I Nau Rêh Jêng 14 - Nau Brah Ndu Ngơi 2023

Ngih hađăch jêh ri rnăk vâl Y-Đavit

¹ Y-Hiram, hađăch ƀon Tyre, prơh phung mbơh djôt leo phung ndâk lŭ, phung trah si nđâp âk tơm si sêdar tât gay rdâk ma hađăch Đavit du ngih hađăch.

² Y-Đavit gĭt năl pô aơ Brah Yêhôva hŏ njêng jêh păng dơi nâp ta klơ sưng hađăch Israel. Ƀon bri hađăch păng geh nau ndrŏng yor phung ƀon lan Israel Păng.

³ Ta Yêrusalem, Y-Đavit sŏk tay âk ur, jêh ri Y-Đavit geh âk đŏng kon bu klâu, kon bu ur.

⁴ Aơ jêng amoh phung kon păng geh ta Yêrusalem: Y-Samua, Y-Sôbap, Y-Nathan, Y-Salômôn,

⁵ Y-Iphar, Y-Êlisua, Y-Êlpêlêt,

⁶ Y-Nôga, Y-Nêphek, Y-Japhia,

⁷ Y-Êlisama, Y-Bêliada, jêh ri Y-Êliphêlet.

Y-Đavit dơi đah phung tahan Philistin

⁸ Tơlah phung Philistin tăng bu tŏ jêh dak ƀâu kah ăn Y-Đavit jêng hađăch chiă uănh lĕ rngôch phung Israel, lĕ rngôch phung tahan Philistin hăn hao tâm lơh đah Y-Đavit. Tăng lư nau nây, Y-Đavit djôt phung tahan hăn tâm lơh đah khân păng.

⁹ Phung Philistin văch gay ŭch sŏk gro ndô ndơ tâm rlŭng Rêphaim.

¹⁰ Y-Đavit ôp ma Brah Ndu: “Di lĕ gâp dơi hăn tâm lơh đah phung Philistin? Kôranh Brah mra jao khân păng tâm ti gâp lĕ?” Brah Yêhôva plơ̆ lah: “Hăn lơh hom, Gâp mra jao khân păng tâm ti may.”

¹¹ Phung tahan Philistin hăn hao ma Baal-Pêrisim, jêh ri Y-Đavit dơi đah khân păng ta nây. Y-Đavit lah: “Brah Ndu hŏ dŏng ti gâp ƀư rai jêh phung rlăng gâp nâm bu dak lip!” Yor ri, bu ntơ ntŭk aơ jêng Baal Pêrasim.

¹² Phung tahan Philistin chalơi lĕ rup brah khân păng ta nây jêh ri Y-Đavit ntĭnh ma bu su lơi rup brah nây.

¹³ Du tơ̆ đŏng, phung tahan Philistin hăn pit in đŏng tâm rlŭng.

¹⁴ Y-Đavit ôp ma Brah Ndu, jêh ri Brah Ndu lah ma păng: “May lơi hăn hao tĭng ôh khân păng. Hăn hao ndăch dăr jêh ri rduh lơh khân păng ntŭk panăp tơm si balsam.

¹⁵ Tơlah may tăng nteh jâng nhuat ta klơ chiông tơm si balsam, pôri hăn tâm lơh hom, yorlah Brah Ndu luh hăn lor jêh ma may gay lơh đah phung tahan Philistin.”

¹⁶ Y-Đavit ƀư tĭng nâm Brah Ndu ntĭnh jêh ma păng, jêh ri khân păng tâm lơh dơi đah phung tahan Philistin ntơm bơh Gibêôn tât ta Gêser.

¹⁷ Nau lư n'găr Y-Đavit lam ăp ntŭk, jêh ri Brah Yêhôva ƀư ăn lĕ rngôch phung ntil mpôl bunuyh klach krit ma Y-Đavit.