I Kôrintô 9 - Nau Brah Ndu Ngơi 2023

Nau di ma phung kôranh oh mon

¹ Gâp mâu dơi jêng kon me hĕ? Gâp mâu dơi jêng kôranh oh mon hĕ? Gâp mâu mâp saơ Brah Yêsu, Kôranh Brah he hĕ? Mâm khân may mâu di jêng play khlay ma gâp tâm Kôranh Brah?

² Tơlah gâp mâu jêng kôranh oh mon ma phung êng, nđâp lah gâp ăt jêng kôranh oh mon ma khân may; yorlah khân may jêng nau mbên ma nau pah kan kôranh oh mon ma gâp tâm Kôranh Brah.

³ Aơ ngăn jêng nau gâp king gay ma tâm rdâng tay đah phung bunuyh phong gâp.

⁴ Hên mâu geh nau dơi sa mâu lah nhêt hĕ?

⁵ Di lĕ hên mâu geh nau dơi djôt leo du huê ur chroh ma Kôranh Brah tâm lĕ nau hăn aơ, tâm ban ma phung kôranh oh mon êng, tâm ban đŏng phung oh Kôranh Brah jêh ri Y-Sêphas?

⁶ Mâu lah knŏng gâp jêh ri Y-Ƀarnaƀas dơm mâu geh nau dơi lơi kan gay ma tĭng joi nau rêh?

⁷ Geh đŏng nơm sŏk prăk vâl păng nơm gay ma hăn tâm lơh đah phung rlăng? Geh đŏng nơm tăm đang krăk ƀâu ƀiălah mâu sa play păng? Mâu lah mbu nơm mât phung mpô mpa rong, ƀiălah mâu dŏng dak toh păng?

⁸ Gâp ngơi pô aơ, tĭng nau bunuyh ta neh ntu lĕ? Mâu di hĕ nau vay lah tâm ban pônây?

⁹ Yorlah nau vay Y-Môis geh nau nchih jêh: “Lơi put mbung ndrôk dôl jot ba.” Di lĕ Brah Ndu mĭn rvê ma ndrôk?

¹⁰ Mâu lah Păng ngơi nau nây yor ma he? Di ngăn jêng yor he yơh geh nau ngơi pônây; yor nơm chuar mir, ăn chuar ma nau kâp gân, mbu nơm mprah ba, mra mprah ba ma nau kâp gân geh nau pă.

¹¹ Tơlah hên srih jêh lĕ nau brah ta nklang phung khân may, pôri nau rek drăp ndơ tă bơh khân may jêng nau toyh ir lĕ ƀơh?

¹² Tơlah phung êng hôm geh nau dơi nây ta khân may, sa ang ma hên? Nđâp lah pônây, hên mâu dŏng nau dơi nây; ƀiălah hên srôih dơn ma lĕ rngôch ndơ, gay ma mâu king ma Nau Mhe Mhan Ueh Brah Krist.

¹³ Khân may mâu gĭt hĕ mbu nơm rvê pah kan tâm ngih brah mra sa ndơ nhhơr tâm ngih brah, bi mbu nơm rvê pah kan ta nơng ƀư brah geh ndơ bơh nơng ƀư brah nây lĕ ƀơh?

¹⁴ Tâm ban lĕ, Kôranh Brah ntăm jêh ma mbu nơm mbơh nkoch Nau Mhe Mhan Ueh mra dơi siăm rêh tă bơh Nau Mhe Mhan Ueh.

Lĕ nau Y-Pôl chalơi

¹⁵ Ƀiălah gâp mâu dŏng nau dơi nây ôh, mâu đŏng nchih samƀŭt nây gay ma dăn nau dơi nây; ueh lơn gâp khĭt đah ăn bu pit sŏk nau tâm rnê nây bơh gâp.

¹⁶ Tơlah gâp mbơh nkoch Nau Mhe Mhan Ueh, gâp mâu geh nau gay ma tâm rnê êng, yorlah gâp geh nau nchâp gay ƀư tâm ban pônây; ƀiălah, tơlah gâp mâu mbơh nkoch Nau Mhe Mhan Ueh, nau rêh ni ngăn ma gâp.

¹⁷ Tơlah gâp nđơr êng pah kan nau aơ gâp geh nau nkhôm; tơlah mâu nđơr, nau pah kan nây ăt jao đŏng ma gâp.

¹⁸ Pôri, moh jêng nau nkhôm ma gâp? Nây jêng nôk mbơh nkoch Nau Mhe Mhan Ueh, gâp mbơh nkoch mâu geh kơp rnoh, mâu dăn nau ăn ma bunuyh mbơh nkoch Nau Mhe Mhan Ueh.

¹⁹ Nđâp tơlah đah lĕ rngôch bunuyh, gâp jêng bunuyh kon me, ƀiălah gâp plơ̆ jêng dĭk ma lĕ rngôch gay ma dơi njŭn leo âk bunuyh tay.

²⁰ Đah phung Yuđa, gâp plơ̆ jêng tâm ban ma du huê Yuđa gay ma njŭn leo phung Yuđa. Đah phung gŭ tâm dâng nau vay — nđâp tơlah gâp mâu gŭ tâm dâng nau vay — gâp plơ̆ jêng tâm ban du huê bunuyh gŭ tâm dâng nau vay gay ma dơi njŭn leo phung gŭ tâm dâng nau vay.

²¹ Đah phung mâu geh nau vay — nđâp tơlah đah Brah Ndu, gâp mâu di gâp mâu geh nau vay, yorlah gâp gŭ tâm dâng nau vay Brah Krist — gâp plơ̆ jêng tâm ban mâu geh nau vay gay ma dơi njŭn leo phung mâu geh nau vay.

²² Gâp jêng rdja ndrel ma phung rdja, pôri mơ gâp dơi njŭn leo phung rdja. Gâp jêng jêh lĕ rngôch ndơ ma lĕ rngôch bunuyh, pôri mơ gâp dơi tâm rklaih ƀaƀă tâm phung khân păng.

²³ Gâp ƀư lĕ rngôch ndơ yor Nau Mhe Mhan Ueh gay tâm pă ndrel nau ueh maak tă bơh Nau Mhe Mhan Ueh.

²⁴ Khân may mâu gĭt hĕ tâm nau nchuăt tâm rlong ta ntŭk pâl, lĕ rngôch nchuăt da dê, ƀiălah knŏng du huê geh nau nkhôm? Pôri, nchuăt hom gay ma khân may pit sŏk nau nkhôm.

²⁵ Lĕ rngôch đơ phung pâl tâm rlong ver ăp ntil ndơ, jêh ri khân păng ƀư nau nây gay geh đon hađăch hôm blau ôm rai ôh. Ƀiălah he ƀư nau nây ŭch geh đon hađăch mâu blau rai lôch ôh.

²⁶ Pônây yơh, gâp nchuăt, mâu di nchuăt lă lêng; gâp dong, mâu di dong tâm sial ôh.

²⁷ Ƀiălah gâp nsrôih nsram đăp ma săk jăn gâp tâm nau dăng ngăn, nchâp păng ăn tông, klach lah jêh gâp nti lah ma bunuyh êng, ƀiălah Brah Ndu mƀăr lơi gâp nơm.