I Kôrintô 4 - Nau Brah Ndu Ngơi 2023

Knŏng Kôranh Brah jêng Nơm phat dôih

¹ Pôri, ăn lĕ rngôch bunuyh uănh ma hên nâm bu phung oh mon Brah Krist, phung mât uănh lĕ nau khlay ndâp bơh Brah Ndu.

² Nau bu ŭch ma phung mât uănh jêng geh nau khư rnơm nsing.

³ Bi ma gâp, nđâp tơlah khân may mâu lah ăp ntŭk ngih phat dôih kon bunuyh phat dôih, ăt mâu khlay ôh. Gâp mâu đŏng phat dôih gâp nơm.

⁴ Yorlah gâp mâu saơ tâm gâp nơm geh du nau tih, ƀiălah mâu di ma nau nây ôh gâp dơi kơp sŏng srăng. Nơm phat dôih gâp jêng Kôranh Brah yơh.

⁵ Pôri, lơi dĭng phat dôih gơnh ir, gŭ kâp hom Kôranh Brah plơ̆ văch; Păng mra mpơl ta ntŭk ang lĕ rngôch moh nau pôn jêh tâm ntŭk ngo, jêh ri mpơl lĕ nau ŭch tâm nuih n'hâm. Nôk nây, ăp nơm mra dơn nau tâm rnê tă bơh Brah Ndu.

Nau tâm rdâng ta nklang nau sưr rlau jêh ri nau dêh rhêt

⁶ Hơi phung oh nâu, yor nau khlay ma khân may, gâp hŏ dŏng lĕ nau nây ma gâp nơm jêh ri ma Y-Apôlôs, gay ma khân may nti tâm hên mâm nau rblang tâm trong: “Lơi rlau luh padih nau ngơi hŏ nchih,” gay ma mâu geh nơm luh nuih n'hâm sưr rlau, kơl an bunuyh aơ tâm rdâng đah bunuyh ri.

⁷ Yorlah mbu moh saơ khân may blau lơn ma bunuyh ƀaƀă? Moh ndơ khân may geh dĭng khân may mâu sŏk dơn? Tơlah khân may sŏk dơn jêh, mâm ƀư khân may hôm ngơi hưn nâm bu khân may ê hŏ sŏk dơn?

⁸ Khân may hơm tŏng jêh! Khân may ndrŏng ngăn jêh! Khân may ƀư hađăch jêh ri mâu ŭch hên. Ndă ma khân may ƀư hađăch gay ma hên dơi chiă uănh ndrel ma khân may!

⁹ Yorlah gâp mĭn pô aơ, Brah Ndu hŏ dơm phung kôranh oh mon hên tâm ntŭk dŭt dêh tâm dâng, nâm bu phung bu rmal nkhĭt, yorlah hên jêng nau gơm ma neh ntu, tông mpăr jêh ri kon bunuyh.

¹⁰ Hên jêng phung rluk yor ma Brah Krist, bi khân may geh nau blau mĭn tâm Brah Krist. Hên jêng rdja, bi khân may jêng ktang. Bu yơk ma khân may, bi hên bu mưch rmot.

¹¹ Tât ma aƀaơ aơ, hên hôm dơn nau ji ngot ji hir, nau hêk sat, nau dong mbang jêh ri nsong blêng ăp ntŭk.

¹² Hên pah kan jâk jêr ma ti hên nơm. Nôk bu suai rak, hên ăn nau ueh uĭn; nôk bu ƀư mhĭk, hên nsrôih dơn;

¹³ nôk bu ngơi mhĭk, hên plơ̆ lah ma nau ueh. N'ho ma tât aƀaơ, hên plơ̆ jêng nâm bu ndŏk tâm neh ntu, ndơ kon bunuyh mƀăr.

Tĭng trong mbơ̆ tâm nau rêh huêng

¹⁴ Gâp nchih nau nây mâu di gay ƀư ma khân may bêk prêng ôh, ƀiălah gay ma đă khân may nâm bu phung kon gâp rŏng ngăn ngên.

¹⁵ Nđâp tơlah khân may geh âk rmưn nuyh ntĭm nti tâm Brah Krist, ƀiălah khân may mâu geh âk mbơ̆ ôh; yorlah tă bơh Nau Mhe Mhan Ueh, gâp yơh deh khân may tâm Brah Yêsu Krist.

¹⁶ Pôri, gâp vơl dăn khân may: kơt hom gâp.

¹⁷ Yor ma nau nây, gâp njuăl jêh Y-Timôthê, kon gâp rŏng ngăn ngên jêh ri răp jăp tâm Kôranh Brah, păng hăn văch gay ma nkah tay ma khân may trong gâp tâm Brah Krist, nâm bu gâp ăt nti lah tâm Phung Ngih Brah Ndu tâm lam lĕ rngôch ntŭk.

¹⁸ Geh ƀaƀă bunuyh mbơh ma nau sưr, yorlah mĭn lah gâp mâu mra hăn ta khân may ôh.

¹⁹ Ƀiălah tơlah Kôranh Brah ŭch, mâu ir jŏ gâp mra văch ta khân may; nôk nây, gâp mra gĭt mâu di knŏng nau ngơi phung sưr nây, ƀiălah nau ktang khân păng đŏng.

²⁰ Yorlah ƀon bri hađăch Brah Ndu mâu knŏng tâm mpơl ma nau ngơi ôh, ƀiălah tâm nau brah.

²¹ Moh nau khân may ŭch? Ŭch gâp djôt mâng văch ta khân may, mâu lah văch ma nau rŏng jêh ri nuih n'hâm rdơ̆ rbăn?