I Kôrintô 2 - Nau Brah Ndu Ngơi 2023

Trong jêh ri nau Y-Pôl ŭch nti lah

¹ Hơi phung oh nâu, tơlah gâp văch ta khân may, gâp mâu sŏk lĕ nau ngơi dŭt blau mâu lah nau blau mĭn gay ma mbơh ma nau khlay ndâp Brah Ndu ma khân may ôh.

² Yorlah ta nklang khân may, gâp hŏ tâm nal mâu ŭch gĭt moh nau êng ôh knŏng Yêsu Krist, jêh ri Brah Yêsu Krist bu pâng ta si tâm rkăng.

³ Gâp yơh hŏ gŭ jêh ta nklang khân may tâm nau rdja, ndrel âk nau klach jêh ri nau râm nsâr.

⁴ Nau gâp ngơi, nau gâp nti lah mâu nsing ma lĕ nau blau gay ma nsŭk nsôr ôh, ƀiălah gay ma tâm mpơl nau brah Brah Huêng Ueh;

⁵ gay ma nau chroh khân may mâu nsing ta nau blau mĭn kon bunuyh ôh, ƀiălah ta nau brah Brah Ndu.

Brah Huêng Ueh mpơl nau blau mĭn Brah Ndu

⁶ Nđâp lah kơt nĕ, đah phung bunuyh văch ma toyh, hên mbơh nkoch nau blau mĭn đŏng, ƀiălah mâu di nau blau mĭn tâm rnôk aơ ôh, mâu lĕ tă bơh phung kôranh chiă uănh tâm rnôk aơ, jêng phung bunuyh mra rlau lôch.

⁷ Ƀiălah hên mbơh nkoch ma nau blau mĭn, nau khlay ndâp jêh ri pôn ndâp tâm Brah Ndu, jêng lĕ nau Brah Ndu tâm nal jêh bơh lor lĕ rngôch rnôk ma nau chrêk rmah he.

⁸ Mâu geh du huê tâm phung kôranh chiă uănh tâm rnôk aơ gĭt năl nau nây, yorlah lah gĭt, khân păng mâu pâng Kôranh Brah nau chrêk rmah ta si tâm rkăng ôh.

⁹ Ƀiălah, tâm ban ma nau nchih: “Lĕ nau măt mâu mâp saơ, tôr mâu mâp tăng, Jêh ri nuih n'hâm mâu mâp mĭn Brah Ndu hŏ ơm rơm jêh ma phung bunuyh rŏng ma Păng.”

¹⁰ Ƀiălah Brah Ndu tâm mpơl jêh lĕ nau nây ma he bơh Brah Huêng Ueh. Yorlah Brah Huêng Ueh gĭt rah vah lĕ ntil ndơ, nđâp ma lĕ nau khlay ndâp Brah Ndu.

¹¹ Mbu nơm dơi gĭt nau mĭn kon bunuyh, knŏng nuih n'hâm gŭ tâm păng yơh? Tâm ban lĕ, mâu geh nơm dơi gĭt nau mĭn Brah Ndu ôh, knŏng Brah Huêng Ueh Brah Ndu yơh.

¹² Ƀiălah, he mâu sŏk dơn ôh huêng bơh neh ntu, ƀiălah Brah Huêng Ueh bơh Brah Ndu, gay ma dơi gĭt rbăng lĕ nau dơi Brah Ndu ăn ma he.

¹³ Hên mbơh nau nây, mâu di ma lĕ nau ngơi nti tă bơh nau blau mĭn kon bunuyh ôh, ƀiălah luh tă bơh Brah Huêng Ueh ntăm nti, dŏng rplay ngơi tâm nau rêh huêng rblang lĕ nau ngăn tâm nau rêh huêng.

¹⁴ Bunuyh mâu geh Brah Huêng Ueh, mâu dơi sŏk dơn lĕ nau tă bơh Brah Huêng Ueh Brah Ndu ôh, yorlah bunuyh nây uănh lĕ nau nây jêng nau brŭt ndrăng jêh ri mâu dơi gĭt vât ôh, yorlah sek uănh tĭng nau rêh huêng.

¹⁵ Ƀiălah, bunuyh geh Brah Huêng Ueh, sek uănh lĕ ntil ndơ, ƀiălah bunuyh nây mâu geh nơm sek uănh ôh.

¹⁶ “Yorlah mbu nơm gĭt năl jêh nau mĭn Kôranh Brah, Gay ma sâm ntĭm an Păng?” Ƀiălah hên geh nau mĭn Brah Krist.