I Nau Rêh Jêng 12 - Nau Brah Ndu Ngơi 2023

Phung lor lơn hăn tĭng kơl Y-Đavit

¹ Aơ jêng phung bu klâu văch tĭng Y-Đavit ta Siklak, dôl păng du ndĕ đah Y-Sôl, kon Y-Kis; khân păng jêng tâm phung tahan janh ktang kơl jêh Y-Đavit tâm lơh.

² Khân păng blau djôt na, pănh ma hăr mâu lah blau klŭp lŭ ma ti chiau tâm ban ti ma. Tâm ndŭl mpôl Y-Sôl, bơh noi deh Benjamin,

³ kôranh khân păng jêng Y-Ahiêser; jêh nây Y-Jôas, kon Y-Sêma ta Gibêa; Y-Jêsiêl jêh ri Y-Pêlet, phung kon Y-Asmavet; Y-Beraka, Y-Jêhu ta Anathôt;

⁴ Y-Ismaya ta Gibêôn, jêng du huê tâm pe jât tahan janh ktang jêh ri kôranh chiă uănh toyh khân păng; Y-Yêrêmi; Y-Jahasiêl; Y-Jôhanan; Y-Jôsaƀat ta Gêdêra;

⁵ Y-Êlusai; Y-Jêrimôt; Y-Bêalia; Y-Sêmaria; Y-Sêphatia ta Harup;

⁶ Y-Êlkana, Y-Isiya, Y-Asarel, Y-Jôêser, jêh ri Jasôbêam, bunuyh Kôra;

⁷ Y-Jôêla jêh ri Y-Sêbadia, phung kon Y-Jêrôham ta Gêdôr.

⁸ Tâm ndŭl mpôl Gat, geh phung hăn gŭ mpeh Y-Đavit ta pôih tâm bri rdah. Khân păng jêng phung janh ktang, blau nau tâm lơh, blau djôt khêl jêh ri rjăng tak; muh măt khân păng nâm bu muh măt yau mŭr, khân păng nchuăt prăl nâm bu yơng ta klơ yôk.

⁹ Y-Êser jêng kôranh, Y-Ôbadia jêng rơh bar, Y-Êliap jêng rơh pe,

¹⁰ Y-Mismana jêng rơh puăn, Y-Yêrêmi jêng rơh prăm,

¹¹ Y-Atai jêng rơh prao, Y-Êliêl jêng rơh pơh,

¹² Y-Jôhanan jêng rơh pham, Y-Êlsabat jêng rơh sĭn,

¹³ Y-Yêrêmi jêng rơh jât, Y-Makbanai jêng rơh jât ma nguay.

¹⁴ Phung nây jêng phung Gat da dê, jêh ri jêng phung kôranh chiă uănh toyh ma phung tahan; phung jê̆ lơn chiă uănh du rhiăng tahan, kôranh toyh lơn chiă uănh du rbăn tahan.

¹⁵ Aơ jêng phung rgăn jêh dak krong Yurdan ta khay nguay, dôl dak krong hao toyh lip băm bar đah kơh; khân păng, mprơh lĕ rngôch phung gŭ tâm rlŭng plơ̆ sĭt mpeh luh nar jêh ri mpeh nhâp nar.

¹⁶ Ƀaƀă phung Benjamin jêh ri phung Yuđa văch mâp Y-Đavit ta pôih.

¹⁷ Y-Đavit văch chuă khân păng jêh ri lah pô aơ: “Tơlah khân păng văch ma gâp ma nau rŏng gay kơl gâp, nuih n'hâm gâp mra rŏng ma khân may. Ƀiălah tơlah khân may ŭch ndơm mƀruh jao gâp ma phung rlăng gâp, nđâp lah mâu geh nau tih ôh tâm ti gâp pônây ăn Brah Ndu phung che he saơ jêh ri nduyh khân may.”

¹⁸ Nôk nây, Huêng Brah nkŭm Y-Amasai, jêng kôranh ma phung pe jât bunuyh nây, ƀư ăn ma păng lah: “Hơi Y-Đavit, hên jêng phung may; Hơi kon bu klâu Y-Yêsê, hên gŭ mpeh ma may! Nau đăp mpăn, nau đăp mpăn ma may; Nau đăp mpăn ma phung kơl may! Yorlah Brah Ndu may kơl may!” Pônây Y-Đavit rom khân păng jêh ri njêng khân păng chiă uănh ma phung tahan păng.

¹⁹ Geh đŏng phung Manasê ƀaƀă hăn tĭng Y-Đavit tơlah păng hăn tĭng ndrel ma phung Philistin gay tâm lơh đah Y-Sôl. Ƀiălah Y-Đavit mâu kơl phung Philistin ôh, yorlah phung kôranh Philistin ăn ma Y-Đavit hăn plơ̆ sĭt, jêh tâm nchră ndrăng păng pô aơ: “Njrăng hom păng mra sŏk bôk he jêh nây plĕch plơ̆ sĭt ma Y-Sôl, jêng kôranh păng.”

