I Kôrintô 16 - Nau Brah Ndu Ngơi 2023

VI. Kô̆ nglĕ dŭt ( 16:1-24 ) Nau riu

¹ Ma nau riu prăk ma phung kloh ueh, ăn khân may ƀư tĭng nau gâp lĕ ntĭm jêh ma lĕ Phung Ngih Brah Ndu ta n'gor Galati.

² Ta nar nguay ăp nar pơh, ăp nơm tâm khân may, tĭng nâm dơi geh khân may nơm, prăp hom du kô̆; lơi kâp nôk gâp tât jêh nây ntơm riu prăk.

³ Tơlah gâp tât, gâp mra njuăl phung bunuyh khân may rnơm djôt samƀŭt gâp jêh ri ndơ khân may ăn tât ta ƀon Yêrusalem.

⁴ Tơlah ŭch gâp nơm mra hăn, pô ri phung bunuyh nây mra hăn ndrel ma gâp.

Nau tâm nal Y-Pôl

⁵ Gâp mra hăn chop khâl khân may pakơi nôk gâp tât n'gor Masêđôn, yorlah gâp ŭch tât n'gor Masêđôn.

⁶ Gâp mra gŭ ndrel ma khân may, klăp lah lôch yan sĭt puh, gay ma khân may njŭn gâp tât ta ntŭk gâp ŭch hăn.

⁷ Tơlah Kôranh Brah ăn nau dơi, ri mơ tơ̆ aơ gâp mâu knŏng ŭch ôh tâm mâp khân may tâm trong gâp hăn rgăn ta nĕ, ƀiălah gâp kâp gân mra gŭ ndrel ma khân may jŏ oi.

⁸ Ƀiălah gâp mra gŭ ta ƀon Êphêsô tât nar Pantơkôt,

⁹ yorlah du mpông pêr huy toyh jêh ri ton pơk jêh ma gâp, nđâp tơlah ta nây ăt hôm âk nau tâm rdâng.

Nau ntĭnh jêh ri nau mbah jô̆ khâl

¹⁰ Tơlah Y-Timôthê tât, srôih kơl hom ma păng geh nau nơih ta nklang khân may, yorlah păng pah kan ma Kôranh Brah tâm ban ma gâp.

¹¹ Yor ri, lơi ăn bu uănh mâu khlay ma păng. Kơl hom păng hăn tâm nau đăp mpăn, gay ma păng plơ̆ sĭt ta gâp; yorlah gâp gŭ kâp păng ndrel ma phung oh nâu êng.

¹² Bi nâu he jêng Y-Apôlôs, gâp srôih nsŭk nsôr ăn păng hăn ndrel ma phung êng hăn chop khâl phung oh nâu, ƀiălah aƀaơ aơ păng ê hŏ ŭch hăn. Nđâp lah kơt nĕ, dôl geh rnôk nơih păng mra hăn.

¹³ Ăn khân may gŭ njrăng hơm, gŭ nâp tâm nau chroh, ăn khân may nănh nuih n'hâm jêh ri ktang.

¹⁴ Lĕ ntil khân may ƀư, ƀư hom tâm nau rŏng.

¹⁵ Hơi phung oh nâu, gâp hôm du tong ntĭnh đŏng, khân may gĭt rnăk vâl Y-Stêphanas jêng play bôk yan ta n'gor Akai; khân păng pah kan lĕ nuih n'hâm ma phung kloh ueh.

¹⁶ Gâp nti nkah khân may tông hom ma phung bunuyh nâm nđĕ, jêh ri lĕ phung bunuyh pah kan rêh ni ndrel ma khân păng.

¹⁷ Gâp maak ngăn yorlah Y-Stêphanas, Y-Pôrtunatus jêh ri Y-Akaikus tât ta aơ; khân păng ntrok tay dôl khân may ndŭt;

¹⁸ yorlah phung bunuyh nây hŏ ƀư ăn mpay nuih n'hâm gâp tâm ban khân may đŏng. Gĭt yơk hom ma phung bunuyh nâm bu pônây.

¹⁹ Lĕ Phung Ngih Brah Ndu n'gor Asi mbah jô̆ khâl khân may, Y-Akilas, H'Phrisil jêh ri Phung Ngih Brah Ndu tâm rgum tâm ngih khân păng njuăl nau mbah jô̆ khâl ma khân may tâm Kôranh Brah.

²⁰ Lĕ rngôch phung oh nâu ta aơ mbah jô̆ khâl đah khân may. Sŏk hom nau chŭm kloh ueh gay mbah jô̆ khâl.

²¹ Gâp nơm, Y-Pôl, êng ti gâp nchih nau mbah jô̆ khâl khân may.

²² Tơlah du huê mâu rŏng ôh ma Kôranh Brah, ăn anathem ma păng! Maranatha ma păng!

²³ Mbơh sơm dăn nau yô̆ Kôranh Brah Yêsu gŭ ndrel ma khân may!

²⁴ Nau gâp rŏng gŭ ndrel ma lĕ rngôch khân may tâm Yêsu Krist.