I Nau Rêh Jêng 17 - Nau Brah Ndu Ngơi 2023

Brah Ndu mâu ăn ma Y-Đavit ndâk ngih brah

¹ Tơlah Y-Đavit gŭ jêh tâm nau mpăn rlêk ta ngih păng nơm, păng ngơi đah nơm mbơh lor Y-Nathan: “Aơ, gâp gŭ tâm ngih hađăch ƀư ma tơm si sêdar, ƀiălah Hip Nau Tâm Rnglăp Brah Yêhôva gŭ tâm ngih bok.”

² Y-Nathan lah ma Y-Đavit: “Ƀư hom lĕ nau may mĭn tâm nuih n'hâm may, yorlah Brah Ndu gŭ ndrel ma may.”

³ Ƀiălah tâm măng nây, geh nau Brah Ndu ngơi ma Y-Nathan:

⁴ “Hăn mbơh hom ma oh mon Gâp jêng Y-Đavit pô aơ, Brah Yêhôva lah: ‘May mâu mra ndâk ôh du rplay ngih brah ăn Gâp gŭ!’

⁵ Yorlah Gâp mâu mâp gŭ ôh tâm du mlâm ngih ntơm bơh nar Gâp njŭn ngluh jêh phung Israel tât ma nar aơ, ƀiălah Gâp hăn nsong jêh tă bơh ngih bok aơ tât ma ngih bok êng, ntơm bơh ntŭk aơ rlet ma ntŭk gŭ ri.

⁶ Tâm lĕ rngôch ntŭk Gâp nsong ndrel ma phung Israel, Gâp mâp ngơi lĕ du tong đah kôranh phung Israel, jêng nơm Gâp ntĭnh ƀư rmăk biăp ma phung ƀon lan Gâp, pô aơ: ‘Mâm khân may mâu ndâk ôh ma Gâp du mlâm ngih brah ma tơm si sêdar?’

⁷ Aƀaơ ri, may lah hom ma oh mon Gâp jêng Y-Đavit pô aơ, Brah Yêhôva ma phung tahan lah: ‘Gâp sŏk may tă bơh ndrêch gơ̆, tă bơh du huê rmăk biăp, njêng may jêng kôranh chiă uănh phung ƀon lan Israel Gâp.

⁸ Ăp ntŭk may hăn, Gâp gŭ ndrel ma may, ƀư rai lĕ rngôch phung rlăng may tanăp măt may; Gâp mra ăn may lư n'găr nâm bu amoh phung toyh ta neh ntu.

⁹ Gâp mra săch du ntŭk ma phung ƀon lan Israel Gâp, jêh ri tăm khân păng, gay ma khân păng dơi gŭ rêh ta nây, jêh ri khân păng mâu geh nau rŭng răng ôh. Phung djơh mhĭk mâu mra hôm tŭn jot đŏng ôh khân păng nâm bu rnôk saơm,

¹⁰ tâm ban nôk Gâp dơm jêh phung kôranh phat dôih chiă uănh phung ƀon lan Israel Gâp. Gâp mra ăn lĕ rngôch phung rlăng may plơ̆ lăp may. Gâp tâm ban đŏng mbơh ma may gĭt pô aơ Brah Yêhôva mra ndâk ma may du nau chiă uănh.

¹¹ Jêh nây tơlah tât jêh nar may mra khĭt hăn gŭ ndrel ma phung chô yau may, Gâp mra njêng noi deh may, jêng du huê tâm phung kon bu klâu may, n'hao chiă uănh ntrok may; Gâp mra ƀư nâp ktang ma ƀon bri hađăch păng.

¹² Păng yơh mra ndâk du mlâm ngih brah ma Gâp, jêh ri Gâp mra ăn nâp sưng hađăch păng kŏ tât ƀaƀơ n'ho ro.

¹³ Gâp mra jêng mbơ̆ păng, păng mra jêng kon Gâp; nau ueh Gâp mâu mra sŏk sĭt lơi ôh ma păng nâm bu Gâp sŏk sĭt jêh tă bơh nơm lor panăp may.

