I Kôrintô 7 - Nau Brah Ndu Ngơi 2023

III. Plơ̆ lah ma lĕ nau phung Kôrintô ôp ( 7:1 – 11:1 ) Nau tâm gŭ ur sai

¹ Ma lĕ nau khân may nchih jêh tâm samƀŭt nâm bu “bu klâu mâu sŏk ur jêng ueh lơn.”

² Ƀiălah gay ma der tâm nau văng tĭr, ăn ăp nơm bu klâu geh ur, ăn ăp nơm bu ur geh sai.

³ Sai ƀư ăn nŭm nau kan đah ur păng, jêh ri ur ƀư tâm ban pônây lĕ đah sai păng.

⁴ Ur mâu geh nau dơi ma săk jăn păng nơm, ƀiălah jêng sai păng; sai mâu đŏng geh nau dơi ma săk jăn păng nơm, ƀiălah jêng ur păng.

⁵ Lơi tâm dun ndrăng khân ay may ôh, knŏng tơlah lĕ bar ding du ai ƀât lât, prăp êng mông nar ma nau mbơh sơm, ƀiălah pakơi nây plơ̆ gŭ ndrel, klach lah Satan ndơm khân ay may tâm nôk khân ay may mâu dơi ât.

⁶ Gâp ngơi nau aơ jêng nau tâm lơp, mâu di jêng nau ntăm ôh.

⁷ Gâp ŭch ma lĕ rngôch bunuyh jêng nâm bu gâp. Ƀiălah ăp nơm geh nau Brah Ndu ăn nau dơi êng êng; bunuyh geh nau dơi aơ, nơm ri geh nau dơi êng.

⁸ Gâp lah ma phung bunuyh hôm săk rlung jêh ri ma phung bu ur ndrô pô aơ, tơlah gŭ nâm bu gâp jêng ueh ngăn.

⁹ Ƀiălah tơlah khân păng mâu dơi ât, ăn sŏk ur sŏk sai, yorlah nau sŏk ur sŏk sai ueh lơn ma nau kơnh nglay săk su.

¹⁰ Ma phung bunuyh geh ur geh sai, mâu di gâp ƀiălah jêng Kôranh Brah, ntrŭnh nau ntăm: Ur mâu dơi chalơi sai,

¹¹ (ƀiălah tơlah păng chalơi sai, ăn păng gŭ săk rlung, mâu lah ƀư đăp mpăn đah sai ơm). Sai mâu dơi đŏng chalơi ur păng ôh.

¹² Bi ma phung êng gâp yơh ngơi, mâu di jêng Kôranh Brah, lah pô aơ: Tơlah du huê oh nâu geh ur mâu chroh ma Kôranh Brah, ƀiălah ur nây ŭch gŭ rêh ndrel ma sai păng, pôri sai nây mâu dơi chalơi ur păng ôh.

¹³ Tơlah du huê bu ur geh sai mâu chroh ma Kôranh Brah, ƀiălah sai nây ŭch gŭ rêh ndrel ma ur păng, pôri ur nây mâu dơi chalơi sai păng ôh.

¹⁴ Yorlah sai mâu chroh ma Kôranh Brah mra geh nau kloh ueh yor ma ur păng; bi ur mâu chroh ma Kôranh Brah mra geh nau kloh ueh yor ma sai păng. Tơlah mâu, phung kon khân may mra ƀơ̆ ƀơch, ƀiălah aƀaơ aơ khân păng geh nau ƀư kloh ueh da dê.

¹⁵ Tơlah nơm mâu chroh ma Kôranh Brah ŭch tâm nkhah, ăn khân păng tâm nkhah hom. Tâm nau pônây, oh nâu mâu lah oh ruh mâu geh nau tâm krêp ôh. Yorlah Brah Ndu kuăl jêh he ăn gŭ rêh tâm nau đăp mpăn.

¹⁶ Hơi bunuyh ƀư ur, gĭt lah ay dơi rklaih sai ay nơm? Hơi bunuyh ƀư sai, gĭt lah may dơi rklaih ur may nơm?

Rêh tĭng nâm nau Kôranh Brah kuăl

¹⁷ Ăn ăp nơm gŭ rêh tĭng nâm nau yô̆ Kôranh Brah ăn, jêh ri tĭng nâm nau kuăl bơh Brah Ndu. Aơ jêng nau gâp nti jêh tâm lĕ rngôch Phung Ngih Brah Ndu.

¹⁸ Geh đŏng nơm lĕ koh ntâu bu kuăl? Lơi chalơi nau koh ntâu. Geh đŏng nơm mâu koh ntâu bu kuăl? Lơi joi nau koh ntâu.

¹⁹ Nau koh ntâu mâu lah mâu geh koh ntâu mâu geh nau khlay ôh; nau khlay jêng djôt prăp lĕ nau vay ntăm bơh Brah Ndu.

²⁰ Mbu nơm geh nau bu kuăl dôl gŭ pah kan ăn păng gŭ ta nĕ hŏ.

²¹ Khân may jêng dĭk tâm nôk khân may geh nau bu kuăl ƀơh? Lơi rvê; ƀiălah tơlah khân may dơi jêng kon me, ăn may sŏk hom mông găl.

