I Kôrintô 8 - Nau Brah Ndu Ngơi 2023

Ôp ndơ mbah brah

¹ Tât ma nau ndơ ƀư brah ma rup brah, he gĭt pô aơ “lĕ rngôch he geh nau gĭt rbăng.” Ƀiălah nau gĭt rbăng luh nau sưr, ƀiălah nau rŏng ri mơ ndâk njêng.

² Tơlah mbu nơm mĭn păng nơm ntôn lah gĭt lĕ nau, pôri nanê̆ bunuyh nây ê hŏ ngăn rah vah ôh.

³ Ƀiălah tơlah mbu nơm rŏng ma Brah Ndu, Brah Ndu gĭt năl jêh nơm nây.

⁴ Pôri, ma nau nhhơr ndơ ƀư brah ma rup brah, he gĭt rup brah tâm neh ntu mâu geh ngăn ôh, knŏng geh nguay Brah Ndu mâu geh brah êng ôh.

⁵ Nđâp tơlah bu lah geh brah ta klơ trôk, mâu lah tâm neh ntu — khân păng chroh geh âk “brah” jêh ri âk “kôranh brah” —

⁶ ƀiălah ma phung he, knŏng geh du huê Brah Ndu jêng Mbơ̆, Nơm rhăk njêng lĕ rngôch ndơ, jêh ri he rêh yor ma Păng; geh đŏng knŏng du huê Kôranh Brah jêng Brah Yêsu Krist, lĕ rngôch ndơ geh yor tă bơh Păng, phung he gŭ rêh yor ma tă bơh Păng đŏng.

⁷ Ƀiălah mâu di lĕ rngôch ôh geh nau gĭt rbăng aơ. Ƀaƀă bunuyh mơng bên ir ma rup brah, yor ri tơlah sa ndơ ƀư brah nây, ri mơ uănh nâm bu hŏ nhhơr jêh ma rup brah, jêh ri nuih n'hâm sŏng khân păng rdja geh nau ƀơ̆ ƀơch.

⁸ Ndơ sông sa mâu ƀư ma he dăch lơn đah Brah Ndu ôh; tơlah mâu sa mâu đŏng mhĭk, bi lah sa mâu đŏng ueh lơn.

⁹ Ƀiălah njrăng hom, klach lah nau dơi kon me khân may ƀư ma phung rdja chêh prah.

¹⁰ Tơlah du huê geh nuih n'hâm sŏng rdja saơ may, jêng nơm geh nau gĭt rbăng, gŭ sa ndơ tâm jây rhŏ rup brah, mâu di hĕ bunuyh nây nsônh bu sa ndơ ƀư brah ma rup brah?

¹¹ Pôri nau may gĭt rbăng ƀư rai yot bunuyh rdja nây, jêng phung Brah Krist khĭt ntrok an jêh.

¹² Dôl ƀư tih pônây đah phung oh nâu khân may jêh ri ƀư sôt nuih n'hâm rdja khân păng, khân may ƀư tih đah Brah Krist yơh.

¹³ Yor nây, tơlah ndơ sông sa ƀư ma nau chêh prah ma oh nâu, gâp mâu mra sa puăch ôh, gay ma mâu ƀư ma nau chêh prah ma oh nâu gâp.