I Nau Rêh Jêng 15 - Nau Brah Ndu Ngơi 2023

Y-Đavit njŭn Leo Hip Nau Tâm Rnglăp ma Yêrusalem

¹ Y-Đavit ndâk ngih ma păng nơm tâm ƀon Đavit lôch jêh, păng ndrăp nkra du ntŭk jêh ri ndâk du mlâm ngih bok ma Hip Nau Tâm Rnglăp Brah Ndu.

² Nôk nây, Y-Đavit lah: “Mâu geh phung êng ôh, knŏng phung Lêvi dơi tung Hip Nau Tâm Rnglăp Brah Ndu, yorlah Brah Yêhôva săch jêh khân păng ăn tung Hip Nau Tâm Rnglăp Brah Yêhôva, jêh ri pah kan ma Păng n'ho ro.”

³ Y-Đavit tâm rƀŭn lĕ rngôch phung Israel ta ƀon Yêrusalem, gay tung leo Hip Nau Tâm Rnglăp Brah Yêhôva ma ntŭk păng dăp nkra jêh.

⁴ Y-Đavit ăt tâm rƀŭn đŏng phung kon sau Y-Arôn jêh ri phung Lêvi:

⁵ ma noi deh Y-Kôhat geh Y-Uriêl jêng kôranh tâm noi deh, ndrel ma phung oh nâu păng, geh du rhiăng bar jât nuyh;

⁶ ma noi deh Y-Mêrari geh Y-Asaya jêng kôranh tâm noi deh, ndrel ma phung oh nâu păng, geh bar rhiăng bar jât nuyh;

⁷ ma noi deh Y-Gersôm geh Y-Yôel jêng kôranh tâm noi deh, ndrel ma phung oh nâu păng, geh du rhiăng pe jât nuyh;

⁸ ma noi deh Y-Êlisaphan geh Y-Sêmaya jêng kôranh ndŭl mpôl, ndrel ma phung oh nâu păng, geh bar rhiăng nuyh;

⁹ ma noi deh Y-Hêbron geh Y-Êliêl jêng kôranh ndŭl mpôl, ndrel ma phung oh nâu păng, geh pham jât nuyh;

¹⁰ ma noi deh Y-Usiêl geh Y-Aminadap jêng kôranh ndŭl mpôl, ndrel ma phung oh nâu păng, geh du rhiăng jât ma bar nuyh.

¹¹ Y-Đavit kuăl jă phung kôranh ƀư brah Y-Sadôk, Y-Abiathar, jêh ri phung Lêvi jêng Y-Uriêl, Y-Asaya, Y-Yôel, Y-Sêmaya, Y-Êliêl, jêh ri Y-Aminadap.

¹² Hađăch lah ma khân păng: “Khân may jêng kôranh ma phung noi deh Lêvi. Pônây, ƀư kloh hom khân may nơm jêh ri phung oh nâu khân may, pôri khân may dơi tung Hip Nau Tâm Rnglăp Yêhôva Brah Ndu Israel ma ntŭk gâp dăp nkra jêh.

¹³ Yorlah tâm tơ̆ lor, khân may mâu mâp ôh tung Hip Nau Tâm Rnglăp, yor ri Yêhôva Brah Ndu rmal ma he, yorlah he mâu ôp ma Păng gay gĭt nâm nau ƀư ma di tĭng tâm nal.”

¹⁴ Pôri, phung kôranh ƀư brah jêh ri phung Lêvi ƀư kloh lơi khân păng nơm, gay tung leo Hip Nau Tâm Rnglăp Yêhôva Brah Ndu Israel.

¹⁵ Phung Lêvi sŏk mâng tung Hip Nau Tâm Rnglăp Brah Ndu ta săng nglik khân păng, di nâm nau Brah Yêhôva hŏ ntăm nti jêh ma Y-Môis.

¹⁶ Tâm ban đŏng Y-Đavit ntĭnh ma phung kôranh Lêvi ăn dơm kan phung oh nâu khân păng jêng phung mprơ mra kreh gong rêng, uh n'hôm, rgu nteh dang ăn huy gay geh bâr nteh hâk răm.