²² Yorlah mbu moh geh Kôranh Brah kuăl dôl hôm ƀư dĭk, pôri păng plơ̆ jêng kon me tâm Kôranh Brah. Tâm ban lĕ, nơm kon me tâm nôk bu kuăl, pôri păng plơ̆ jêng dĭk ma Brah Krist.

²³ Bu rvăt jêh khân may ma rnoh dŭt prêh; lơi plơ̆ jêng dĭk ma kon bunuyh.

²⁴ Hơi phung oh nâu, nôk bu kuăl khân may ta ntŭk khân may gŭ, ăn gŭ hom tâm ntŭk nây tanăp Brah Ndu.

Nau săk rlung

²⁵ Bi ma phung bu ur druh, gâp mâu geh nau ntăm tă bơh Kôranh Brah; ƀiălah yor ma nau Kôranh Brah yô̆ nđach, gâp lah nau mĭn gâp nơm tâm ban ma du huê nuyh geh nau khư rnơm nsing.

²⁶ Yorlah lĕ nau jêr tâm aƀaơ aơ, gâp mĭn, tơlah du huê bunuyh ăt gŭ kơt ơm jêng ueh lơn.

²⁷ Di lĕ may geh tâm krêp đah ur may? Lơi joi nau klaih ôh. Di lĕ may ê hŏ geh nau tâm krêp đah ur? Lơi joi ur.

²⁸ Ƀiălah tơlah may sŏk ur, may mâu ƀư tih ôh; tơlah du huê bu ur druh sŏk sai, păng mâu ƀư tih ôh. Ƀiălah phung bunuyh geh ur sai mra tâm mâp âk nau jêr tâm rnôk aơ; gâp ŭch khân may der bơh nau nây.

²⁹ Hơi phung oh nâu, gâp ŭch lah pô aơ: Mông nar gleh ir; ntơm bơh aƀaơ, phung geh ur, gŭ rêh hom tâm ban ma mâu geh;

³⁰ phung bunuyh nhĭm nhhiăng, gŭ rêh tâm ban ma mâu mâp nhĭm nhhiăng; phung bunuyh răm maak, gŭ rêh hom tâm ban ma mâu răm maak; phung bunuyh rvăt ndơ, gŭ rêh hom tâm ban ma mâu geh;

³¹ phung bunuyh dôl tâm krêp đah neh ntu aơ, gŭ rêh hom tâm ban ma mâu tâm krêp ôh, yorlah rup neh ntu aơ mra rlau lôch.

³² Gâp ŭch khân may mâu mĭn rvê. Bunuyh mâu sŏk ur, păng rvê nau kan ma Kôranh Brah, joi nau ƀư maak nuih n'hâm ma Kôranh Brah.

³³ Ƀiălah bunuyh geh ur, păng rvê ma ndơ neh ntu, joi nau ƀư maak nuih n'hâm ma ur păng,

³⁴ jêh ri khân păng geh nau pă tâm nau mĭn. Bu ur mâu sŏk sai, mâu lah bu ur druh rvê ma nau kan Kôranh Brah, joi ăn săk jăn jêh ri nuih n'hâm geh nau kloh ueh; ƀiălah bu ur geh sai, păng rvê ma ndơ neh ntu, joi nau ƀư maak nuih n'hâm ma sai păng.

³⁵ Gâp lah nau nây yor ma nau khlay ma khân may, mâu di gay ma nchâp khân may ôh, ƀiălah ŭch njŭn leo khân may ma nau tâm di jêh ri mâu geh tâm pă tâm nau pah kan ma Kôranh Brah.

³⁶ Tơlah geh nơm mĭn păng nơm mâu dơi gŭ ngao ueh đah ur păng ê hŏ nđăp, tơlah nau ŭch tâm mâp nglay săk ktang, jêh ri ŭch tâm nđăp, pôri ƀư hom tĭng nau păng nơm ŭch. Nau nây mâu geh nau tih.

³⁷ Ƀiălah tơlah mbu nơm nâp tâm nuih n'hâm, mâu geh nau tâm khan, gĭt nkân nau păng nơm ŭch, jêh ri tâm nal tâm nuih n'hâm păng ăt uănh bu ur nây tâm ban ur ê hŏ nđăp, pôri păng ƀư du ntil nau ueh.

³⁸ Pônây lĕ, mbu nơm tâm nđăp đah ndrôi păng nơm jêng ƀư nau ueh; ƀiălah mbu nơm mâu hăn tât tâm nau gŭ ur sai jêng ƀư nau ueh lơn đŏng.

³⁹ Ăn ur tâm krêp đah sai păng dôl păng hôm gŭ rêh. Tơlah sai păng khĭt, bu ur geh nau dah ŭch săch, sŏk sai êng tĭng nâm păng ŭch, iăt ma tâm Kôranh Brah.

⁴⁰ Ƀiălah tĭng nâm gâp mĭn, tơlah ăt gŭ kơt nĕ geh nau ueh maak lơn. Gâp mĭn pô aơ, gâp geh đŏng Brah Huêng Ueh Brah Ndu.