I Nau Rêh Jêng 11 - Nau Brah Ndu Ngơi 2023

Bu tŏ dak ƀâu kah ma Y-Đavit ƀư hađăch lĕ n'gor Israel

¹ Rnôk nây, lĕ rngôch phung Israel tâm rƀŭn ndrel ma Y-Đavit ta Hêbron jêh ri lah pô aơ: “Aơ, hên jêng noi deh du mham đah may.

² Rnôk saơm, dôl Y-Sôl jêng hađăch, may yơh njŭn jêh phung Israel luh jêh ri lăp; jêh ri Yêhôva Brah Ndu may lah ma may pô aơ: ‘May mra rmăk biăp ma phung ƀon lan Gâp jêng phung Israel, jêng kôranh chiă uănh khân păng.’”

³ Pôri, lĕ rngôch phung bu ranh Israel văch ma hađăch ta Hêbron. Y-Đavit ƀư nau tâm rnglăp ma khân păng ta Hêbron tanăp Brah Yêhôva; jêh nây khân păng tŏ dak ƀâu kah ma Y-Đavit jêng hađăch chiă uănh phung Israel, tĭng nâm nau Brah Yêhôva ngơi jêh đah Y-Samuel.

Y-Đavit pit sŏk ƀon Yêrusalem

⁴ Y-Đavit jêh ri lĕ rngôch phung Israel hăn rlet ƀon Yêrusalem, nâm bu ntĭt ƀon Jêbus. Phung ƀon lan tơm jêng phung Jêbusit dôl gŭ ta nây.

⁵ Phung gŭ tâm ƀon Jêbus lah ma Y-Đavit: “May mâu dơi văch lăp ta aơ ôh.” Ƀiălah Y-Đavit lơh pit jêh pôih nâp Siôn, nây jêng ƀon Đavit.

⁶ Y-Đavit lah: “Mbu nơm mra dong phung Jêbusit lor lơn mra jêng kôranh chiă uănh toyh jêh ri kôranh ma phung tahan.” Y-Jôap, kon H'Sêruya hăn hao lor, pônây păng jêng kôranh chiă uănh toyh ro.

⁷ Y-Đavit gŭ ta pôih nây, yor nây bu ntơ ma ntŭk nây ƀon Đavit.

⁸ Păng ndâk mpêr ƀon văr jŭm, ntơm bơh Milô tât lam văr jŭm; jêh ri Y-Jôap nkra đŏng lĕ ƀon mâu hŏ jêh.

⁹ Nau ktang Y-Đavit văch ma hao toyh lơn mro mrăng, yorlah Brah Yêhôva ma phung tahan gŭ ndrel ma păng.

Phung tahan janh ktang Y-Đavit

¹⁰ Aơ jêng phung kôranh ma phung tahan janh ktang Y-Đavit; phung kơl jêh păng tâm ƀon bri hađăch păng, jêh ri ndrel ma lĕ rngôch phung Israel gay njêng Y-Đavit jêng hađăch di nâm nau Brah Yêhôva ngơi jêh ma phung Israel.

¹¹ Aơ jêng amoh săk ma phung tahan janh ktang Y-Đavit: Y-Jasôbêam, kon bu klâu Y-Hakmônit, jêng kôranh ma “Pe Nuyh”; păng jêng nơm yơr tak păng nkhĭt pe rhiăng nuyh tâm du tơ̆.

¹² Pakơi păng geh Y-Êlêasar, kon Y-Dôdô, bunuyh Ahôhit, jêng du huê tâm pe nuyh tahan janh ktang.

¹³ Păng gŭ ndrel ma Y-Đavit ta Pas-Damim, tơlah phung tahan Philistin tâm rgum ndrel ta nây gay tâm lơh. Ta nây, geh mir bêng ba ôrgơ, jêh ri phung tahan Israel nchuăt du da dê panăp phung Philistin.

¹⁴ Ƀiălah khân păng dâk ta nklang mir tâm rdâng jêh ri lơh nkhĭt phung Philistin. Brah Yêhôva kơl khân păng geh nau dơi tâm lơh toyh.

¹⁵ Tâm phung “Pe Jât” geh pe nuyh hăn trŭnh trôm Lŭ Adulam, rlet ma Y-Đavit dôl phung tahan Philistin gŭ njơh ƀư pôih tahan tâm rlŭng Rêphaim.

¹⁶ Rnôk nây Y-Đavit gŭ tâm pôih jêh ri pôih tahan phung Philistin gŭ ta ƀon Ƀêtlêhem.

¹⁷ Y-Đavit ŭch ngăn jêh ri lah: “Ndă ma geh bunuyh ăn gâp dak nhêt tă bơh ntu dak êp kêng mpông ƀon Ƀêtlêhem!”

¹⁸ Pe nuyh nây lăp rgăn pôih tahan phung Philistin, bâk dak tâm ntu dak êp kêng mpông ƀon Ƀêtlêhem djôt leo ma Y-Đavit. Ƀiălah Y-Đavit mâu ŭch nhêt ôh; ƀiălah păng nkhŭt dak nây tanăp măt Brah Yêhôva,

¹⁹ jêh ri lah: “Dăn Brah Ndu mât mray gâp gay gâp mâu ƀư nau aơ! Gâp mra nhêt lĕ mham nau rêh phung tahan aơ? Yorlah khân păng sân săk jăn khân păng nơm gay djôt leo dak nây.” Yor ri, păng mâu ŭch nhêt dak nây. Nây jêng nau pe nuyh janh ktang hŏ ƀư jêh.