¹⁷ Phung Lêvi dơm Y-Hêman kon Y-Yôel, jêh ri oh nâu păng jêng Y-Asap, kon Y-Bêrêkia; ma noi deh Y-Mêrari, jêng phung oh nâu khân păng, geh Y-Êthan, kon Y-Kusaya;

¹⁸ ndrel ma khân păng, geh phung oh nâu khân păng jêng Y-Sakari, Y-Ben, Y-Jasiêl, Y-Sêmiramôt, Y-Jêhiêl, Y-Uni, Y-Êliap, Y-Bênaya, Y-Maseya, Y-Matithia, Y-Êliphêlêhu, Y-Mikneya, jêh ri phung mât njrăng mpông pêr Y-Ôbet-Êđôm jêh ri Y-Jêiêl.

¹⁹ Phung mprơ jêng Y-Hêman, Y-Asap, jêh ri Y-Êthan geh kan rgu dang nteh ma kông;

²⁰ Y-Sakari, Y-Asriêl, Y-Sêmiramôt, Y-Jêhiêl, Y-Uni, Y-Êliap, Y-Maseya, jêh ri Y-Bênaya geh kan kreh gong rêng tĭng nâm Alamôt;

²¹ hôm Y-Matithia, Y-Êliphêlêhu, Y-Mikneya, Y-Ôbet-Êđôm, Y-Jêiêl, jêh ri Y-Asasia, kreh gong rêng loih tĭng Sêminit gay ntĭm.

²² Y-Kênania jêng kôranh ma phung Lêvi mpât mprơ geh kan leo nau mprơ, yorlah păng gĭt vât kan nây.

²³ Bi Y-Bêrêkia jêh ri Y-Êlkana mât njrăng bôk mpông ma Hip Nau Tâm Rnglăp.

²⁴ Y-Sêbania, Y-Jôsaphat, Y-Nêthanel, Y-Amasai, Y-Sakari, Y-Bênaya, jêh ri Y-Êliêser jêng phung kôranh ƀư brah mra uh nŭng tanăp Hip Nau Tâm Rnglăp Brah Ndu; Bi Y-Ôbet-Êđôm jêh ri Y-Jêhia tâm ban đŏng jêng phung mât njrăng mpông pêr ma Hip Nau Tâm Rnglăp.

²⁵ Pôri, Y-Đavit jêh ri phung bu ranh Israel jêh ri phung kôranh ma du rbăn nuyh tahan hăn hao ngih Y-Ôbet-Êđôm, hăn vơt Hip Nau Tâm Rnglăp Brah Yêhôva plơ̆ sĭt tâm nau răm maak.

²⁶ Brah Ndu kơl jêh phung Lêvi tung Hip Nau Tâm Rnglăp Brah Yêhôva, khân păng nhhơr pơh mlâm ndrôk nkuăng jêh ri pơh mlâm biăp nkuăng ƀư mpa ƀư brah.

²⁷ Y-Đavit jêh ri lĕ rngôch phung Lêvi tung Hip Nau Tâm Rnglăp, phung mprơ jêh ri kôranh ma phung mprơ jêng Y-Kênania nsoh da dê ao jâr bok mhay rhên. Y-Đavit nsoh tay êphôt ƀư ma bok mhay.

²⁸ Pôri, lĕ rngôch Israel njŭn leo Hip Nau Tâm Rnglăp Brah Yêhôva ma nau troh nter, ma bâr nŭng, bâr rgu dang nteh ăn huy ngăn nđâp ma bâr gong rêng jêh ri gong rêng loih.

²⁹ Dôl Hip Nau Tâm Rnglăp Brah Yêhôva tât ma ƀon Đavit, ur hađăch jêng H'Mikal, kon bu ur Y-Sôl, n'gơr uănh ta mpông bloh jêh ri saơ hađăch Đavit pâl ntalơ̆ răm maak, tâm trôm nuih n'hâm păng mưch ma hađăch.