I Nau Rêh Jêng 10 - Nau Brah Ndu Ngơi 2023

Nau rêh jêng hađăch Đavit ( 10:1 – 29:30 ) Nau Y-Saul jêh ri phung kon păng khĭt

¹ Rnôk nây, phung Philistin tâm lơh đah phung Israel. Phung Israel nchuăt du panăp phung Philistin; khân păng cha lôt khĭt ta klơ yôk Gilbôa.

² Phung Philistin tĭng ban hađăch Sôl jêh ri phung kon bu klâu păng. Phung Philistin nkhĭt phung kon bu klâu Y-Sôl jêng Y-Jônathan, Y-Abinadap, jêh ri Y-Malki-Sua.

³ Nau tâm lơh jêng ktang ngăn ma Y-Sôl. Tơlah gĭt năl Y-Sôl, phung tahan djôt na pănh ƀư ma hađăch geh nau sôt rmanh.

⁴ Y-Sôl lah ma nơm djôt ndơ tâm lơh păng pô aơ: “Tŏk hom đao may jêh ri ntâp gâp, klach lah phung mâu koh ntâu aơ văch tât jêh ri ƀư bêk prêng gâp.” Ƀiălah nơm djôt ndơ tâm lơh păng mâu nănh ƀư ôh, yorlah klach ngăn. Yor ri, Y-Sôl sŏk đao jêh ri kŭnh tom tra ntang ntơh sân đah đao nây.

⁵ Tơlah nơm djôt ndơ tâm lơh saơ Y-Sôl khĭt jêh, păng tâm ban đŏng tom săk păng nơm ma đah đao jêh ri khĭt.

⁶ Pônây Y-Sôl nđâp ma pe nuyh kon bu klâu păng jêh ri lĕ rngôch ngih păng khĭt ndrel păng da dê.

⁷ Tơlah phung Israel gŭ tâm rlŭng saơ phung tahan du jêh ri saơ Y-Sôl ndrel phung kon bu klâu păng khĭt jêh, pôri khân păng chalơi ƀon jêh ri nchuăt du. Phung Philistin văch tât pit sŏk jêh ri gŭ tâm ƀon nây.

⁸ Nar ôi taơ, tơlah phung Philistin tât ŭch pit sŏk ndô ndơ bơh phung khĭt tâm nau tâm lơh, khân păng saơ Y-Sôl jêh ri phung kon bu klâu păng cha lôt khĭt jêh ta klơ yôk Gilbôa.

⁹ Khân păng pit sŏk lĕ ndô ndơ Y-Sôl, koh trô ko jêh ri sŏk ndơ tâm lơh hađăch, jêh nây prơh phung hăn lam bri Philistin mbơh nau răm maak ma phung rup brah jêh ri phung ƀon lan khân păng.

¹⁰ Khân păng dơm ndơ tâm lơh Y-Sôl tâm ngih phung brah khân păng, jêh ri yông bôk hađăch tâm ngih brah Dagôn.

¹¹ Tơlah phung ƀon lan gŭ ta ƀon Jabes-Gilêat tăng lĕ nau phung Philistin ƀư jêh ma Y-Sôl

¹² lĕ rngôch phung tahan janh ktang dâk hăn trong, sŏk săk jăn hađăch Sôl jêh ri săk jăn phung kon bu klâu păng djôt leo sĭt ta Jabes. Khân păng tâp brôi lĕ săk jăn nây tâm dâng tơm n'ho ta Jabes, jêh ri ver sa tâm pơh nar.

¹³ Pôri, hađăch Sôl khĭt jêh yor păng mâu gŭ răp jăp đah Brah Yêhôva, mâu djôt prăp ôh nau Păng ntăm. Rlau ma nây, păng ôp ma phung ngơi ndrel đah brah mhĭk,

¹⁴ mâu joi ôh nau nchră bơh Brah Yêhôva. Yor nây, Păng ƀư ăn ma hađăch khĭt, jêh ri jao ƀon bri hađăch păng ma Y-Đavit, kon Y-Yêsê.