I Kôrintô 3 - Nau Brah Ndu Ngơi 2023

Nau tâm nkhah mpôl

¹ Hơi phung oh nâu, mpeh ma gâp, gâp mâu dơi ngơi ma khân may tâm ban ma phung rêh huêng, ƀiălah tâm ban ma phung bunuyh nglay săk, nâm bu ma phung oh bê mhe deh tâm Brah Krist.

² Gâp siăm jêh khân may ma dak toh, mâu di ma ndơ sa dăng ôh, yorlah khân may ê hŏ dơi dơn ndơ nây ôh. Nđâp aƀaơ aơ khân may ê hŏ dơi dơn lĕ,

³ yorlah khân may ăt hôm jêng phung nglay săk. Yorlah tâm phung khân may hôm geh nau mâu nach, nau tâm jin; tâm ban pônây, mâu di hĕ khân may jêng phung nglay săk jêh ri gŭ ngao tâm ban ma bunuyh ta neh ntu hĕ?

⁴ Tơlah bunuyh aơ lah: “Gâp jêng bunuyh Y-Pôl,” bunuyh êng lah: “Gâp jêng bunuyh Y-Apôlôs,” tâm ban pônây, khân may mâu di hĕ jêng bunuyh ta neh ntu?

⁵ Lah ndrĭ, mbu nơm jêng Y-Apôlôs? Mbu nơm jêng Y-Pôl? Khân păng knŏng jêng phung oh mon, yor ma khân păng yơh khân may chroh jêh, tĭng nâm Kôranh Brah dăp jêh ma ăp nơm.

⁶ Gâp tăm jêh, Y-Apôlôs djrah dak jêh, ƀiălah Brah Ndu hŏ ƀư văch ma toyh jêh.

⁷ Pôri, bunuyh tăm jêh ri nơm djrah dak mâu ôh jêng khlay, ƀiălah knŏng geh Brah Ndu jêng Nơm ƀư văch ma toyh.

⁸ Nơm tăm jêh ri nơm djrah dak tâm ban da dê; ăp nơm mra sŏk dơn prăk nkhôm tĭng nâm kan păng nơm pah.

⁹ Yorlah hên jêng phung bunuyh pah kan ndrel ma Brah Ndu; khân may jêng mir lŏ Brah Ndu, jêng ngih Brah Ndu.

Brah Krist jêng mbon Ngih Brah Ndu

¹⁰ Tĭng nâm nau yô̆ Brah Ndu ăn jêh ma gâp, gâp n'gân mbon jêh tâm ban ma du huê bunuyh blau kan, bi bunuyh êng ndâk ngih ta klơ. Ƀiălah ăp nơm njrăng ma nau păng ndâk ta klơ mbon nây.

¹¹ Yorlah mâu geh bunuyh dơi n'gân du mbon êng, knŏng mbon bu n'gân jêh jêng Brah Yêsu Krist.

¹² Tơlah mbu nơm sŏk mah, prăk, lŭ khlay, ma tơm si, gơ̆ kro mâu lah rhe gay ma ndâk ta klơ mbon nây

¹³ ri mơ nau kan ndâk ăp nơm mra dơi tâm mpơl. Nar phat dôih mra ƀư rah vah nau kan ndâk nây; bu mra tâm mpơl păng tâm ŭnh, jêh ri ŭnh mra rlong uănh rnoh khlay nau kan ndâk ăp nơm.

¹⁴ Tơlah mbu nơm kan ndâk ta klơ mbon nây ăt hôm, păng mra sŏk dơn nau nkhôm.

¹⁵ Bi tơlah nau kan păng ndâk lĕ ŭnh su rai, păng mra roh nau nkhôm; mpeh ma păng nơm, mra dơi rklaih ƀiălah nâm bu luh tă bơh ŭnh.

Phung chroh jêng ngih brah ma Brah Ndu

¹⁶ Khân may mâu gĭt hĕ khân may jêng ngih ma Brah Ndu, jêh ri Brah Huêng Ueh Brah Ndu gŭ tâm khân may?

¹⁷ Tơlah du huê ƀư rai ngih brah Brah Ndu, Brah Ndu mra ƀư rai păng; yorlah ngih brah ma Brah Ndu jêng kloh ueh, jêh ri ngih brah nây jêng khân may nơm.

¹⁸ Lơi dĭng ndơm êng păng nơm. Tơlah mbu nơm tâm phung khân may mĭn păng nơm jêng nơm blau mĭn tâm rnôk aơ, ăn plơ̆ hom jêng rluk mâl gay ma geh nau blau mĭn.

¹⁹ Yorlah nau blau mĭn tâm rnôk aơ jêng nau brŭt ndrăng tanăp Brah Ndu. Tâm ban geh nchih pô aơ: “Kôranh Brah nhŭp phung blau mĭn Tâm nau plĕch rlăm khân păng.”

²⁰ Jêh ri: “Kôranh Brah gĭt năl lĕ nau mĭn phung blau mĭn Jêng mâu khlay ôh.”

²¹ Pôri, lơi ăn du huê ntưih ma kon bunuyh. Yorlah lĕ ntil ndơ jêng ndơ khân may da dê:

²² nđâp tơlah Y-Pôl, Y-Apôlôs mâu lah Y-Sêphas; nđâp tơlah neh ntu, nau rêh, mâu lah nau khĭt, aƀaơ aơ mâu lah tâm nar kăndơ̆; lĕ rngôch jêng ndơ khân may da dê,

²³ khân may jêng ndơ Brah Krist jêh ri Brah Krist jêng ndơ Brah Ndu.