I Nau Rêh Jêng 16 - Nau Brah Ndu Ngơi 2023

Y-Đavit nhhơr ndơ ƀư brah

¹ Khân păng tung Hip Nau Tâm Rnglăp Brah Ndu lăp dơm ta nklang ngih bok Y-Đavit hŏ ndâk jêh. Jêh nây khân păng nhhơr ndơ ƀư brah gŭch jêh ri ndơ ƀư brah ma nau đăp mpăn tanăp măt Brah Ndu.

² Tơlah Y-Đavit hŏ nhhơr ndơ ƀư brah gŭch jêh ri ndơ ƀư brah ma nau đăp mpăn lôch jêh, Y-Đavit sŏk amoh Brah Yêhôva gay ăn nau ueh uĭn ma phung ƀon lan.

³ Hađăch tâm pă ma lĕ rngôch phung Israel, bu klâu nđâp bu ur, ăp nơm du glo piăng let, du mlay puăch, jêh ri du glo ƀănh play krăk ƀâu kro.

Y-Đavit săch phung Lêvi pah kan tanăp Hip Nau Tâm Rnglăp

⁴ Hađăch săch bunuyh Lêvi pah kan tanăp Hip Nau Tâm Rnglăp Brah Yêhôva gay ăn khân păng kuăl mbơh sơm, tâm rnê, jêh ri mât ton ma Yêhôva Brah Ndu Israel:

⁵ Y-Asap jêng kôranh, Y-Sakari jêng nơm rơh bar, jêh nây geh Y-Jêhiêl, Y-Sêmiramôt, Y-Jêliêl, Y-Matithia, Y-Êliap, Y-Bênaya, Y-Ôbet-Êđôm, jêh ri Y-Jêiêl; khân păng geh kan kreh lĕ gong tâm ban gong rêng jêh ri gong rêng loih, bi Y-Asap rgu dang nteh ăn huy ngăn.

⁶ Y-Bênaya jêh ri Y-Jahasiêl jêng phung kôranh ƀư brah uh nŭng ƀaƀơ tanăp Hip Nau Tâm Rnglăp Brah Ndu.

Nau Mprơ Ơm Y-Đavit tâm rnê ma Kôranh Brah

⁷ Ta nar nây, tơ̆ lor lơn, Y-Đavit jao tâm ti Y-Asap jêh ri phung oh nâu păng mprơ tâm rnê ma Brah Yêhôva:

⁸ Mprơ tâm rnê hom ma Brah Yêhôva, jêh ri kuăl mbơh sơm ma amoh Păng, Mbơh hom nau kan Păng ta nklang phung mpôl băl bunuyh!

⁹ Mprơ hom ma Păng, tâm rnê hom ma Păng! Mĭn rvê hom lĕ rngôch nau kan khlay Păng!

¹⁰ Tâm rnê hom ma amoh kloh ueh Păng; Ăn nuih n'hâm phung joi Brah Yêhôva, răm maak hom!

¹¹ Joi hom Brah Yêhôva jêh ri nau ktang Păng, Joi hom muh măt Păng ƀaƀơ!

¹² Kah gĭt tay hom lĕ nau kan khlay Păng hŏ ƀư, Lĕ nau mbên jêh ri nau phat dôih bơh bâr mbung Păng,

¹³ Hơi phung noi deh Y-Israel jêng oh mon păng! Hơi phung kon sau Y-Yakôb jêng phung Păng săch jêh!

¹⁴ Păng yơh jêng Yêhôva Brah Ndu he; Nau phat dôih Păng ƀư ma lĕ rngôch bri ta neh ntu.

¹⁵ Kah gĭt hom nau tâm rnglăp Păng n'ho ro, Rbăn rô̆ lơi chuêl ma nau Păng ntĭm nti;

¹⁶ Jêng nau Păng tâm rnglăp hŏ ƀư jêh đah Y-Abraham, Hŏ sơm ton ma Y-Isăk,

¹⁷ Hŏ nal jêh ma Y-Yakôb jêng nau vay dăp, Jêh ri ma phung Israel jêng nau tâm rnglăp n'ho ro,

¹⁸ Tơlah Păng lah pô aơ: “Gâp mra ăn ma may n'gor Kanaan, Jêng du kô̆ drăp ndơn ma may.”

¹⁹ Dôl nôk nây, khân may knŏng jêng du rnoh djê̆ bunuyh, Jêng phung bu năch tâm n'gor nây;

²⁰ Hăn nsong tă bơh bri dak aơ tât ma bri dak êng, Tă bơh ƀon bri hađăch nây tât ma phung ƀon lan ri.

²¹ Păng mâu ăn bu tŭn jot khân păng; Yor khân păng, Păng nduyh phung hađăch:

²² “Lơi ta pah bi ôh phung Gâp lĕ tŏ jêh dak ƀâu kah, Lơi ƀư mhĭk ôh ma phung nơm mbơh lor Gâp.”

²³ Hơi lĕ rngôch lam neh ntu, tâm rnê hom ma Brah Yêhôva; Mbơh hom ăp nar nau Păng rklaih!

