I Kôrintô 12 - Nau Brah Ndu Ngơi 2023

Nau Brah Huêng Ueh ăn

¹ Hơi phung oh nâu, gâp mâu ŭch ôh ma khân may mâu gĭt rbăng ma nau dơi ăn tâm nau rêh huêng.

² Khân may gĭt jêh, dôl khân may hôm jêng phung bu năch, phung rup brah mlo hŏ njŭn leo khân may hăn tâm trong tih.

³ Yor ri, gâp ŭch ma khân may gĭt rbăng, mâu geh du huê bunuyh geh nau ntĭm tă bơh Brah Huêng Ueh Brah Ndu jêh ri lŏ lah: “Brah Yêsu khư rak rtăp!” Tơlah Brah Huêng Ueh mâu ntĭm, mâu đŏng geh nơm mbơh “Brah Yêsu jêng Kôranh Brah!”

⁴ Geh âk nau dơi ăn êng êng, ƀiălah geh knŏng nguay Brah Huêng Ueh.

⁵ Geh âk nau pah kan êng êng, ƀiălah geh knŏng nguay Kôranh Brah.

⁶ Geh âk nau ƀư kan êng êng, ƀiălah geh knŏng nguay Brah Ndu, Nơm ƀư lĕ kan tâm lĕ rngôch bunuyh.

⁷ Nau Brah Huêng Ueh tâm mpơl ma ăp nơm jêng yor nau khlay ma lĕ rngôch.

⁸ Ma bunuyh aơ geh Brah Huêng Ueh ăn ma nau ngơi blau mĭn, tă bơh nguay Brah Huêng Ueh, bunuyh êng dơn dơi nau ngơi gĭt rbăng.

⁹ Tă bơh nguay Brah Huêng Ueh ăn ma bunuyh nây nau chroh; tă bơh nguay Brah Huêng Ueh, bunuyh êng dơn nau dơi ƀư bah nau ji.

¹⁰ Bunuyh dơi ƀư lĕ nau mbên khlay, bunuyh dơi ngơi nau mbơh lor, bunuyh dơi năl lĕ brah, bunuyh dơi ngơi lĕ nau ngơi êng, bunuyh dơi gĭt rblang lĕ nau ngơi nây.

¹¹ Lĕ rngôch nau nây jêng nau kan tă bơh nguay Brah Huêng Ueh; Păng ăn nau dơi ăn ma ăp nơm bunuyh tĭng nâm nau Păng ŭch.

Nglay săk jêh ri lĕ kô̆ săk jăn tâm Brah Krist

¹² Yorlah geh knŏng du săk jăn ƀiălah geh âk lĕ kô̆ săk jăn; lĕ kô̆ săk jăn geh âk, ƀiălah geh knŏng du săk jăn; Brah Krist kơt nây đŏng.

¹³ Yorlah he, nđâp tơlah phung Yuđa, phung Grek, phung dĭk mâu lah phung kon me, lĕ rngôch phung he hŏ dơn nau ƀaptem da dê tâm nguay Brah Huêng Ueh gay ma jêng du săk jăn; lĕ rngôch dơi nhêt tâm nguay Brah Huêng Ueh da dê.

¹⁴ Yor tâm nglay săk mâu di ôh geh knŏng du kô̆ săk jăn dơm, ƀiălah păng geh âk kô̆ săk jăn.

¹⁵ Lah jâng lah: “Gâp mâu di jêng ti ôh, pôri gâp mâu jêng du kô̆ tâm săk jăn” pôri mâu yor nây jâng mâu jêng du kô̆ tâm săk jăn.

¹⁶ Lah tôr lah: “Yor Gâp mâu di jêng măt ôh, pôri gâp mâu jêng du kô̆ tâm săk jăn nây lĕ” pôri mâu yor nây măt mâu jêng du kô̆ tâm săk jăn.

¹⁷ Lah lĕ săk jăn jêng măt da dê, mâm dơi tăng? Lah lĕ săk jăn jêng tôr da dê, mâm ƀư dơi n'hơp?

¹⁸ Ƀiălah aƀaơ, Brah Ndu hŏ dăp lor lĕ kô̆ tâm săk jăn, ăp kô̆ săk jăn tĭng nâm nau Păng ŭch.

¹⁹ Lah lĕ rngôch geh knŏng du kô̆ săk jăn dơm, ntŭk nâm nglay săk gŭ?

²⁰ Kơt nây, kô̆ săk jăn geh âk kô̆, ƀiălah nglay săk knŏng geh nguay dơm.

²¹ Măt mâu dơi lah ma ti: “Gâp mâu hôm ŭch ma may ôh;” bôk mâu dơi lah ma jâng: “Gâp mâu hôm ŭch ma may ôh.”

²² Ƀiălah, moh lĕ kô̆ săk jăn tâm nglay săk uănh tâm ban ma rdja lơn, jêng dŭt khlay.

²³ Moh kô̆ săk jăn tâm nglay săk he mĭn jêng jê̆ lơn, he lơ hô yơk ngăn ma păng; moh kô̆ săk jăn mâu ueh, he lơ hô ƀư ma păng ueh âk lơn;

²⁴ bi kô̆ săk jăn ueh jêh, mâu hôm ŭch ueh lơn ôh. Ƀiălah Brah Ndu nkra jêh săk jăn kơt nây, gay ma moh kô̆ săk jăn mâu lăng khlay lŏ geh nau yơk âk lơn,

²⁵ gay ma mâu geh nau tâm nkhah tâm pă tâm săk jăn ôh, ƀiălah lĕ kô̆ tâm săk jăn geh nau rvê ndrel ma ndrăng khân păng.

²⁶ Lah du kô̆ săk jăn mâp nau ji, pôri lĕ rngôch ji tâm ban da dê; tơlah bu rnê du kô̆ săk jăn, lĕ rngôch geh nau răm maak tâm ban lĕ.

²⁷ Khân may jêng nglay săk Brah Krist, jêh ri ăp nơm jêng du kô̆ săk jăn.

²⁸ Brah Ndu dơm hŏ dăp lor tâm Phung Ngih Brah Ndu: tal nguay jêng kôranh oh mon, rơh bar jêng nơm mbơh lor, rơh pe jêng kôranh nti, rĭ mơ tât bunuyh ƀư nau mbên khlay, jêh nây bunuyh dơi ƀư bah nau ji, phung dơi kơl bu, bunuyh mât uănh, bunuyh ngơi lĕ nau ngơi êng.

²⁹ Mâu di ôh lĕ rngôch jêng kôranh oh mon? Mâu di ôh lĕ rngôch jêng nơm mbơh lor? Mâu di ôh lĕ rngôch jêng kôranh nti? Mâu di ôh lĕ rngôch ƀư nau mbên khlay da dê?

³⁰ Mâu di ôh lĕ rngôch geh nau dơi ƀư bah nau ji? Mâu di ôh lĕ rngôch ngơi lĕ nau ngơi êng? Mâu di ôh lĕ rngôch gĭt rblang nau ngơi êng da dê?

³¹ Nđơr hom lĕ nau dơi toyh lơn. Aƀaơ aơ gâp mra ntĭm ma khân may trong ueh uĭn lơn đŏng.