I Nau Rêh Jêng 18 - Nau Brah Ndu Ngơi 2023

Lĕ nau dơi Y-Đavit

¹ Jêh nau nây, Y-Đavit dơi đah phung Philistin, nhŭp khân păng, pit sŏk ƀon Gat jêh ri lĕ rngôch n'gor jŭm bơh ti khân păng.

² Y-Đavit dơi đŏng đah phung Môap; ăn phung Môap pah kan jêh ri chê̆ pi ma Y-Đavit.

³ Y-Đavit dơi đŏng đah Y-Hadadêser, hađăch ƀon Sôba, mpeh ma Hamat, dôl păng hăn ƀư ăn nâp nau chiă uănh tât ta dak krong Ơphrat.

⁴ Y-Đavit sŏk gro bơh hađăch Sôba du rbăn bôk ndeh, pơh rbăn tahan ncho seh, jêh ri bar rmưn tahan hăn jâng. Y-Đavit sreh jâng jon lĕ rngôch seh uih ndeh, knŏng om tŏng du rhiăng seh.

⁵ Tơlah phung Aram bơh Damas văch ŭch kơl ma Y-Hadadêser, hađăch Sôba, Y-Đavit nkhĭt bar rmưn bar rbăn nuyh tahan tâm phung Aram.

⁶ Y-Đavit dơm phung tahan ta pôih tâm n'gor Aram jêng ndơ ƀon Damas; phung Aram pah kan jêh ri chê̆ pi ma Y-Đavit. Brah Yêhôva kơl Y-Đavit geh nau dơi tâm nau tâm lơh ăp ntŭk păng hăn tât.

⁷ Y-Đavit sŏk lĕ khêl mah bơh phung oh mon Y-Hadadêser djôt, jêh ri leo ndơ nây sĭt ma Yêrusalem.

⁸ Ntơm bơh Tibhat jêh ri Kun jêng bar ƀon Y-Hadadêser, Y-Đavit pit in âk ngăn kông, ma kăndơ̆ taơ Y-Salômôn dŏng ƀư drŏng dơ dak, jêh ri meh jêh nây khăl ngan ma kông.

⁹ Tơlah Y-Tôu, hađăch ƀon Hamat, tăng lư ma Y-Đavit dơi jêh đah lĕ phung tahan Y-Hadadêser, hađăch ƀon Sôba,

¹⁰ păng prơh Y-Hadôram, kon bu klâu păng, hăn tât chop khâl jêh ri mât ton ma hađăch Đavit tâm lơh jêh ri dơi jêh đah Y-Hadadêser, yorlah Y-Hadadêser vay tâm lơh đah Y-Tôu mro mrăng. Y-Tôu njuăl nkơ ma Y-Đavit lĕ ntil ndơ dŏng ƀư ma mah, ma prăk, jêh ri ma kông.

¹¹ Hađăch Đavit prăp êng ma nau kloh ueh ma Brah Yêhôva lĕ ndơ dŏng nây ndrel ma prăk jêh ri mah păng pit in jêh bơh lĕ rngôch phung ntil mpôl bunuyh bơh phung Êđôm, phung Môap, phung Ammôn, phung Philistin, jêh ri phung Amalek.

¹² Y-Abisai, kon H'Sêruya, tâm lơh đah phung Êđôm tâm rlŭng Boh, jêh ri nkhĭt du rmưn pham rbăn bunuyh.

¹³ Păng ndâk pôih tahan tâm n'gor Êđôm, jêh ri lĕ rngôch phung Êđôm jêng oh mon ma Y-Đavit. Brah Yêhôva kơl Y-Đavit geh nau dơi tâm nau tâm lơh ăp ntŭk păng hăn.

Nau chiă uănh Y-Đavit

¹⁴ Y-Đavit jêng hađăch chiă uănh lĕ rngôch phung Israel, ƀư nau di jêh ri nau sŏng ma lĕ rngôch phung ƀon lan.

¹⁵ Y-Jôap, kon H'Sêruya, jêng kôranh toyh ma lĕ rngôch phung tahan; Y-Jêhôsaphat, kon Y-Ahilut, jêng kôranh kâp nchih samƀŭt prăp nau tât;

¹⁶ Y-Sadôk, kon Y-Ahitup, jêh ri Y-Ahimêlek, kon Y-Abiathar, jêng phung kôranh ƀư brah; Y-Sêraya jêng kôranh nchih samƀŭt.

¹⁷ Y-Bênaya, kon Y-Jêhôida, mât uănh ma phung Chêrêthit jêh ri phung Pêlêthit, bi phung kon bu klâu Y-Đavit jêng phung kôranh toyh tâm kan hađăch.