²⁴ Nkoch tay hom nau chrêk rmah Păng ta nklang lĕ bri dak, Mbơh lĕ nau kan hih rhâl Păng ƀư jêh ma lĕ rngôch phung ƀon lan!

²⁵ Yorlah Brah Yêhôva dŭt toyh, khư ngăn ma bu mprơ tâm rnê, Păng khư ngăn ma bu klach yơk rlau lơn ma lĕ rngôch brah.

²⁶ Yorlah lĕ rngôch brah phung ăp mpôl bunuyh jêng rup brah, Bi Brah Yêhôva rhăk jêh lĕ ndâr trôk.

²⁷ Nau rnam jêh ri nau nchrat ang gŭ tanăp Păng; Nau ktang jêh ri nau hâk răm gŭ tâm ntŭk Păng.

²⁸ Hơi mpôl phung ƀon lan, mât ton hom ma Brah Yêhôva, Nau chrêk rmah jêh ri nau brah ma Brah Yêhôva;

²⁹ Nau chrêk rmah ma Brah Yêhôva tâm di ma amoh Păng, Djôt leo hom ndơ nhhơr hao panăp Păng; Nkrơ̆ hom ma nau kloh ueh gay yơk mbah ma Brah Yêhôva.

³⁰ Ơ lĕ rngôch phung neh ntu, râm nsâr hom tanăp Păng! Neh ntu dơi ndâk nâp ngăn ngên, mâu dơi mpât n'gơ ôh.

³¹ Ăn lĕ ndâr trôk maak hom jêh ri neh ntu hâk răm! Tâm lĕ bri dak, bu nter lah: “Brah Yêhôva chiă uănh!”

³² Ăn dak mƀŭt jêh ri lĕ rngôch mpa tâm păng ngrông huy; Ăn mir jêh ri lĕ rngôch ndơ tâm nây răm maak da dê!

³³ Rnôk nây, lĕ rngôch tơm si tâm bri mra mprơ ma hâk răm tanăp Brah Yêhôva, Yorlah Păng hăn tât gay phat dôih neh ntu.

³⁴ Tâm rnê hom ma Brah Yêhôva, yorlah Păng jêng ueh; Nau ueh Păng hôm ƀaƀơ n'ho ro.

³⁵ Lah hom: “Hơi Brah Ndu, Nơm tâm rklaih hên! Tâm rklaih hom hên, Rgum tay hên jêh ri tâm rklaih hên tă bơh lĕ bri dak, Gay ma hên dơi tâm rnê ma amoh kloh ueh Kôranh Brah, Jêh ri geh nau răm maak tâm nau tâm rnê ma May.

³⁶ Tâm rnê ngăn ma Brah Yêhôva, Brah Ndu Israel, Ntơm bơh rnôk n'ho ro tât ma rnôk n'ho ro!” Lĕ rngôch phung ƀon lan plơ̆ lah ma du bâr: “Amen!” Jêh ri mât ton ma Brah Yêhôva.

Prăp nau yơk mbah mro mrăng

³⁷ Pôri, Y-Đavit dơm ăn ma Y-Asap jêh ri ma phung oh nâu păng gŭ ta panăp Hip Nau Tâm Rnglăp Brah Yêhôva gay pah kan ƀaƀơ panăp Hip Nau Tâm Rnglăp ăp nar.

³⁸ Hađăch tâm ban đŏng dơm ăn Y-Ôbet-Êđôm jêh ri phung prao jât ma pham nuyh oh nâu păng pah kan ta nây; Y-Ôbet-Êđôm, kon bu klâu Y-Jêduthun, jêh ri Y-Hôsa prăp ma kan mât njrăng mpông pêr.

³⁹ Hađăch dơm đŏng kôranh ƀư brah Y-Sadôk jêh ri phung oh nâu păng jêng phung kôranh ƀư brah pah kan panăp Ngih Bok Brah Yêhôva tâm ntŭk prêh klơ ta Gibêôn;

⁴⁰ ăp kêng ôi jêh ri kêng măng, khân păng nhhơr ndơ ƀư brah gŭch ma Brah Yêhôva ta klơ nơng ƀư brah ndơ ƀư brah gŭch, tĭng di nâm lĕ nau nchih jêh tâm nau vay Brah Yêhôva hŏ ntăm nti jêh ma phung Israel.

⁴¹ Ndrel ma khân păng geh Y-Hêman, Y-Jêduthun jêh ri phung êng bu săch prăp ma kan tâm rnê ma Brah Yêhôva, yorlah nau ueh Păng geh kŏ tât ƀaƀơ n'ho ro.

⁴² Y-Hêman jêh ri Y-Jêduthun geh nŭng, rgu dang nteh ăn huy jêh ri lĕ gong êng gay tâm rnê ma Brah Ndu. Bi phung kon bu klâu Y-Jêduthun ƀư kan mât njrăng mpông pêr.

⁴³ Lĕ rngôch phung ƀon lan hăn sĭt ma ngih khân păng; bi Y-Đavit sĭt rlet ngih gay ăn nau ueh uĭn ma phung bunuyh tâm ngih păng.