²⁰ Dôl Y-Đavit plơ̆ sĭt tât ma Siklak, phung Manasê hăn tĭng păng, geh: Y-Atna, Y-Jôsaƀat, Jêdiaêl, Y-Mikel, Y-Jôsaƀat, Y-Êlihu, jêh ri Y-Silêthai, ăp nơm jêng kôranh chiă uănh toyh ma du rbăn tahan Manasê.

²¹ Phung nây kơl jêh Y-Đavit tâm rdâng đah phung văch pit in, yorlah lĕ rngôch khân păng jêng phung tahan janh ktang, jêh ri jêng phung kôranh chiă uănh tahan.

²² Yorlah ăp nar phung bunuyh văch ƀaƀơ ma Y-Đavit gay kơl păng, tât geh du phung tahan âk nâm bu phung tahan Brah Ndu.

Phung tahan Y-Đavit tâm Hêbron

²³ Aơ rnoh mpôl phung tahan văch ma Y-Đavit tâm ƀon Hêbron, gay jao ƀon bri hađăch Sôl ma Y-Đavit, di tĭng nâm nau Brah Yêhôva hŏ ntăm jêh.

²⁴ Ma phung kon sau Yuđa, geh prao rbăn pham rhiăng nuyh djôt khêl jêh ri tak, ndrăp jêh tâm lơh.

²⁵ Tâm phung kon sau Simêôn, geh pơh rbăn du rhiăng bunuyh tahan janh ktang, ndrăp jêh hăn tâm lơh.

²⁶ Tâm phung kon sau Lêvi, geh puăn rbăn prao rhiăng nuyh.

²⁷ Y-Jêhôida chiă uănh ma ngih Y-Arôn nđâp ma pe rbăn pơh rhiăng nuyh.

²⁸ Y-Sadôk, jêng du tahan ndăm janh ktang, jêh ri bar jât ma bar nuyh êng tâm noi deh păng jêng kôranh chiă uănh.

²⁹ Tâm phung kon sau Benjamin, ndŭl mpôl Y-Sôl, geh pe rbăn nuyh; yorlah tât rnôk nây, âk lơn tâm phung khân păng hôm geh nuih n'hâm răp jăp ma ngih Y-Sôl.

³⁰ Phung kon sau Êphraim, geh bar rmưn bar rbăn pham rhiăng nuyh, jêng phung tahan janh ktang, geh lư n'găr tâm noi deh khân păng.

³¹ Tâm du n'gul mpôl Manasê, geh du rmưn pham rbăn nuyh, bu ntĭnh ăn hăn njêng Y-Đavit ƀư hađăch.

³² Tâm phung kon sau Isakar, geh bar rhiăng bunuyh kôranh chiă uănh gĭt rblang lĕ nau tât jêh ri gĭt moh nau di ma phung Israel ƀư. Lĕ rngôch ndŭl mpôl khân păng tâm dâng nau khân păng chiă uănh.

³³ Tâm ndŭl mpôl Sabulôn, geh prăm rmưn nuyh ndrăp jêh hăn tâm lơh, djôt lĕ rngôch ndơ tâm lơh; khân păng geh nau dăp nkra jêh ri nuih n'hâm răp jăp ma Y-Đavit.

³⁴ Phung ndŭl mpôl Naptali, geh du rbăn kôranh chiă uănh toyh ndrel ma pe rmưn pơh rbăn nuyh djôt khêl jêh ri tak.

³⁵ Phung ndŭl mpôl Dan, geh bar rmưn pham rbăn prao rhiăng nuyh djôt ndơ tâm lơh.

³⁶ Phung ndŭl mpôl Aser, geh puăn rmưn nuyh blau tâm lơh nkra ma nau tâm lơh.

³⁷ Tâm ndŭl mpôl Ruben, Gat jêh ri du n'gul ndŭl mpôl Manasê ta kăl tê̆ dak krong Yurdan, geh du rsen bar rmưn nuyh djôt ăp ntil ndơ tâm lơh.

³⁸ Lĕ rngôch phung aơ jêng phung tahan blau jêh nau tâm lơh. Khân păng hăn hao ma Hêbron tĭng nâm mpôl, du nuih n'hâm ŭch njêng Y-Đavit ƀư hađăch chiă uănh lĕ rngôch phung Israel. Lĕ rngôch phung Israel knŏng geh du nuih n'hâm du nau mĭn gay njêng Y-Đavit hađăch.

³⁹ Khân păng gŭ ta nây ndrel ma Y-Đavit tâm pe nar jêh ri sông sa nhêt, yorlah phung oh nâu khân păng hŏ ăn jêh ndơ sông sa ma khân păng.

⁴⁰ Bơh lĕ nkual chiau meng tât neh Isakar, Sabulôn, jêh ri Naptali, lĕ rngôch bunuyh djôt leo ndơ sông sa; khân păng sŏk seh, seh samô, seh bri, jêh ri sŏk ndrôk rdeng piăng let, rnih môi, ƀănh play rvi, ƀănh play krăk ƀâu kro, ndrănh, dak ngi ôlive, jêh ri âk ngăn ndrôk jêh ri biăp. Nau răm maak lam phung Israel.