¹⁴ Gâp mra ƀư ăn nâp păng tâm ngih Gâp jêh ri tâm ƀon bri hađăch Gâp n'ho ro; sưng hađăch păng mra dơi nâp mro mrăng.’”

¹⁵ Y-Nathan mbơh lĕ rngôch nau tâm saơ nây ma Y-Đavit.

Y-Đavit mbơh sơm

¹⁶ Hađăch Đavit hăn lăp, gŭ panăp măt Brah Yêhôva, jêh ri lah pô aơ: “Hơi Yêhôva Brah Ndu, mbu gâp jêng, jêh ri mbu moh rnăk vâl gâp, dĭng May hŏ njŭn leo gâp tât ta ntŭk aơ?

¹⁷ Hơi Brah Ndu! Nau aơ jêng du ndơ jê̆ tanăp măt May, pôri May hôm ton ăn nau ueh uĭn ma ngih oh mon May ma âk rô̆ rlet kăndơ̆, jêh ri kơp jêh gâp nâm bu bunuyh geh nau yơk! Hơi Yêhôva Brah Ndu,

¹⁸ May ƀư ăn oh mon May geh nau yơk jêh pônây, moh Y-Đavit hôm dơi ngơi đŏng? Yorlah Kôranh Brah gĭt năl jêh oh mon May.

¹⁹ Hơi Brah Yêhôva! Yor oh mon May tĭng nâm nau mĭn May ŭch jêh ri May ƀư lĕ rngôch nau kan toyh aơ gay mpơl lĕ nau khlay ngăn nây.

²⁰ Hơi Brah Yêhôva, mâu geh ôh nơm tâm ban ma May, jêh ri tĭng nâm lĕ nau hên tăng jêh ma tôr hên, rlau ma May mâu geh ôh nơm jêng Brah Ndu.

²¹ Mâu geh phung ƀon lan êng ta neh ntu jêng nâm bu phung ƀon lan Israel May, du phung ƀon lan Brah Ndu sâm chuai an jêng phung ƀon lan prăp ma May? Kôranh Brah geh amoh toyh ngăn bơh lĕ nau kan toyh khư ma bu klach, dôl May mprơh phung ndŭl mpôl êng tanăp phung ƀon lan May, jêng phung May sâm chuai an jêh tă bơh n'gor bri Êjipt.

²² Kôranh Brah hŏ ƀư ăn ma phung ƀon lan Israel rlơ̆ jêng phung ƀon lan ma May nơm kŏ tât ƀaƀơ n'ho ro. Bi May, Hơi Brah Yêhôva, May jêng Brah Ndu khân păng.

²³ Aƀaơ aơ, hơi Brah Yêhôva! Dăn nau May ngơi jêh ma oh mon May jêh ri ma ngih păng gŭ nâp ƀaƀơ n'ho ro. Dăn May ƀư di tĭng nâm nau May ngơi jêh.

²⁴ Dăn nau nây dơi nâp, jêh ri amoh Kôranh Brah geh nau bu tâm rnê kŏ tât ƀaƀơ n'ho ro: Brah Yêhôva ma phung tahan jêng Brah Ndu phung Israel, jêng Brah Ndu phung Israel yơk mbah; bi ngih Y-Đavit jêng oh mon May dơi nâp ngăn ngên tanăp măt May!

²⁵ Hơi Brah Ndu gâp! May tâm mpơl jêh ma oh mon May gĭt pô aơ, May mra njêng ma păng du nau chiă uănh. Yor ri, oh mon May geh nau janh mbơh sơm tanăp May.

²⁶ Hơi Brah Yêhôva! May nơm jêng Brah Ndu, Nơm ton jêh lĕ nau ueh aơ ma oh mon May.

²⁷ Aƀaơ aơ, dăn ma Kôranh Brah ăn nau ueh uĭn ma nau oh mon May chiă uănh dơi gŭ ƀaƀơ n'ho ro tanăp may; yorlah, hơi Brah Yêhôva, lah May ăn nau ueh uĭn nau nây mra geh tât ƀaƀơ n'ho ro.”