I Kôrintô 13 - Nau Brah Ndu Ngơi 2023

Nau Rŏng

¹ Nđâp tơlah gâp ngơi lĕ nau ngơi kon bunuyh jêh ri tông mpăr, ƀiălah mâu geh nau rŏng, gâp knŏng tâm ban ma chĭng bu goh mâu lah rgu dăng nteh huy.

² Nđâp tơlah gâp geh nau yô̆ ngơi nau mbơh lor jêh ri gĭt lĕ nau khlay ndâp jêh ri lĕ nau gĭt rbăng; nđâp tơlah gâp geh lĕ nau chroh kŏ tât dơi trơn yôk, ƀiălah mâu geh nau rŏng, gâp mâu geh nau khlay.

³ Nđâp tơlah gâp tâm pă lĕ drăp ndơ gay ma siăm phung o ach, jêh ri jao săk jăn gâp nơm ăn bu gŭch tâm ŭnh, ƀiălah mâu geh nau rŏng, nau nây mâu khlay ma gâp ôh.

⁴ Nau rŏng blau ŭn nuih, nau rŏng vay ƀư nau ueh; nau rŏng mâu geh tâm mâu nach, mâu lah n'hao êng păng nơm, mâu sưr rlau,

⁵ mâu lah gŭ ngao mâu tâm di, mâu joi kao play ma păng nơm ôh, mâu gơnh nuih ôh, mâu mât siăm nau mhĭk ôh,

⁶ mâu maak ôh ma nau kue, ƀiălah maak tâm nau nanê̆ ngăn.

⁷ Nau rŏng vay yô̆ an lĕ ntil ndơ, chroh lĕ ntil ndơ, kâp gân lĕ ntil ndơ, nsrôih dơn lĕ ntil ndơ.

⁸ Nau rŏng mâu blau dŭt ôh. Lĕ nau mbơh lor mra lôch, nau dơi ăn ngơi nau bu năch mra nsrŭng, nau gĭt rbăng mra rlau lôch.

⁹ Yorlah nau he gĭt rbăng geh nau keh, ngơi nau mbơh lor geh đŏng nau keh;

¹⁰ ƀiălah tơlah nau dŭt ueh tât jêh, nau mâu ueh mra rlau lôch.

¹¹ Dôl gâp hôm jêng kon se, gâp ngơi nâm bu kon se, mĭn nâm bu kon se, blau ngơi nâm bu kon se; ƀiălah tơlah gâp jêng toyh jêh, gâp chalơi lĕ nau jêng ndơ kon se.

¹² Aƀaơ aơ he knŏng saơ tâm măt rchŏk tâm nau mâu rah vah; tât rnôk nây, he mra saơ muh măt tâm thâng. Aƀaơ aơ gâp gĭt geh nau keh; tât rnôk nây taơ, gâp mra gĭt năl tâm ban ma Kôranh Brah gĭt năl jêh gâp.

¹³ Aƀaơ aơ hôm geh pe ntil nau aơ: Nau chroh, nau kâp gân, nau rŏng; ƀiălah nau toyh lơn lĕ jêng nau rŏng.