I Kôrintô 5 - Nau Brah Ndu Ngơi 2023

Leo trong mhĭk ta ƀon Kôrintô

¹ Geh nau bu nkoch tâm phung khân may geh nau văng tĭr, nau văng tĭr tâm ban pônây bu mâu saơ ôh tâm phung bu năch; yorlah geh nơm hŏ bê̆ch ndrel đah ur yông mbơ̆ păng!

² Jêh ri khân may bêng ma nau sưr! Ueh lơn khân may nhĭm nhhiăng jêh ri nsot lơi nơm ƀư nau nây luh bơh khân may.

³ Yorlah gâp, săk jăn ngai, ƀiălah nuih n'hâm gâp gŭ ndrel ma khân may ta nây. Gâp rmal jêh nơm ƀư nau nây, tâm ban ma gâp geh măt ta nây.

⁴ Nôk khân may tâm rgum, nuih n'hâm gâp geh đŏng ndrel ma nau brah Kôranh Brah he jêng Brah Yêsu; tâm amoh Kôranh Brah jêng Brah Yêsu,

⁵ he jao bunuyh ƀư pônây ma brah Satan ƀư rai nglay săk păng, gay ma huêng păng dơi tâm rklaih tâm nar Kôranh Brah.

⁶ Nau khân may sưr rlau mâu geh nau ueh ôh. Khân may mâu gĭt hĕ ndrui djê̆ lê̆ dơi ƀư ră mbŭch rnih?

⁷ Ƀư kloh lơi hom ndrui ơm, gay ma khân may dơi plơ̆ jêng mbŭch rnih mhe mâu geh ndrui ôh, tâm ban ma khân may n'hêl nanê̆ ngăn jêng piăng let mâu geh ndrui. Yorlah Brah Krist, Kon Biăp rƀŭn Nau Găn he, hŏ nhhơr jêng mpa ƀư brah jêh.

⁸ Pôri, ăn he kah gĭt ndray rƀŭn Nau Găn, lơi dŏng ndrui ơm ôh, jêng ndrui nau djơh mhĭk jêh ri ƀai, ƀiălah ma piăng let mâu geh ndrui nau răp jăp jêh ri nau ngăn.

⁹ Tâm samƀŭt nchih njuăl ma khân may, gâp hŏ ntĭnh ntăm ma khân may lơi tâm rnglăp đah phung văng tĭr ôh.

¹⁰ Gâp mâu geh ŭch ngơi ma phung văng tĭr tâm neh ntu aơ, mâu lah phung kơnh rlau ir jêh ri phung ntŭng, mâu lah phung mbah rup brah, yorlah tơlah pônây ăn khân may du tă bơh neh ntu.

¹¹ Ƀiălah nau gâp nchih ma khân may lơi tâm rnglăp ôh ma mbu nơm kơp êng păng nơm jêng oh nâu, ƀiălah păng jêng bunuyh văng tĭr, mâu lah kơnh rlau ir, mâu lah mbah rup brah, mâu lah suai rak, mâu lah nhŭl ndrănh, mâu lah ntŭng, mâu dơi sông sa ndrel ma bunuyh nâm nđĕ.

¹² Moh nau khlay ma gâp phat dôih phung padih? Mâu di hĕ khân may mra phat dôih ma phung tâm trôm?

¹³ Brah Ndu mra phat dôih ma phung padih. “Ngluh lơi hom phung bunuyh djơh mhĭk luh bơh khân may.”