²⁰ Y-Abisai, oh Y-Jôap, jêng kôranh ma phung pe tahan janh ktang; păng rjăng tak păng nkhĭt pe rhiăng nuyh, pôri păng geh nau lư n'găr tâm phung pe nuyh nây.

²¹ Tâm phung pe tahan janh ktang, păng geh lư n'găr lơn jêh ri jêng kôranh chiă uănh toyh ma khân păng, ƀiălah mâu tâm ban ôh đah “Pe Nuyh” lor saơm nây.

²² Y-Bênaya, kon Y-Jêhôida gŭ ta ƀon Kapsêel, jêng du huê janh ktang ƀư jêh âk kan toyh. Păng nkhĭt bar hê tahan janh ktang bunuyh Môap. Păng tâm ban đŏng hăn trŭnh jêh ri dong nkhĭt du mlâm yau mŭr tâm trôm ntu ta nar geh tŭp dak pler.

²³ Păng dong nkhĭt du huê bunuyh Êjipt, prêh bar met n'gul; bunuyh Êjipt nây djôt tâm ti păng du n'gâr tak toyh nâm bu mâng mpeh tanh, ƀiălah Y-Bênaya hăn trŭnh chuă vơt ma du mlâm mâng jra. Păng pit tak tă bơh ti bu klâu Êjipt, jêh ri nkhĭt păng ma tak păng nơm.

²⁴ Nĕ jêng lĕ nau kan Y-Bênaya, kon Y-Jêhôida, ƀư jêh; păng geh nau lư n'găr tâm rđĭl đah pe nuyh tahan janh ktang.

²⁵ Tâm phung pe jât nuyh tahan janh ktang, Y-Bênaya geh nau lư n'găr rlau lơn ƀiălah păng mâu tâm ban ôh đah phung pe nuyh lor saơm nây. Y-Đavit dơm păng chiă uănh phung tahan gak hađăch.

²⁶ Pakơi aơ jêng phung tahan janh ktang êng tâm phung tahan: Y-Asahel oh Y-Jôap; Y-Êlhanan, kon Y-Dôdô ta Ƀêtlêhem;

²⁷ Y-Samôt, bunuyh Harôt; Y-Hêles, bunuyh Pêlôn;

²⁸ Y-Ira, kon Y-Ikês ta Têkôa; Y-Abiêser ta Anathôt;

²⁹ Y-Sibêkai ta Husa; Y-Itai ta Ahôhit;

³⁰ Y-Maharai bơh Nêtôphat; Y-Hêles, kon Y-Bana ta Nêtôphat;

³¹ Y-Itai, kon Y-Ribai ta Gibêa, jêng ƀon phung kon sau Benjamin; Y-Bênaya ta Pirathôn;

³² Y-Hurai ta dak n'hor Gas; Y-Abiêl ta Arba;

³³ Y-Asmavet ta Bahurim; Y-Êliahba ta Salbôn;

³⁴ Y-Hasem ta Gisô; Y-Jônathan, kon Y-Sagê ta Hararit;

³⁵ Y-Ahiam, kon Y-Sakar ta Hararit; Y-Êliphal, kon Y-Ur;

³⁶ Y-Hêpher ta Mêkêra; Y-Ahija ta Pêlôn;

³⁷ Y-Hêsrô bơh yôk Karmel; Y-Naarai, kon Y-Êsbai;

³⁸ Y-Yôel oh Y-Nathan; Y-Miphar, kon Y-Hagri;

³⁹ Y-Sêlek jêng bunuyh Ammôn; Y-Naharai ta Bêrôt, jêng nơm djôt ndơ tâm lơh ma Y-Jôap, jêng kon H'Sêruya;

⁴⁰ Y-Ira ta Ithrit; Y-Garep ta Ithrit;

⁴¹ Y-Uri bunuyh Hitit; Y-Saƀat, kon Y-Ahlai;

⁴² Y-Adina, kon Y-Sisa, bunuyh Ruben, du huê kôranh chiă uănh tâm phung Ruben, chiă uănh pe jât nuyh;

⁴³ Y-Hanan, kon Y-Maka; Y-Jôsaphat ta Mêthen;

⁴⁴ Y-Usia ta Astarôt; Y-Sama jêh ri Y-Jêiêl, phung kon Y-Hôtham ta Arôer;

⁴⁵ Y-Jêdiaêl, kon Y-Simri, jêh ri Y-Jôha oh păng, bunuyh Tisit;

⁴⁶ Y-Êliêl ta Mahavit; Y-Jêribai jêh ri Y-Jêsavia, phung kon Y-Êlnam; Y-Itma jêng bunuyh Môap;

⁴⁷ Y-Êliêl, Y-Ôbet, jêh ri Y-Jasiêl, jêng bunuyh Mêsôba.