ma oh păng jêng Y-Abisai; khân păng nkrĭp dăp tahan panăp đah phung Ammôn.

¹² Păng lah: “Tơlah phung tahan Aram ktang ir ma gâp, may mra kơl gâp; ƀiălah tơlah phung Ammôn ktang lơn may, gâp mra văch kơl may.

¹³ Ƀư dăng ktang hom, nâp nuih n'hâm hom! Yor phung ƀon lan he, yor ma ƀon Brah Yêhôva dĭng he tâm lơh. Dăn Brah Yêhôva ƀư tĭng nâm nau Păng mĭn ueh.”

¹⁴ Pônây, Y-Jôap jêh ri phung tahan hăn tĭng păng văch dăch tâm lơh đah phung tahan Aram; jêh ri phung tahan Aram nchuăt du bơh păng.

¹⁵ Tơlah phung Ammôn saơ phung tahan Aram nchuăt du jêh, khân păng tâm ban đŏng nchuăt du bơh Y-Abisai, oh Y-Jôap, jêh ri plơ̆ sĭt ma ƀon. Jêh nau nây, Y-Jôap plơ̆ sĭt ta Yêrusalem.

¹⁶ Tơlah phung tahan Aram saơ phung Israel dơi jêh đah khân păng, khân păng prơh phung mbơh hăn gay đă phung Siri gŭ tă bơh kăl tê̆ dak krong kơl an, geh Y-Sôpach, kôranh chiă uănh toyh phung tahan, Y-Hadadêser, jêng nơm chiă uănh khân păng.

¹⁷ Y-Đavit gĭt nau nây, păng tâm rgum ndrel lĕ rngôch phung tahan Israel rgăn kăl tê̆ dak krong Yurdan, hăn tât nkrĭp dăp tahan jêh ri tâm lơh đah phung tahan Aram. Tơlah Y-Đavit nkrĭp dăp tahan panăp đah phung tahan Aram, khân păng tâm lơh đah păng.

¹⁸ Phung Aram nchuăt du panăp phung Israel. Y-Đavit nkhĭt pơh rbăn nuyh tahan ncho seh, puăn rmưn nuyh tahan hăn jâng phung Aram, jêh ri nkhĭt đŏng Y-Sôpach, kôranh chiă uănh ma phung tahan khân păng.

¹⁹ Tơlah phung oh mon Y-Hadadêser saơ phung Israel dơi jêh đah khân păng; khân păng ƀư nau đăp mpăn đah Y-Đavit jêh ri pah kan ma păng. Pakơi taơ phung Aram mâu hôm ŭch kơl ôh ma phung Ammôn.