I Kôrintô 6 - Nau Brah Ndu Ngơi 2023

Nau phong dôih tanăp phung bu năch

¹ Tơlah tâm phung khân may geh bunuyh aơ tâm rlăch đah bunuyh ri, mâm ƀư khân may mâu djôt leo văch tanăp phung kloh ueh, ƀiălah mâm ƀư lŏ ăn phung mâu sŏng srăng phat dôih?

² Khân may mâu gĭt hĕ phung kloh ueh yơh mra phat dôih neh ntu? Tơlah khân may mra phat dôih neh ntu, mâm ƀư khân may mâu dơi phat lĕ nau jê̆ lê̆?

³ Khân may mâu gĭt he yơh mra phat dôih phung tông mpăr? Sa ang ma lĕ nau kan tâm nau rêh aơ!

⁴ Lŏng aƀaơ ri, mâm ƀư geh nau vay tâm nau rêh aơ, khân may lŏ njŭn leo ma phung bu mâu yơk tâm Phung Ngih Brah Ndu gay ma phat dôih?

⁵ Gâp lah pônây gay ma khân may bêk prêng! Mâm ƀư tâm phung khân may mâu geh du huê tŏng nau blau mĭn gay ma phat dôih ndrăng oh nâu khân may nơm?

⁶ Ƀiălah khân may phong dôih ndrăng khân may, jêh nây djôt leo văch tanăp phung mâu chroh!

⁷ N'hêl nanê̆ ngăn, knŏng nau phong dôih ndrăng khân may jêng du nau rai yot jêh. Ueh lơn khân may nau bu ƀư kue ƀơh? Ueh lơn khân may dơn nau bu mplư ndơm ƀơh?

⁸ Ƀiălah khân may yơh ƀư mâu sŏng, ndơm jêh ri gŭ ngao mâu ueh đah ma oh nâu khân may nơm.

⁹ Khân may mâu gĭt hĕ phung mâu sŏng srăng mâu mra dơn ƀon bri hađăch Brah Ndu ôh?

¹⁰ Lơi ta ndơm mƀruh khân may nơm. Phung văng tĭr, phung mbah rup brah, phung tâm lâm, bu klâu ndrăng bu klâu jêh ri bu ur ndrăng bu ur, phung ntŭng, phung kơnh rlau ir, phung nhŭl ndrănh, phung dăng suai rak, phung ntŭng, mâu mra dơi dơn ƀon bri hađăch Brah Ndu ôh.

¹¹ Nôk alor tâm khân may geh ƀaƀă bunuyh tâm ban pônây. Ƀiălah tâm amoh Kôranh Brah jêng Brah Yêsu Krist jêh ri tâm Brah Huêng Ueh Brah Ndu he, khân may geh nau ƀư kloh, nau ƀư kloh ueh jêh ri dơi kơp sŏng srăng.

Nkah der nau ƀơ̆ ƀơch

¹² Gâp dơi vay ƀư lĕ ntil ndơ, ƀiălah mâu di lĕ ntil ndơ geh khlay ôh. Gâp dơi vay ƀư lĕ ntil ndơ, ƀiălah mâu ƀư dĭk ma du ntil ndơ ôh.

¹³ “Ndơ sông sa yor ma ndŭl jêh ri ndŭl yor ma ndơ sông sa,” Brah Ndu mra ƀư rai nau nây nđâp ma nau ri. Săk jăn mâu yor ma nau văng tĭr ôh, ƀiălah yor ma Kôranh Brah, jêh ri Kôranh Brah yor ma săk jăn.

¹⁴ Brah Ndu hŏ ƀư ăn Kôranh Brah dâk rêh tay, mra ƀư ăn he dâk rêh tay đŏng ma nau brah Păng.

¹⁵ Khân may mâu gĭt hĕ săk jăn khân may jêng kô̆ tâm săk jăn Brah Krist? Lah ndri, gâp dơi lĕ sŏk săk jăn Brah Krist ƀư jêng săk jăn du huê bu ur văng tĭr ƀơh? Mâu geh ôh!

¹⁶ Khân may mâu gĭt hĕ, mbu nơm tâm rnglăp đah bu ur văng tĭr mra plơ̆ jêng du nglay săk jêh đah păng? Yorlah geh nau nchih: “Bar hê khân păng mra plơ̆ jêng du nglay săk”.

¹⁷ Ƀiălah mbu nơm tâm rnglăp đah Kôranh Brah mra plơ̆ jêng du nuih n'hâm ndrel ma Păng.

¹⁸ Der hom nau văng tĭr. Lĕ rngôch nau tih bu ƀư tih jêng padih săk jăn, ƀiălah nơm ƀư nau văng tĭr jêng ƀư tih ma săk jăn păng nơm.

¹⁹ Khân may mâu gĭt hĕ săk jăn khân may jêng ngih brah Brah Huêng Ueh dôl gŭ jêh tâm khân may. Di lĕ Nơm Brah Ndu hŏ ăn ma khân may? Khân may mâu hôm jêng ndơ khân may nơm ôh,

²⁰ yorlah Brah Ndu hŏ rvăt jêh khân may ma rnoh dŭt khlay. Pôri, sŏk hom săk jăn khân may gay tâm rnê Brah Ndu.